2R 成員Rosanne 和Race 很喜歡聖誕節,她們正向公司請假,希望返新加坡與家人一同歡度佳節。原來2R 讀書時沒機會慶祝聖誕,皆因她們要在街邊擺檔賣聖誕帽和飲品賺錢,今年她們最想跟一家人共享聖誕大餐。
聖誕節是普天同慶的節目,2R 日前接受訪問時卻透露她們入行前要在街邊擺檔賺錢,Race 說:「爸爸唔係咁重視呢個節日,於是佢提議我哋擺檔賣聖誕帽同飲品賺零用錢,當時入貨set 檔都係我哋三姊妹一手一腳做晒。」
遊客爭相拍照
2R 的父親(左)是開明一派,他鼓勵女兒擺街邊,從中汲取工作經驗。資料圖片
Race 記得當時三姊妹齊齊穿上聖誕女郎裝擺檔,吸引不少遊客幫襯,還賺得五位數字收入,她說:「好多遊客見到我哋著晒聖誕衫,幫襯完就同我哋影合照,有啲仲問我哋拎電話。其實每年生意都唔錯,因為過時未有便利店,好多店舖9點就閂門冇嘢飲賣,咁就好多人幫襯我哋。」今年聖誕,Rosanne 已計劃為家人炮製一頓聖誕大餐,她會準備火雞和聖誕蛋糕,她說:「因為Race 未食過一餐正式嘅聖誕大餐,所以就算冇假返唔到新加坡,我都會同妹妹喺香港食聖誕大餐,仲會叫埋啲朋友一齊慶祝。」
儲錢買車氹父
聖誕節將至,2R 已計劃好與家人共享聖誕大餐。
Rosanne 又為家人預備了聖誕禮物,與妹妹夾份買了一隻Chanel 星形戒指給媽媽,至於爸爸的禮物仍未儲夠錢,她說:「爸爸嘅dream car 係林保堅尼,我哋三姊妹一直儲緊錢,希望出年聖誕送到畀佢。」Rosanne 期望有一年能夠與男友到芬蘭的聖誕老人村過白色聖誕,她說:「聖誕係一個好sweet 好warm 嘅日子,如果去到一個落雪嘅地方,加埋男友嘅溫暖就已經好足夠。」採訪:李珮洳 攝影:葉君海化妝:Alvin Goh 場地提供:太古廣場 服裝提供:I.T
Race (右)和Rosanne 透露入行前的聖誕,她們總愛在街邊擺檔賺零用錢。