'09娛樂圈新聞講嚟講去都係o靚模同天王天后結婚，最多加多單歌手吸毒，前年一單CEO淫照就撼低晒。
娛樂新聞悶，好在網上就爆出3萬港女同電車男Peter、史上最靚港姐林潔瑜（翻版許愿）、令倪震孔雀開屏嘅張茆、世紀賤男軒仔等新聞，搞到班起底組網友出盡力，一年又過，究竟呢班網上hit人搞緊乜？即睇！
被女溝SMS
為證明自己冇講大話，Peter即時取出Amy約佢去飲咖啡的短訊，雖然唔係咩情慾SMS，但佢笑笑口似乎已經好滿足。
今年3月無綫《星期日檔案》的「港女．講男」介紹當時做電腦維修員Peter，由於佢收入低又不善表達自己，搞到溝唔到女要喺女僕cafe搵自我，結果成為香港電車男人辦。
電車回帶
今年3月15日《星期日檔案》要求
Peter坐電車以配合電車男形象，不過Peter說：「係TVB要求啫，其實我平時好少坐電車，我搭巴士同地鐵多啲。」
今年初Peter曾係女僕cafe常客，仲同女僕小月一齊做訪問，但大半年後，Peter表示已經好少上去，佢話：「我要努力儲錢開電腦鋪，上去其實都幾無聊！」醒覺咗！
新年宏願
雖然Peter話唔介意俾人叫電車男，但講到新年願望，就話除咗做老闆，仲重申：「我唔再係電車男！」話唔介意就呃人啦！
60萬開鋪
事隔大半年，再約25歲的Peter做訪問，電車仔講嘢明顯進步，不再口窒窒之餘，仲識自我宣傳，Peter說：「我每日對住鏡練習自我介紹，希望改善人際生活，我冇做電腦維修啦，家喺西環餐廳做侍應，晚黑返夜校，希望考番會考，個個以為我溝唔到女，其實我都有女約，佢叫Amy，係以前公司同事，我哋會成日傾電話同約出街食飯睇戲！」
Peter續說：「我唔拍拖，只係想我事業有成先，我01年開始打工，家儲到近40萬，我希望用60萬開間電腦鋪做老闆，有錢你驚溝唔到女咩！」係喎，有錢起碼溝到黎三萬先啦！
Peter透露佢目標係儲到60萬開電腦鋪，到時唔再係打工仔就自然有女友啦，識諗到呢！
袁彌明：佢肯接受傳媒訪問，已經踏出第一步，同多啲人溝通就會改善，我之前教佢表達技巧，家有女仔主動約會好正常啫！
高登女神林潔瑜 轉行做司儀
被封女版許愿25歲的落選港姐林潔瑜（Esther），冇簽無綫，不過佢繼續發星夢，佢25日喺blog寫：「踏着高跟鞋走過2009，穿插台上台下大街小巷……地形道路變幻原是永恆！」留言繼續詩人上身，不過就獲唔少網友力撐，所以落選後工作有增無減，除咗繼續做美容顧問正職，仲秘撈司儀，據知Esther受唔少大學生歡迎，邀請佢做大學嘉賓，10月中大新亞60周年院慶都請佢做嘉賓，據知中大貪佢夠搞笑，知情者說：「雖然佢唔係超索，不過唔少男同學覺得佢好搞笑。」所以失落港姐一樣可以繼續追夢。
最新靚相
林潔瑜落選港姐兼冇簽無綫，但無綫嘅官方網頁就繼續有放新相及update文章，知道自己網上有唔少人支持，仍然keep住更新，果然有腦。
經典惡搞
網友知道女版許愿入圍港姐後，即時將佢啲抵死表情放上網，高登仔仲惡搞佢成Chrissie，稱佢女神，到家陣仲每日有update佢嘅新相，好長情喎。
冇簽TVB的林潔瑜一樣超忙，雖然正職做美容顧問，不過唔少人知道佢口才了得，所以搵佢做活動司儀，又喺中大院慶中表演唱歌，都幫補到o架。
袁彌明：Esther好聰明，佢口才唔錯，難得有網友支持，keep住個勢唔憂冇市場，應該長做長有。
開屏張茆 變工管碩士
去年尾，爆咗單倪震孔雀開屏，啜爆22歲海南妹張茆，由於佢大量性感自拍照流出，網友由08年尾熱捧到09年，今年2月連海口電視台都搵佢做《活色生香每一天》節目主持。
可惜張茆臨時轉軚，話繼續升學，據知佢想留港生活，所以畢業市場學學士就即時報讀工管碩士，佢喺blog嘅新留言話：「還是留港做學生好。」冇寫blog幾個月，最近佢又再上載近照，不過就再冇三點式同超誘人甫士，全部嘅自拍相明顯保守晒，睇嚟大個女識驚喇！
自從同倪震激咀新圖出街，張茆blog內性感相即時被網友轉貼分享。
照揸LV
開屏事件事隔大半年，張茆又扮到靚靚自拍放上網，雖然明顯着得密實晒，不過佢手揸住約值$18,000的LV手挽袋，貴氣冇減過。
11月張媽（左二）來港出席囡囡畢業禮，張茆孖住城大三位內地姊妹影相，見到記者即黑面說：「我以前啲嘢唔想提。」
倪震孔雀開屏，同周慧敏由分手至結婚十足睇戲一樣！
袁彌明：22歲女面對咁多輿論壓力唔簡單，可以克服好犀利，家佢繼續升學，畢業後應該有好多人想簽佢！
Google No.1
趙燕萍 贏周秀娜
另一位經典港女要數10月大鬧元朗建材公司的趙燕萍，因洗手盆與經理對質片放上YouTube辣㷫網友，結果被起底，Google搜尋一度贏今年人氣女神周秀娜，個個爭住踩佢一腳，唔使一個禮拜，佢即時向所有人道歉，網上個人網頁亦即時刪除，即時人間消失！
軒仔終於甩身
09年尾論人氣，一定係被指推女友落樓梯嘅城大副學士軒仔，自從有位自稱係軒仔女友喺Xanga爆話軒仔搞大自己個肚仲推佢落樓令佢小產，搞到班網友認定軒仔係世紀賤男，好在商業二台DJ陳強搵咗軒仔大平反，節目中軒仔大呼冤枉，並稱自事件發生後，生活嚴重受影響，軒仔成網絡欺凌人辦，而DJ陳強就話：「我都有聯絡過軒仔，佢最近已經冇再俾人騷擾，慢慢過番正常生活喇。」恭喜晒啦。
自稱軒仔女友嘅blog繪形繪聲寫低對方惡行，班網友未查證就話睇唔過眼要聲討軒仔！
黎三萬升學冇教
除咗電車男Peter成為人氣王，《星期日檔案》節目中另外一位自稱月入3萬的補習老師黎潔瑩一樣hit爆網絡，事後佢份補習老師工亦因為咁而被辭退，雖然有報道指另有補習社以9萬蚊挖角，不過有網友指黎三萬冇再做老師，只係繼續升讀教育課程，連份工都冇埋，不過冇網友同情，都係港女性格累事囉。
節目中黎三萬話收入低過自己嘅男仔難相處，私底下卻係鵪鶉女友，除同男友於餐廳互啜，仲餵對方食甜品。
