06年1月，倪震高調拖周慧敏，出席他有份投資，位於灣仔王子酒店二樓的Joe's Billiards&Bar開張！今年4月，酒吧在尖沙嘴開分店，倪震亦廣邀傳媒，更嗌齊圈中好友撐場大肆宣傳。
不過，原來灣仔酒吧在8月秘密地擴充至樓上四樓，更涉嫌非法開賭。本刊記者三次放蛇，皆發現酒吧有poker（德國話事啤）賭枱與籌碼及現金交易。據知，上周警方亦曾派人到酒吧調查。年初偷啜張茆犯下色戒的倪震，今勻再犯賭戒，難怪老婆周慧敏扯火回應︰「你問番倪震！」而倪震則連日來一直龜縮，未見影蹤。
最近有報道指倪震於灣仔開設的Joe's Billiards&Bar涉非法開賭，有指倪震不但在酒吧賭枱親自招呼熟客，更曾請來一班o靚模撐場。報道出街後，記者一直致電倪震，但其手提電話連日來接駁到留言信箱，記者在其寓所外等候，亦不見他出入。
自從酒吧涉非法聚賭，倪震連日來都龜縮，手提電話則轉駁到留言信箱。
06年，灣仔酒吧開幕之初，倪震與周慧敏不時情侶檔監場，並邀圈中好友捧場。
11月6日籌碼換現金
倪震位於灣仔的酒吧，開設賭枱玩Poker，賭客手上的籌碼，離去時可兌換現金，即是有現金交易。當晚由於是周五，客人特別多，賭枱由閒日三枱增至五枱。
自爆13萬投車牌
而圈中出名慳家的倪震，近兩個月卻突然闊佬，連買兩部新車，分別是62萬的平治E250及38萬的二手日產Elgrand，並以13萬投了個無字頭的生日號碼車牌。倪震更在專欄中沾沾自喜，自爆投車牌經過。
倪震好友透露︰「阿Joe呢排意氣風發，經常請班老友食飯，仲話自己坐喺度唔使做，每個月都大把錢落袋喎！」
周日（8日），周慧敏出席慈善活動，被問到倪震最近買新車及酒吧涉非法開賭問題時，她竟一改以往好脾氣，碌大雙眼勞氣話：「買車係好普通嘅事，唔使特別解釋！（有報道指倪震嘅酒吧賭poker？）阿Joe講呢個係誤會，了解過之後冇問題。」
但當記者表示曾去過酒吧，見到有賭枱及客人用錢換籌碼玩poker時，她立即黑面扯火說︰「你問番倪震啦！好冇呀？因為由我去comment（批評）唔係好適合。（呢個構思係咪佢諗出嚟？）你自己問佢啦！好冇呀！（佢call極唔覆喎！）你sms俾佢，佢會覆。」說罷即轉身離去。
11月10日本來是周慧敏生日，無奈前一晚她要為許鞍華新戲《得閒炒飯》（暫名）拍通宵戲沒法慶祝，但之後幾天亦未見她與老公出外慶祝生日。其實，近年倪震野心不少，不但與老友谷祖琳搞甜品店，亦與皇雀會合資搞酒吧。
個多月前，酒吧擴充至四樓，而老闆之一的倪震竟一改以往大鑼大鼓作風，未有將擴充消息公告天下，皆因酒吧內設有多張賭枱，招呼客人玩美國大熱的poker（德州話事啤），更張貼近日由古天樂、劉青雲主演的電影海報《撲克王》作招徠，又以電影的贈品啤牌，在場內開賭。
記者連日放蛇，發現酒吧守衞森嚴，不但周圍設有閉路電視，場內亦有多個「睇場」駐守。當日記者上到四樓酒吧，發現酒吧竟有開poker枱招呼熟客，職員顯得極度警覺。賭枱則設在酒吧的角落位置，旁邊貼了「Hong Kong Member Only」字樣。
職員沒有熱烈推介記者玩poker，當時場內只得小貓幾隻。直至晚上九點後的歡樂時光，酒吧內開始出現多名穿西裝的中年男客人。他們十分熟架步地走到賭枱旁，職員與熟客耳語一番後，客人快手快腳將一疊錢塞俾一名西裝男，西裝男收錢放入枱上一小手袋後，負責派牌的性感女荷官便取出籌碼給客人。
11月９日，周慧敏傍晚乘保母車，由寓所金山花園出來，準備為許鞍華的新戲《得閒炒飯》拍攝通宵戲，當她發現記者跟蹤，即不停左cut右cut，撇甩記者。
周慧敏在新戲中扮演女同性戀者，所以早前她曾落蘭桂坊的女同志吧取經。
花百萬買車
倪震與周慧敏堪稱圈中慳家夫婦，倪震本來揸開古董Benz，周慧敏則揸開寶馬多年，但近兩個月，倪震自己買了架平治E250代步，更買了架日產保母車予女友開工，非常豪爽。
平治古董車約廿萬
寶馬房車約37萬
新車
平治E250 62萬
車牌13萬
新車
日產Elgrand七人車38萬
有錢銀交易屬違法
倪震有份投資的Joe's Billiards&Bar內設有多張poker賭枱供顧客耍樂。顧客要先俾入場費$150，才可埋枱用現金對換籌碼耍樂，加上場內荷官逢百抽五，這種經營手法涉非法聚賭，就連參與賭博的人一樣違法，會留有案底。
梁永鏗律師指，經營酒吧涉及金錢賭博即屬違法，根據香港法例148題第5條，非法營辦賭場最高刑罰為五百萬元及監禁七年。
梁律師指︰「酒吧用金錢來換籌碼來賭poker，同賭場有咩分別呢？香港只有馬會有合法賭博牌照。不過都有條例可以喺酒吧、會所同酒樓內麻雀耍樂、玩排九等活動，但係庄家一定唔可以抽佣，唔可以落場玩，仲要係純粹玩，唔可以涉及金錢。如果顧客用金錢換籌碼，贏輸之後都可以換番錢，咁佢嘅形式同賭場冇分別。
「如果玩呢啲(poker)係social，唔應該收charge及任何入場費，一旦場地管理控制人員有份參與即屬違法，佢哋咁樣都算係『非法聚賭』。就算佢哋派牌嘅荷官同對換籌碼嘅人無身穿該酒吧制服，但係入到去見到咁嘅(賭poker)情況，僱主亦涉及勾當，亦屬『非法聚賭』。」
百五元入場費
在一個Poker發燒友網頁內，發現倪震酒吧的照片，牆上張貼了近日由古天樂及劉青雲主演的電影《撲克王》海報，連啤酒也是電影公司的贈品。
記者發現場內裝有最少五部閉路電視監視，職員對陌生的客人非常留意，不時到實。記者向該西裝男表示想埋枱玩poker，西裝男先打量記者一下，然後將一張表格遞給記者，上面要填寫姓名、電話及身份證號碼。之後每個賭客要先俾150元（逢五、六、日甚至節日則多收一百）買下三張飲品coupon（即入場費），才可到賭枱自選位置玩Poker。
由於記者是新客，職員會即場打電話給新客，電話接通後，職員便匆匆收線，藉此測試新客電話真偽。就算新客去洗手間，職員亦會尾隨住。每當賭枱旁邊有人取出電話，三名職員便會貼近，以防被人用電話拍攝相片。當玩poker的客人離去時，他們亦快手快腳為客人手上的籌碼兌換現金。
分店開幕晒幸福
今年4月，倪震酒吧在尖沙嘴開分店，高調廣邀傳媒採訪，更與女友交足功課，風騷攬啜晒幸福。
11月3日放蛇直擊
睇場實四周
賭枱前約有三名睇場到實。
荷官逢百抽五
倪震酒吧的Poker枱，閒日較淡，只開了兩張。而賭場大部分是西裝友，每鋪約幾千至一萬蚊上落，女荷官則逢百抽五。
五部閉路駐場
場內共有五部閉路電視，確保每個角落都到實。
西裝友收錢
賭客的所有錢都由一西裝友收晒，然後賭客自行到賭枱取籌碼。
董事要上身
06年，以倪震英文名命名的Joe's Billiards&Bar開張時，他戮力宣傳，向外宣稱與友人投資百萬開業，現在酒吧涉非法開賭，倪震當然一身蟻。
根據公司註冊處的資料顯示，Joe's Billiards&Bar是由兩間英屬處女群島註冊的公司持有，要追查幕後老闆並不容易。不過梁永鏘律師表示：「其實英屬處女群島嘅公司都可以追查到基本董事嘅帳戶資料，法庭亦可以向海外申請該公司嘅董事資料，若證實倪震只是該酒吧股東並非董事，他就可以甩身。因股東只是夾錢投資，但董事是要負責管理事務。但若證實他是董事，則好大機會被控，因為董事冇可能唔知業務範圍，唔知都要解釋。」
而黃國桐律師亦表示︰「賭仔一樣有罪，不但要留案底，還要罰款，不過要視乎賭的銀碼，如果罰一萬元以下，三年後就可以洗底，因為有個罪犯自身條例。我唔相信倪震本身持牌，會兜嚟兜去，倪震上唔上身係證據問題，但係我覺得聲譽十分唔好，呢啲嘢瓜田李下。我第一批評呢，呢個就一定係聚賭，主持同參與嘅都係犯法。第二呢，所謂英屬處女群島嗰啲呢，就無私顯見私！」
根據註冊的公司登記，倪震的酒吧是以兩間在英屬處女群島公司持有。
Lavina自爆去過
據知，幫倪震酒吧設立poker的Ricky鍾，同時亦是電影《撲克王》的電影顧問。酒吧負責人借助Ricky與電影公司關係，上個月初，曾請來電影的一班o靚模如Lavina及Celina J到酒吧撐場。
記者求證Lavina，她表示︰「我係上過去玩，不過係因為Ricky介紹，佢同我經理人講係電影宣傳活動，我其實唔係好熟倪震。我都聽過報道（酒吧涉非法開賭），但我嗰次真係冇賭錢，我一坐埋枱佢哋就俾籌碼我玩，啲籌碼係換禮物。（咩禮物？）……係星際酒店連船飛的套票，嗰度依家新開咗Poker房吖嘛。」
本刊亦致電Ricky鍾求證，他直認為倪震酒吧設立pocker︰「其實poker喺歐美流行五、六年，現在由我引入香港。（你知唔知酒吧涉非法開賭？）你問埋啲咁敏感嘅問題，我諗我要出嚟當面講至得，依家我好忙，你遲啲再打嚟約時間啦。」不過，當記者再致電他時，他將電話轉駁至call台，一直未覆。
最後，記者致電《撲克王》的電影公司中國星，其發言人李小姐即時與酒吧畫清界線︰「嘩！《撲克王》送咗幾千副啤牌，印咗咁多海報，送咗俾好多客戶，佢哋點用我控制唔到喎！（Ricky有份參與電影《撲克王》？）吓！製作嘅嘢你問番導演陳慶嘉！」而老闆娘向太亦表示不知情，她說：「有件咁嘅事咩？酒吧唔可以賭錢o架！吓！佢貼咗我哋電影海報宣傳？咁唔得喎！我會聯絡有關人士，收番張海報囉！」
記者亦曾致電警察公共關係科，詢問有關上波樓查牌事件，但該部門要求本刊書面傳真問題才回覆，但本刊傳真了問題後，截稿前仍未獲回覆。
今年4月倪震酒吧開幕，（右起）麥玲玲、拉姑及古巨基亦特來捧場。
Lavina亦是Ricky鍾搭路，安排到倪震的酒吧玩Poker。
Lavina玩poker宣傳
宣傳《撲克王》時，Lavina與向華勝兒子向佐曾有到星際酒店玩poker，後來她再到倪震酒吧玩poker時，還誤以為是為電影宣傳。
倪匡︰梗係擔心啦
致電倪匡，他無神無氣說：「唔知呀！（倪震間酒吧今次涉非法聚賭，你心情點呀？）梗係擔心啦！不過佢生意上嘅嘢，我從來都唔會過問，佢都咁大個仔，連老婆都娶埋，好多事我都唔會問，不過我相信佢應該搞得掂嘅。」
古巨基︰可能生意好呢
問基仔知唔知倪震間酒吧擴充營業，他說︰「擴充咩？因為呢排忙碟嘅嘢，未上過去呀！（佢4樓有poker玩喎！）係咩？我真係唔知喎！（有報道指酒吧涉非法聚賭！）嗰個係真實定係傳聞？我唔了解，評論唔到！佢搞波樓我就覺得好好，嗰時我都有打桌球嘅，佢好多時都full house（全場爆滿）。（倪震一向慳家，最近買咗兩架車喎！）我又唔知喎！可能生意好呢？」
狄波拉︰我乜都唔知
之前有份為倪震酒吧剪綵的拉姑，不予置評︰「我昨晚先落機，明天又走喇！唔好意思，我乜都唔知喎！」
麥玲玲︰佢犯是非口舌
倪震的酒吧兩次開張都請麥玲玲剪綵及切燒豬，麥師傅話：「佢開兩間桌球酒吧都有搵我睇風水，佢話好好生意。（最近倪震間酒吧疑涉非法聚賭喎！）我都聽講過。（佢有無搵你算一算？）冇！佢呢排都係會犯是非口舌。」
採訪、撰文、攝影︰娛樂組
部分圖片：《蘋果日報》
倪震酒吧涉非法開賭豪氣狂花百萬買新車
倪震酒吧涉非法開賭
2006年1月，倪震高調帶著周慧敏出席他有份投資在灣仔的桌球酒吧開幕禮。今年4月，酒吧在尖沙咀開分店，倪震也廣邀傳媒，更叫上圈中好友撐場大肆宣傳。
不過，原來灣仔酒吧在8月秘密擴充至樓上4樓，更涉嫌非法開賭。《忽然一周》記者三次放蛇，皆發現有賭台與籌碼兼現金交易。據知，上周警方也曾派人到現場調查。年初偷吃張茆而犯下色戒的倪震這次再犯賭戒，難怪老婆周慧敏發火回應“你去問倪震！”而倪震則連日來一直躲藏，不見蹤影。
