韓國的士三級制

近年韓流襲港，唔少人去南韓滑雪，但早幾日發生一單皇仁高材生滑雪撞欄疑延誤送院致死，都咪話唔心驚。小妹早輪都去咗首爾狂掃護膚品，點知誤坐「賊車」，坐咗5分鐘的士，收成8.5萬韓圜，即係570蚊港幣，肉都赤埋。

原來當地的士分三種，最平係白色車身嘅普通的士，兩公里起錶費2,400韓圜（約16港元），每144米或者每35秒跳一次錶，每次100韓圜（約0.6港元），午夜到凌晨4點會加收兩成夜間服務費。但當地人唔係好識講英文，所以拒載率可以話係百分百。

黑色車身嘅模範計程車，價錢較貴，但司機識英文，亦唔會拒載，比較適合旅客乘搭，不過起錶要3,000韓圜（約20港元），夜間同樣會收附加費。我同朋友試過買完嘢坐的士返酒店，車程6、7分鐘就要50幾蚊港幣。

收費最貴嘅係7人珍寶的士，款車收費真係好驚人，貴到設有信用卡付款服務。起錶4,500韓圜（約30港元），每164米或39秒跳錶200韓圜（約1.3港元），夜間收費又係會多啲。我同朋友懵懵吓坐過一次，換來慘痛經驗，一開車發現個錶跳得特別快，坐咗5分鐘已經跳到8.5萬韓圜（約570港元），嚇到我哋即刻落車。

奉勸大家去韓國玩坐地鐵最好，雖然坐一個站要1,000韓圜（約6.7港元），買一張類似八達通嘅T-money卡都只係減收100韓圜，一定平過坐的士。