睇完地產，佢買咗幾本雜誌，然後發現有記者影相，立即扁嘴，但冇黑面爆粗，都算係咁咯！
幾時都話香港人係善忘嘅，呢排娛樂圈立立亂，先有栢芝隔空狂轟Edison ，中間有阿嬌喊住復出，之後再殺對迷幻情侶關楚耀同衛詩。個個輪住上娛樂版C1 頭版外，連A1 都上埋。相比之下，倪震臨老「孔雀開屏」即時冇人記得。
全港記者周身唔得閒，倪震見冇人再響樓下等佢，前幾日就乘機出嚟鬆鬆骨。媽咪姐見佢輕鬆到行路都彈吓彈吓，同之前頭耷耷個死狗樣完全兩回事。
之後佢行過馬路見到地產舖，仲停低腳係咁𥄫，似乎有心搵竇搬。
倪震有搬屋念頭，媽咪姐都覺得係好事，事關佢咁鍾意新鮮感，老婆冇得換，轉轉環境過吓癮都未嘗不可嘅！
頭戴cap 帽嘅倪震，響地產舖門口睇樓盤睇足十幾分鐘，唔知係咪想趁低入市？
之後佢一口氣跑返去金山花園，身形明顯脹咗幾圈嘅佢，身手都算敏捷。
