佘：單手都贏你！（設計對白）廖：我拍西片唔得閒啫！（設計對白）去年十月阿佘同廖碧兒雙雙出席時裝店活動。
外傳爛玩佘詩曼頂唔住悶棍鄭嘉穎，導致兩人分手，這原來是無線悉心安排的煙幕。
去年個人收入高達千二萬的阿佘，打破無線經理人部收入紀錄，技術性擊倒去年稱霸收入龍虎榜冠軍、最識冧老細密密做的廖碧兒。搵得多，得寵指數相對愈高，即使去年爆出鄭嘉穎撇周麗淇搭上阿佘的緋聞，無線索性食住個勢，將「佘穎」塑造為情侶檔搵更多，點知鄭嘉穎要求多多唔願做，如意算盤打唔響，唯有假傳分手消息「拆散鴛鴦」，各自搵食。
一月一日阿佘先到荃灣廣場倒數，五個小時後再坐車到廣州出席兩個樓盤活動。
花旦內鬥
無線花旦除了鬥靚、鬥身材、鬥演技，還要鬥搵得多，事關收入排行直接影響得寵指數，當中以一姐佘詩曼同「咪霸」廖碧兒競爭最激烈，○七年廖碧兒就贏個馬鼻奪冠。
貴為一姐兼視后的阿佘當然唔輸得，去年發力急起直追。早年憑《金枝慾孽》成功開拓大陸同東南亞市場，加上○七年在中央台播出的重頭劇《歲月風雲》大收，令阿佘成為無線花旦中最紅、叫價最高一人，廣告價最低消費一百萬起。
收費唔平，但一樣有價有市。去年阿佘便接下四個大陸新廣告，加上大量剪綵、登台，賺「人仔」賺到手軟，保守估計收入高達一千二百一十萬，是以一眾小生花旦爭住踩過界做歌星，大把路數的阿佘卻唔志在。
毋須花時間出席樂壇頒獎禮，阿佘在剛過去的除夕元旦抓緊搲銀良機，連踩廿四小時，於香港及廣州出席三場活動，輕易袋五十萬。
原本無線想幫嘉穎飛甩周麗淇（小圖）事件補鑊，安排他與阿佘做情侶檔。（《忽然1 周》圖片）
周麗淇
阿佘同林峯因為《歲月風雲》在大陸中央台熱播，令到他們狂賺人仔。
廖碧兒同陳豪之前唔介意情侶，經常拖手出席公開活動，合作易話為，儲落唔少客。
大比數拋離
面對阿佘後勁凌厲，上屆收入盟主廖碧兒雖然保持密密做，但○八年埋單僅賺六百萬，被阿佘大比數拋離，慘敗原因除了欠缺大陸強大市場，叫價不及阿佘高，加上同無線尚未傾掂續約，雪藏期間成年無劇拍；去年十月，又離港四個月到加拿大與Maggie Q 合作拍荷李活電影《The King of Fighters 》，錯失黃金檔賺錢良機，收入人氣同步下滑。
「其實廖碧兒向來都好識做，要佢性感少少跳吓舞都唔會托手踭，個價收得亦唔算好貴，有時仲有價講，所以一直客源充足；至於阿佘雖然唔似廖碧兒咁多元化，但係孭住無線一姐同視后個名已經夠值錢，好多時價錢比廖碧兒高出一倍，同埋佢喺廣東沿岸一帶真係好紅，開得貴一樣有客爭住要。」業內人士說。
（《蘋果日報》圖片）
（《蘋果日報》圖片）
無線下令拆檔，上月中鄭嘉穎出席公司舉行的廣告客戶活動時，阿佘的位置改由鍾嘉欣頂上。
鄭嘉穎的function 價高企，但出席活動時卻企棟棟全無表情。（《蘋果日報》圖片）
近年無線力谷旗下藝人出外搵快錢，上月出席客戶活動時樂易玲便向王晶力sell 陳茵媺。
被迫分手
至於小生方面，由去年飲恨視帝寶座的林峯穩佔第一位，鄭嘉穎則十大不入。其實每逢有客搵上門，得寵鄭嘉穎均獲「優先提名」，但礙於他經常唔願配合客戶要求，又堅持以靚仔形象示人，導致生意淡薄。
去年九月，鄭嘉穎撇甩拍拖五年女友周麗淇改嗒阿佘，被冠「賤男」稱號，無線為保親生仔，刻意塑造阿佘同鄭嘉穎成為熒幕情侶，希望藉此幫鄭嘉穎補救形象，並食住情侶檔賺多筆。公司出盡辦法，奈何鄭嘉穎唔配合，開天索價，又講明唔會配合做出親密動作。無線如意算盤打極唔響，一單生意都接唔成。
為免阿佘被麻煩鄭嘉穎拖累，無線唯有改變策略，將二人「拆散」，放風指他們分手，以後各自各搵食。實則二人依然打得火熱，只是為「錢途」著想，發展地下情。
整晚被鍾嘉欣mark 實的鄭嘉穎，與阿佘難得走近，但卻即時彈開，以示避嫌。對於兩人分手的傳聞，阿佘四
撥千斤笑指拍完《法證先鋒》即時分手，但二月開拍《攻心計》便再度復合。
印錢五強
近幾年無線積極開拓大陸同東南亞市場，多部劇集成功殺入其他市場，令旗下藝人賺完港幣賺外幣，相對令他們收入激增。
第一位 佘詩曼
廣告：華生堂果汁（大陸）$100 萬
卓爾珠寶（大陸）$100 萬
媚蘭護膚品（大陸）$100 萬
纖體公司（大陸）$150 萬
雅芳婷（中港）$120 萬
活動：香港（$8 萬×20 個）$160 萬
大陸及東南亞（$15 萬×20 個）$300 萬
海外登台：$18 萬×10 場$180 萬
合共：$1,210 萬
第二位 林峯
廣告：依波路手錶（中港）$100 萬
眼鏡（大陸）$60 萬
活動：香港（$6 萬×40 個）$240 萬
大陸及東南亞（$10 萬×35 個）$350 萬
登台：$15 萬×12 場$180 萬
合共：$930 萬
第三位 廖碧兒
廣告：必瘦站$80 萬
P&G 系列$50 萬
PaPa Jelly$20 萬
賽馬會愛彼錶女皇盃$20 萬
活動：香港（$5 萬×40 個）$200 萬
海外（$8 萬×10 個）$80 萬
電影：《The King of Fighters 》$80 萬
登台：$10 萬×10 場$100 萬
合共：$630 萬
第四位 陳豪
廣告：史雲遜護髮中心$50 萬
得果定喉糖$60 萬
寶翠花園（大陸）$80 萬
遠東蘋果休閒服$100 萬
活動：香港（$6 萬×20 個）$120 萬
大陸及東南亞（$9 萬×10 個）$90 萬
登台：$12 萬×5 場$60 萬
合共：$560 萬
第五位 黃宗澤
廣告：眼鏡代言人（東南亞）$100 萬
現代經典婚紗$20 萬
電影：《大四喜》$30 萬
活動：香港（$5 萬×23 個）$115 萬
大陸及東南亞（$8 萬×8 個）$64 萬
登台：$10 萬×15 場$150 萬
合共：$479 萬
Out
Out
郭晉安與胡杏兒之前都名列頭五位，但去年郭晉安掛住湊仔減少工作，胡杏兒沒有代表作，所以雙雙跌出五強。
