現年68歲的何守信（何B）本月1日與宣萱隨無綫攝製隊出發，往非洲的埃塞俄比亞拍攝特備節目《活著》，豈料何B上周六在當地一個原始部落拍攝期間叉錯腳拗柴，導致右腳腳踝嚴重骨折要動手術，要即時返港就醫。昨日傍晚何B返抵香港，他指當地醫院設備不足，連輪椅也沒有，只為他注射了抗生素。
何守信本月8日在距離埃塞俄比亞小鎮Turmi約5至6小時車程的原始部落拍攝無綫節目《活著》外景，由於當時路面凹凸不平，何B不慎叉錯腳拗柴，即時痛得動彈不得，由於原始部落沒有通訊設備及水電供應，工作人員即第一時間將何B送返Turmi的醫院就醫，照X光後證實右腳腳踝嚴重骨折，醫生更建議他要盡快做手術。節目監製鄧婉媚昨日說：「當地醫療設備唔夠，所以我哋第一時買內陸機票送何B去埃塞俄比亞嘅首都亞的斯亞貝巴（Addis Ababa），然後再盡快安排何B返香港就醫。」她又表示外景攝製隊連何B及宣萱共9人，無綫有為全部工作人員購買保險，她於周六晚深夜時分接獲何B受傷消息後，即聯絡保險公司，並透過國際醫療組織尋求協助。
無綫工作人員小心翼翼攙扶何B坐上平治房車，接載他往九龍聖德肋撒醫院治療。
何B骨折的右腳包上石膏，連腳趾也腫起。
何B於昨晚約6時45分返抵香港，但未見其妻陳麗斯接機。何B在醫療人員及機場職員陪同下坐輪椅出閘，現場見他右腳小腿位置全包上石膏。問何B傷勢如何時，他指一指右腳，然後苦笑說：「你睇我有冇事？」問到意外發生經過，他說：「當時去到一條乾咗嘅河道附近拍攝，我掛住睇稿，咪叉錯腳拗柴囉。嗰度冇醫生冇醫院，隻腳一路腫一路痛，完全行唔到，工作人員就安排部越野車載我去另一個鎮睇醫生，照過X光之後醫生話我斷咗骨，但嗰度係乜都冇，連輪椅都冇，只係同我打咗抗生素。」何B指拍攝外景的地方通訊設備不足，工作人員幾經辛苦才與香港取得聯絡，安排他乘越野車往小鎮Turmi，然後再轉內陸機往埃塞俄比亞首都一間設備較完善的醫院。他說：「我連上飛機都要人孭，首都間醫院好啲，但溝通有問題，醫生話幾嚴重，搵專科同我睇，叫我做手術，話隻腳有瘀血，唔可以積得太耐，否則會影響到其他地方有損壞。隻腳腫得好犀利，行唔到，夜晚痛到瞓唔到。」越講越激動的何B續說：「我咁大個人第一次斷腳，唔好意思，自己百密一疏，一個唔小心影響咗進度，希望可以追番。嚟緊要去北京同馬來西亞，自己個心都好想去，但唔知得唔得，今次去唔到肯雅都覺得好可惜。我腳眼位斷咗條細骨，腳趾都腫晒。」問他能否冲凉時，他表示只能抹身，然後打趣問記者：「我個身有冇味呀？」
何B隨即在無綫監製鄧婉媚等人陪同下往九龍聖德肋撒醫院求醫，經檢查後，鄧婉媚接受訪問時說：「好在之前（在非洲）打咗石膏冇移位，但原來有兩條細骨斷咗，有啲皮膚壞死咗，都好嚴重，為免惡化，聽朝早7點幾做手術。」問到何B的家人有否陪伴在側時，她說：「佢屋企人喺晒度，會通宵陪佢，佢太太陳麗斯都喺度陪佢。」此外，節目監製鄧婉媚被問到何B今次受傷會否影響拍攝進度時，她說：「原定何B同宣萱今個月1號到13號去埃塞俄比亞拍攝，13號徐子珊就會出發去肯雅同何B會合拍到22號，家宣萱答應頂替何B去肯雅拍，不過因為當地天氣太熱，宣萱同好多個工作人員都有啲唔舒服，我要幫佢哋補充藥物同日用品等物資，等徐子珊出發時帶畀佢哋。至於下個月北京周口店同沙撈越就未知何B去唔去到。」
