[資訊分享] iPad水貨下月初到港

平板電腦蘋果iPad將於4月3號喺美國率先發售，之後4月底陸續喺澳洲、加拿大、法國同日本等9國家開賣，數嚟數去，乜都要快嘅香港反而冇份。小妹噚日問過香港蘋果，佢話仲未有確實時間同價錢，點樣賣法都未定，但今年內一定有得賣喎，係呀，「今年內」呀？講咗等於冇講。

售逾$5000預訂搶手
行貨未有着落，小妹咪走去旺角先達同啲專賣電腦產品嘅老友八吓，睇吓水貨幾時到。G-World Mobile老闆阿Lo話，蘋果3月初公佈喺美國賣iPad，公司即刻預訂咗大約10部iPad，一人限買兩部，想攞多啲都冇貨，水貨最快會下月4、5號到港，價錢連埋運費大約要5,000幾蚊至6,000幾蚊。
阿Lo笑笑口話，iPad水貨數量唔多，連日嚟有唔少熟客查詢，部份仲要求幫佢哋留定一部。至於呢部iPad會唔會被炒高一、兩成，就要睇到時嘅供求情況，「香港蘋果越早公佈銷售日子等詳情，水貨iPad就越炒唔起。但第一水貨炒價肯定有上升空間。」
率先推出巿場嘅iPad，暫時只能支援Wi-Fi，唔支援3G；可以用Wi-Fi同3G上網嘅版本要稍後先有，開售時間未定。iPad賣點係平板式電腦，配備多點觸控顯示屏，厚度只有半吋，重1.5磅，集合瀏覽網頁、開啟同發送電郵、睇相睇片聽歌、打機、閱讀電子書等功能於一身。