LG全高清iDTV再劈價2成

呢排啲全高清iDTV（內置數碼廣播接收器薄屏電視機）嘅競爭好鬼激烈，各品牌輪流出新機，啲價位一成一成咁跌，咪話唔得人驚。好似韓國LG出咗全新200Hz iDTV（圖），影像傳輸率比一般全高清iDTV高三倍，反應時間2.2微秒，都算係高階產品，播放啲快如時速200公里極速飛馳嘅一級方程式賽車，動作畫面都好流暢咁展現出嚟，冇殘影，冇窒格。

AQUOS出新系列呢批LG新機大約4月推出市面，啲零售店即自動減價逾一成促銷。廠方最近再自行出面劈價，以42吋屏幕計，由原價$17,800，減到$13,800，減幅22%，再送多一部價值$2,380嘅09年新款22吋節能薄屏電視22LH20R，如果計埋呢條數，減幅成36%。真係賤物鬥窮人。LG嗰頭減價，聲寶就公佈推出全新別注版碳黑AQUOS G77系列全高清iDTV，size分52吋、46吋同42吋，發言人話，屏幕made in Japan，產自日本龜山廠房，規格係50000：1嘅動態對比度，加埋100/120HZ嘅雙倍掃描處理器，令動態畫面更加流暢。定價以42吋為例售$16,800。咦，呢個價位好似貴咗啲喎。其他品牌嘅新機同樣42吋，都係賣$13,000至$14,000左右，佢個價，當然要還價啦！根據小妹嘅格價經驗，走去旺角有電器街之稱嘅西洋菜南街啲電器店壓吓價，隨時平兩三千蚊，仲要記得叫sales送埋HDMI高清線、清潔套裝喎！