o靚模今年被香港貿易發展局禁止在書展搞簽名會，眾女正待大後日在灣仔會展揭幕，為期5日的2010香港動漫電玩節入場吸金，去年以肖像攬枕辣㷫fans的周秀娜亦蓄勢待發，可是昨日卻接獲動漫節大會通知，以人流控制為由，嚴拒她於大後日及周日進場造勢，可是大會卻放生百果園E神陳靜等o靚模，擺明大細超，慘做替死鬼的周秀娜甚感無奈。
周秀娜今年被貿發局的顧問團以o靚模寫真集低俗為由擯出書展，她尊重大會決定，故於書展期間只逗留在流動簽名車上會fans，全程並未走位入場，周秀娜叠埋心水等今日書展閉幕才踩場攞尾彩，然後休戰待後日入場出席開幕活動，以及周日（8月1日）以網絡遊戲Gameone代言人身份進入灣仔會展舉行的2010香港動漫電玩節造勢，可是昨日該遊戲品牌突接獲動漫節大會通知拒絕讓她現身，並指她會令灣仔區造成混亂，可是其他o靚模如Jessica C.、Donut、百果園E神陳靜和浸大咪神楊梓瑤卻全部獲放生。
網上遊戲Gameone公關部發言人施小姐昨日證實接獲動漫電玩節大會通知拒絕周秀娜進場，施小姐說：「今日下晝4點幾，我哋突然接到主辦單位來電，佢哋話會展同警方以人流管制條例，唔容許藝人喺參展攤位出現，我哋接到通知都好頭痛，家開會商量應變對策。」
施小姐透露原本計劃安排代言人周秀娜屆時穿上度身訂做的女媧cosplay服飾撐場，並即場拍賣她身上的戰衣作慈善義賣，施小姐說：「家臨時話唔准周秀娜入場，要佢喺指定地方出現，但又未講到喺邊度，我哋都諗緊個活動係咪要取消，希望大會可以畀到酌情權。」施小姐直認這個臨時通知一定影響產品銷量。
周秀娜除被封殺周日亮相Gameone活動，據知就連開幕禮時，另一遊戲參展商Xbox的活動都不能參加。遭動漫電玩節全面封殺的周秀娜去年在場中熱賣肖像攬枕，成為全城熱爆話題，她今年卻成唯一被全面封殺的o靚模，周秀娜昨日在電話中寸爆說：「我屋企住西環，如果唔可以路經灣仔，咁我以後喺銅鑼灣收工，係咪要過海去九龍再經西隧先返屋企，咁啲車費咪貴好多。」
周秀娜的經理人Roy則揶揄說：「如果由代表商家嘅機構指明會展同警方表示，一個model會為灣仔帶嚟騷動而拒絕佢入場，仲要拉埋警方落水，我作為周秀娜經理人會為旗下藝人得到咁嘅效果而自豪，香港好耐都冇咁嘅情況出現。」Roy表示周秀娜最終會順應參展商的要求去做。大會公關Vis宣傳公司昨日發聲明回應周秀娜禁足事件，表示警方與大會溝通後，以安全為原則，指邀請高知名度人士宣傳，建議不要在攤位內進行，故大會建議高知名度藝人可在簽名區或大舞台亮相。
百果園E神陳靜獲網上遊戲參展商Gamania邀請出席大後日和周日的宣傳活動，陳靜預告現場爆驚喜說：「為咗答謝先入會場支持我活動嘅首10個fans，我會即場喺身上除10件嘢送畀佢哋。」
from:
http://hk.apple.nextmedia ... art_id=14280762
