「香港股神」李兆基的新抱徐子淇去年為他誕下「觀音託世」孫女李晞彤時，股市暢旺，子淇食燕窩、湯水補身。子淇三年抱兩，現時又懷孕3個月，適逢金融海嘯，老爺身家大縮水，今次子淇卻愛吃漢堡包、雪糕、腸仔即食荷，又喜以麥當勞餐當補品，認真切合時勢！
千億新抱徐子淇懷孕3個月，昨日她以智行基金會大使身份在尖沙嘴出席韓國護膚品牌雪花秀活動，答謝大會捐善款及將本月份旗下面膜收入捐給智行基金會，同場還有鄺文珣、林峯和趙式芝。
「教彤彤錫BB 」
懷了第二胎的徐子淇昨日一身Roberto Cavalli 恤衫黑裙、七彩釘花背心遮掩微隆的腹部，她答謝各界支持說：「多謝大家送暖，溫家寶都有去探過我哋智行嘅小朋友，內地都好支持。」之後她坐在椅子上接受訪問，她謂未知腹中胎兒性別，她說：「下個月照就知，我仔女都好，冇所謂，而家開始教彤彤（女兒李晞彤）要錫BB 。」徐子淇謂體重已增加10多磅，但她不會減肥戒口，她說：「最緊要身體健康，我做過實驗，之前生女都冇戒口，鬼佬書都冇教。」子淇謂除了芒果外，日日食雪糕等孕婦最忌的生冷食品，她說：「唔知呢，陀呢個好鍾意食立雜嘢，好似漢堡包、雪糕，有時夜晚肚餓，老公會煮公仔荷加兩條腸仔畀我食，好sweet 。」問她有甚麼補品，她笑說：「麥當勞咋！」子淇又謂每晚會念觀音經，問到老公李家誠心情如何？她說：「兩個人都驚驚哋，因為岩岩去完歐洲、內地出trip ，之後先知有咗，怕個胎唔穩，後來穩咗先冇咁緊張。」她謂老公十分緊張，禁止她著高跟鞋，但她昨日仍穿上高跟鞋。老爺李兆基身家大縮水，問子淇可是有心沖喜？她說：「唔係咁，呢個係天意，我一路都想有，好感激同BB 嘅緣份，我希望生到30歲，可以收到工，而家26歲，仲有4年。」
徐子淇懷孕仍貪靚著高跟鞋，大會即時安排她坐下做訪問。
林峯透露自掏腰包買了100支護膚品，再簽名以雙倍價賣給fans ，為活動籌款。
「錢唔係最重要」
徐子淇（右一）、鄺文珣（右二）和趙式芝（左一）等捐錢為內地愛滋孤兒助學。
子淇謂金融海嘯令她募捐有困難，現時智行捐助8,000位愛滋孤兒上學，有記者指她為李家添男丁，老爺肯定開心捐巨款，她說：「生唔生仔都會捐，身邊雖然好多朋友跌咗好多身家，但錢唔係最重要，係開心嘅屋企同健康最緊要。」她謂自己陀晞彤時都買了股票，但現時不清楚損失多少。採訪：Jessica Ngan攝影：Chan Chi Lam
「千億新抱」徐子淇懷孕3個月，她笑言食快餐雪糕當補品。
