中央救市，一招接一招，內房同鋼鐵股成為兩大受惠板塊，股價亦已由低位大幅回升。復星國際（656）表面上係綜合企業股份，但內房同鋼鐵係兩大核心業務，一樣受救市之惠，同類股已升到「
烚烚」，相信佢好快接力而上。先睇鋼鐵股近期嘅表現（由10月底低位到上周五收市），馬鋼（323）升170%、鞍鋼（347）升155%、重鋼（1053）升146%；再睇內房股，升勢一樣咁勁，合生創展（754）升187%，富力地產升180%，而首創置業（2868）同遠洋地產（3377）亦分別有121%同116%進賬。復星又點？期內只係由1.13元彈上2.01元，升幅只有77.8%，明顯落後同業頗多，相信係受其「綜企」嘅形象影響，但有麝自然香，資金一埋位，股價就會飛升。上周五，復星已見有異動，搶上2.01元最高收，升0.13元，升幅近7%，成交亦大增到1600多萬股，開始拋離10日線（1.83元）、20日線（1.88元）同50日線（1.93元）；今個禮拜，10日線可升越20日線，而股價同時升穿保歷加通道頂2.12元阻力，則大局已定，升勢確認，初步可向3元推進。
預測PE 不足4倍
再睇周線圖，股價亦已升穿10周線（1.9元），MACD 亦已出現熊牛入貨訊號，目標係20周線的3元水平。跌得急、跌得多，反彈之時亦會快夾勁，好多內房同鋼鐵股都曾經「大跌之苦」，家下先嘗番小小甜頭。復星情況一樣，亦係跌到過晒龍，去年7月以9.23元上市，上市後最高見15元，今年10月底最低時足足跌咗92%。復星係實力股，即使反彈跌幅的0.382倍，亦唔係太過，股價已可重上6.4元。睇番復星中期盤數，08年（12月年結）的上半年營業額207.8億元人民幣（下同），升45.7%，獲利19.2億元，大升132%，每股盈利30分，升76.4%。下半年情況轉差，保守估計盈利只有10億多，令全年有30億元，每股盈利47分，約53港仙，預測PE 只係3.8倍，股價確實大有上升空間，以初步目標3元計，PE 亦僅5.6倍。郭兆誠
