美容師訓練課程長開長旺，逆市做美容大有潛質。
無論個市淡定旺，女人護膚扮靚點都唔少得，除咗坊間大小美容院一直有請人，連職工盟發言人葉先生都話，職工盟培訓中心舉辦嘅美容課係其中一個最快爆滿嘅course ！佢哋嚟緊會再舉辦初級美容師證書課程，內容包括基礎化妝技巧、按摩技巧及美容儀器認識等，每班名額約25 人，公開報名唔夠1 個星期已經超過50 人報名！葉先生話：「呢個課程好受16 至25 歲嘅女仔歡迎，入讀條件好簡單，年齡只要係15 歲或以上，必須為失業或待業人士、學歷喺副學士或以下就可申請，費用全免，而津貼最高可以有約$2,150 。申請人必須經過面試，想睇吓啲申請者係咪真係有興趣從事美容行業，如果佢哋嚟面試只係話想攞多張cert.傍身，做乜都冇所謂，咁就唔夠誠意啦。讀完出席率超過80%，我哋會安排就業轉介佢哋去做見習美容師等工作。」即日開始報名，預計4 月尾或5 月頭開班。
畢業後一般係做美容助理或者見習美容師，月薪連底薪現時都有約$6,500 至$7,500 ，啱啱讀完呢個course 嘅甘小姐，九龍灣纖之美美容中心就請咗佢做美容師，月薪有$7,500 。雖然好快爆滿，但葉先生話呢個course 會一直開辦落去，一滿額就會開第二班，有興趣嘅朋友要keep 住留意！
查詢電話：2332 9368 （油麻地職工盟培訓中心）
