首爾的購物區明洞，等如香港的銅鑼灣，係購物飲食集中地，亦係旅行團必到地點，即使跟團都有機會掃貨！
金融海嘯下，各大旅行社都推出大劈價旅行團，$699就可去華東6天遊，連去歐洲過白色聖誕都唔使$10,000！
但想玩得最抵，除了睇團費，更要睇旅行目的地嘅「紙水」。韓圜由今年頭1港元兌120圜，跌到現時190，等於原本已經比香港平的化妝品、高麗參、頂級牛肋骨等全部再打7折，堪稱今個聖誕最佳旅遊地點。
Iris 、Davy
韓國掃貨先鋒
記者甫到明洞掃貨區，便碰到港人情侶Iris 和Davy ：「韓國護膚品同化妝品真係超抵！尤其Skinfood 等於香港價6折，仲有好多sample 送，朋友都託我哋掃貨。其他韓國牌子都比香港平一大截，我哋唔經唔覺掃咗4袋，使咗3,500蚊港紙，不過今次預算係7,000蚊，應該仲有排掃貨！」
韓國超筍價 必掃5大品牌
好多韓國牌子嚟到香港即變矜貴，其實在本土平均唔使100蚊港紙已有交易。即使韓圜未冧價前，嚟掃貨都比香港平，依家就簡直係傾銷價，加上韓國化妝品店送試用品非常手鬆，好多時買1件貨品送3件試用品，令你覺得唔買嘢真係對唔住自己。
Water Sleeping Pack 海嘯價$89（香港價$190）
Snow Crystal Dual Foundation SPF22PA+海嘯價$184（香港價$280）
LANEIGE
必掃之選係人人用過讚好的Water Sleeping Pack ，基本上入去嘅遊客每人起碼掃四五樽。每樽只係幾十蚊，當手信最啱。
雪花秀水生精華 海嘯價$570（香港價$980）
雪花秀
在香港售價屬於中上，產品閒閒哋要近千蚊，但在老家就大貶值，尤以機場Dutyfree 的價錢最抵，差不多是香港的6折。好似呢支精華液，比香港平足410蚊，雖然當時我的韓圜已用盡，都忍唔住碌卡買！
覆盆子高效漢方乳液海嘯價$73（香港價$270）
Skinfood
標榜天然的Skinfood 在韓國的價錢低至香港價2折左右，是熱門掃貨目標。最抵讚係派試用品時夠手鬆，當日只買咗一支面霜，竟然俾咗10件試用品（右圖），上至乳液下至原子筆都有，真係開心死！
美思叡炫瑩潤乳霜海嘯價$62（香港價$168）
Vita BB Cream 海嘯價$72（香港價$180）
Missha
因價格相宜，大受少女歡迎的Missha ，大熱產品BB Cream 響祖家更加平，唔使一舊水有交易。
熟地黃當歸面膜10片海嘯價$105（香港水貨價$200）
骨膠原面膜10片海嘯價$53（香港水貨價$100）
The Face Shop
去年The Face Shop 從香港撤退，令不少fans 甚為惆悵。今次去到韓國，見佢最出名的mask 有更多選擇，平均每塊5-10蚊，極抵買！
連骨生牛肋骨$147
其他抵食x 買x 玩推介
連骨生牛肋骨
明洞最出名的景福宮，用的是韓國高原牛，肉質結實，肉味濃郁，和香港一般韓燒用的美國或澳洲牛有天壤之別。而且它用上炭爐燒烤，令肉味更有層次感。建議只沾奉上的粗鹽伴吃，更能感受到韓牛的粗獷味道。
景福宮
地址：中區苧洞1街88-5（明洞聖堂旁）
電話：02-2266-2004
正官庄天字參30支300克$1,000（香港價約$3,000）
批發價高麗參
去韓國點可以唔買高麗參﹖極力推薦你去人參店集中地祭基洞京東市場購買，該處係首爾最大的藥材市場，價錢平均比市面平20%，加埋韓圜跌價，就差不多係港價的6折。不過該地唔係遊客區，若你唔識韓文就溝通唔到，建議有心人在香港做定功課，搵定目標高麗參才去買。
祭基洞京東市場
地址：東大門區祭基洞
交通：地鐵祭基洞4號出口行3分鐘
全球最斜過山車
香港旅行團較少去的愛寶樂園Everland 係我誠意推介的景點，啱晒一家大細，除咗有獅子、老虎、企鵝等動物外，仲有大量機動遊戲，可玩足全日。最吸引係今年3月登場的全木製過山車「T Express 」，最高斜度達77.1度，夠晒刺激！
愛寶樂園Everland
地址：京畿道龍仁市蒲谷面前 里310
電話：031-320-5000
入場費：任玩套票成人$184，小童$136
交通： 首爾地鐵江南站6號出口乘5008號巴士直達，車程40分鐘。
點樣去掃貨
LANEIGE 、Skinfood 、Missha 和The Face Shop 地點：明洞2街
交通：地鐵明洞站6號出口直行1分鐘即到
雪花秀地點：仁川機場Dutyfree
聖誕激筍旅行團推介
近排國際局勢動盪，香港旅行社或會因經濟唔好而隨時執笠，要用海嘯價去旅行，都係跟團最穩陣。以下精選咗7個激抵聖誕團。
掃貨攻略
LANEIGE 及Skinfood 都會大派免費試用品，可先取回酒店試用，合心水的話翌日正式入貨。
睇唔明韓文可嘗試用普通話溝通，遊客區的店舖多數有通曉普通話的店員座鎮，反而英文不大流行。
在有Tax Free Shopping 標誌的商店購物滿韓圜30,000，可要求店員填寫退稅申請表，憑表到機場向海關出示貨品、收據及蓋上「CUSTOMS STAMP 」印章後寄艙，再到退稅櫃位辦手續，即可退回貨價7%。建議最少預半小時處理。
建議在韓國機場的兌換店兌換韓圜，兌換價最高，比香港機場約高2成。
鳥巢
北京5天精華遊$1,599起
一次過去齊鳥巢、水立方、長城、頤和園等，最啱首次遊北京人士。
航班：香港快運
酒店：伯豪瑞廷大酒店、諾富特三元酒店或新世紀日航酒店
出發日期：12月逢一、三、五出發
查詢：27222888新華旅遊
北投溫泉
台北溫泉樂園4天遊$2,249起
遊九份、北投椰林溫泉會館、六福村主題樂園、野生動物園等（全部包入場費），最啱只想喪玩唔愛去shopping 的你。
航班：國泰
酒店：1晚5星級國賓或馥敦大飯店，2晚4星級豪景、天成或馥都大飯店
出發日期：即日至12月31日
查詢：25198088星晨旅遊
杭州
華東超值6天遊$699起
遊遍杭州、蘇州、無錫、南京、上海，仲去埋朱家角古鄉水鎮。
航班：香港快運/ 中國東方航空
酒店：4星級華怡賓館、金沙大酒店、瑞華大酒店、金龍華庭大酒店及泰龍大酒店
出發日期：即日至1月31日
查詢：25198088星晨旅遊
小樽
日本北海道5天遊$5,999起
去留壽都/ 登別滑雪場、野外攀山雪車場、登別地獄谷、小樽運河、北海道最大Factory Outlet 。全程以玩雪賞雪為主。
航班：日本/ 全日空
酒店：1晚登別/ 洞爺湖/ 定山溪溫泉飯店，2晚小樽Sonia / 札幌Washington / 東急Inn / 後樂園/ APA Resort
出發日期：即日至1月31日
查詢：29288882永安旅遊
High One 滑雪場
韓國破冰船6天遊$3,299起
玩忠州湖破冰船、High One 滑雪場、江原道度假村俱樂部、丹陽大明度假村、樂天世界。3,000蚊左右有得坐破冰船，更可全日滑雪。
航班：大韓/ 韓亞/ 國泰
酒店：1晚原雪嶺High One 滑雪度假村、1晚丹陽大明度假村或北歐貴族風情度假別墅、2晚市區五星級酒店
出發日期：12月17、20至30日
查詢：82002299美麗華旅遊
倫敦
歐洲白色聖誕8天遊$9,499起
遊遍英國、荷蘭、比利時（布魯塞爾）、法國（雲姆斯香檳區、巴黎）。唔使$10,000可以過白色聖誕，問你點忍？行程更加插親手調校及品嘗香檳的環節。
航班：英國航空
酒店：Novotel London West / Tulip Inn / Holiday Inn / Forest Hill La Villette
出發日期：12月1日起
查詢：82002299美麗華旅遊
加州迪士尼
美國西岸3大樂園7天$7,299起
玩盡洛杉磯、拉斯維加斯、環球片場、迪士尼樂園及迪士尼「探索加州」樂園、Premium Outlet 。包晒所有樂園的門票，十個抵！更可去Outlet 狂掃名牌。有得玩又有得買靚嘢，啱晒貪玩愛買嘢嘅香港人。
航班：中華航空
酒店：1晚洛杉磯Wyndham Hotel 或同級，2晚拉斯維加斯River Hotel 或同級
出發日期：即日至1月31日
查詢：27222888新華旅遊
外遊自保3招
1.記得搵持牌旅行社，同埋嗱番蓋上足額印花費的收據。咁萬一旅行社倒閉，都可從「旅遊業賠償基金」中獲得九成團費的特惠補償。即使唔好彩途中遇到意外傷亡，都可得到最高$180,000的財政援助。
2.若你係網上報團，都要記得向旅行社索取蓋上印花的收據，否則有事唔賠㗎！
3.機票加酒店的旅遊套餐、郵輪旅遊都屬於旅行團，同樣收據必須蓋上印花才有效。
