一過農曆年啫，娛樂圈嘅緋聞就層出不窮，估唔到連陶大宇都嚟湊熱鬧，明寸舊愛郭羨妮係蕩花。
唔知大家仲記唔記得，前年陶大宇同郭羨妮因拍《學警出更》而撻喺，最後搞到大宇同太太阿寶（黃慧寶）離婚，結束17 年感情。當時外界嘲諷郭羨妮係「狐妮」，大宇仲情深義重咁講：「人哋係好女仔嚟㗎，你哋唔好搞人哋啦！」維護郭羨妮到出面。
陶、郭兩人07 年因拍《學警出更》撻喺，大宇仲不惜拋妻棄事業，執迷不悔。
08 年中，重返TVB 嘅陶大宇，重新力追前妻阿寶，大宇仲以「女朋友」嚟形容前妻，「我哋依家關係仲好過以前。」
當時好多人都笑大宇蠢，但大宇都一直執迷不悔。事隔兩年，基本上大家都淡忘咗呢件事，但大宇周二（17 日）出席《掌上明珠》造型，被記者問及郭羨妮牽涉入蕩花事件中時，大宇竟然句句有骨明寸郭羨妮。「我覺得唔意外喎，正常呀，佢太多呢類新聞。」記者再問佢係咪覺得郭羨妮私生活混亂？大宇又答：「我唔知，但上得box （資料庫）都有番咁上下！」之後大宇仲講明唔怕郭羨妮唔開心，「做得藝人唔會咁小器嘅！」
愛嘅反面真係恨？大宇身邊密友話其實當年TVB 「棄宇保妮」，郭羨妮又玩完鬆，事業愛情兩失嘅大宇當然好唔妥。加埋近排同前妻阿寶行番埋，感情好好，所以咪借機會發洩一吓怨氣，又乘機向阿寶表明心跡囉。
唉！陶大宇事隔兩年至醒，真係遲唔遲嘅呀！
被陶大宇數臭嘅郭羨妮，好不屑咁話：「太多人講唔關事嘅嘢，講嘢唔應該唔深思熟慮，去講傷害人嘅說話。」佢仲話對陶大宇「冇感覺」。
