楊思琦被傳另結新歡及已大肚，但她對傳聞未有否認，令分手真相更耐人尋味。
楊思琦前日單方面宣佈和男友李永豪的9年情玩完，事後有指女方殺出小三，甚至傳她大肚，但她昨日對傳聞竟然不回應，只哽咽稱讚男友是個好男仔。李永豪依然如墮迷霧，但他昨仍癡情示愛，望能盡力挽救，其父李家鼎則發火狂轟。
楊思琦和李永豪拍拖9年早已到達談婚論嫁的階段，但前日她單方面宣佈分手，令李家大感愕然。有傳她不滿男友沉迷玩車，也有傳她與中學同學Andy撻着兼已大肚，昨日思琦被問及是否有第三者介入及是否懷孕時，她卻全部冇回應。
李永豪（左）昨日在父親李家鼎陪同下，眼紅紅重提被楊思琦飛一事。
思琦哽咽讚豪仔
思琦昨在電話中說：「我淨係想講，大家相處咗咁多年，我覺得豪仔係一個好好嘅男仔，家分咗手，大家仍然係朋友，我希望佢將來可以幸福快樂。」再問她分手原因時，她語帶哽咽：「我覆你電話只係想講呢樣，唔講其他。」
李永豪昨返將軍澳電視廣播城拍攝無綫新劇《拳王》，由父親李家鼎陪同下接受訪問，對於有指思琦暗交第三者，一臉無奈的豪仔眼紅紅表示不回應，但不相信思琦懷孕。他謂兩人早已同居，但4月時思琦突然以方便開工為由搬返將軍澳娘家，他說：「當時我感覺唔到佢有問題，佢依然好關心我，怕我開工冇飯食仲嚟陪我食飯。」思琦自稱已分手多月，豪仔否認：「8、9日前佢嚟電視城同我食飯，當時胡定欣、王浩信都喺度，所以大家都好愕然。」
未知是否尚未接受女方提分手，豪仔似乎未敢主動聯絡思琦，他說：「拍拖咁多年係結婚對象，家發生咁嘅事我都好亂。我都想做好多嘢挽救，但需要互相配合，我單方面冇用，我好鍾意呢個女仔。」對於有傳思琦出現新歡Andy，豪仔說：「唔回應，總之事前冇嘈交，我呢一刻仲好擔心，怕佢有事。」
鼎爺則反駁思琦指分手多月，他以bullshit回應：「8、9日前我哋拍《拳王》，佢都有嚟同我哋食飯，黐線o架，上個月佢仲同豪仔過生日，嗰時仲講最快年底結婚。」思琦曾言知會過李家兩老講分手，鼎爺在電話中發炮：「邊有同我講呀？我會叫個仔睇開啲，既然同個女仔緣盡，唔好挽留！」傳思琦另結新歡，鼎爺更㷫：「如果佢認，咁唔知醜都冇法。」
疑似第三者發功
疑是第三者的Andy化名cthk118在微博轉發愛的訊息，向思琦隔空傳情。
至於疑是第三者的Andy，在微博昨刪除不少留言，但日前他曾轉發訊息：「其實不管你愛過多少人，不管你愛得多麼痛苦或快樂，到最後，你不是學會了怎樣去愛，而是學會了，怎樣去愛自己。」更留言這是真理，明畀思琦睇。
無綫高層樂易玲昨也說：「思琦冇大肚，佢哋咁多年，好可惜。我係以阿媽身份關心佢，我係大媽，佢兩個做嘢經過深思熟慮。」
http://hk.apple.nextmedia ... ;av_id=15389221
