讀咗呢個course ，有唔少健身中心會承認呢個資格，好似mYoga 係其中一間。
潮流興做gym ，坊間好多健身室成日爆滿，對健身教練同指導員嘅需求有增無減。有見及此，僱員再培訓局同香港職工盟培訓中心，搞咗個全新嘅「健身指導員證書課程」，免費有得讀、有津貼兼有工轉介，暫定喺8 月3 日開課，啱啱接受報名，中心發言人葉先生同我發錢韓講：「只要中三程度、失業或待業人士，仲要經過面試及體能測試，就有機會入讀！每班名額約25 位，課程內容包括壓力處理及鬆弛技巧介紹、基礎運動科學、健身器具及機械的應用等，訓練期為132 小時。」因為個course 係新開，所以仲未知津貼會有幾多。
職工盟培訓中心發言人葉先生表示首次舉辦課程，主要target 一班有興趣入行嘅年輕人。
不過，完成課程後，有工作轉介，會安排學員到各大健身中心、纖體中心及私人會所，任職健身指導助理，負責指導客人儀器使用，及協助健身教練指導客人健身步驟等，起薪點約為$6,500 至$8,000 ，表現良好有機會晉身為健身指導員或者健身教練，月薪為$8,000 至$9,500 。如果學員想自己搵工，唔少大機構都承認呢個資格，好似mYoga 發言人杜先生話：「我哋公司人事部如果要請健身指導助理，有咗呢張『健身指導員證書課程』文憑，會係其中一個考慮因素。」市面呢類course 學費最少要$3,000 ，家免費有得讀，咪錯過！
健身指導員證書課程
查詢電話：2332 9368
