傅穎（Theresa）據聞因為同鄧麗欣（Stephy）唔夾，喺唱片公司金牌大風俾Stephy為首嘅一批太子黨人群起杯葛，結果Theresa早排出席內地活動都係單拖去，公司完全冇派人跟場。關係搞成咁，難怪近日傅穎透過律師正式要求同金牌大風、TalentBang兩公司解約，原來佢嘅經理人合約係由呢兩間公司同時持有。Theresa同經理人公司仲有兩年合約，對佢嘅解約要求，聽講金牌大風原則上係同意，但Talent Bang就唔同意，噚日馮仁昭打畀金牌負責人陳輝虹，佢話：「Theresa係提出要解約，公司同佢係傾緊，我哋都希望盡快解決，當然公司立場係想同佢繼續合作，但既然雙方意向唔統一，有啲問題都要解決嘅！」
Theresa噚日出席拉麪店開張活動時，都有講到同唱片公司提出解約嘅事。
前日係Theresa生日，噚日佢出席公開活動，fans好有心為佢補祝生日。
寸Stephy有心Theresa噚日同蔡瀾喺銅鑼灣出席拉麪店開幕活動，佢都承認咗同公司提出解約，不過佢話：「公司對我唔係唔好，我要求解約只係想試吓其他新發展，希望事情可以盡快有結果啦。」另外，噚日Theresa一班fans帶埋鮮花同蛋糕到場補祝佢前日嘅25歲生日。Stephy早前曾公開指會傳短訊賀Theresa生辰快樂，有記者問佢收唔收到，Theresa就苦笑話：「算啦，我生日都過咗！佢同傳媒咁講已經好有心啦。」
