求驗客手記：長坐冷板 老婆離棄 軍刀雙失，慘！
噚晚飯局有人講起舒夫真高，人人聽到一頭霧水，仲以為佢同大家玩集體回憶！如果唔係我求大俠上個星期睇咗「意西風情」，講起佢啲紋身，幾乎唔記得咗呢個人嘅存在！唔講唔知，家陣佢球場失意，仲有傳連老婆都唔理佢，變咗把雙失「軍刀」。
老婆唔肯返意大利團聚
設計圖片及對白
呢位前歐洲足球先生，喺AC 米蘭頭幾年要風得風，仲帶領烏克蘭國家隊殺入06世界盃8強！佢個美國籍嘅老婆姬絲汀，一句話唔鍾意講意大利文，要啲細路仔去英倫學吓做紳士淑女，兩年前就慫恿老公轉會車路士。呢把「軍刀」又真係聽晒老婆支笛喎！但誰不知去到得個桔，摩連奴眼尾唔睇佢，原本一把鋒利無比嘅「軍刀」，變咗生
廢鐵！姬絲汀見老公幾乎坐爛史丹福橋張後備席凳，都有少少內疚，仲向米蘭球迷道歉！只可惜喺倫敦蹉跎兩年，難敵年紀大機器壞嘅殘酷現實，事業走下坡已經無法改變！道歉？咪玩啦！「軍刀」終於有番啲主見，做一次大男人，決意重返發跡地聖西路，紅黑軍團亦唔介意接佢返老人院養老。佢一心諗住又可以大展拳腳，仲叫老婆放心，返到米蘭一切安頓好，就叫啲仔女過嚟意大利。不過世事邊有咁完美
！鬼叫你過陣係都要上「車」咩，而家形勢唔同晒，喺聯賽只踢過１次正選都未算霉，有報道話佢老婆寧願食炸魚薯條，都唔食意大利粉，唔肯搬番米蘭同老公團聚喎！情場球場都失意，30幾歲人先至雙失，慘！
同人唔同命恩沙基獲續約
「軍刀」唔好景，但當年同佢爭正選，口和心不和嘅恩沙基就越老越可愛，前日岩岩同會方續約至2010年，即係喺AC 踢到37歲。同人唔同命，鬼叫人哋基仔過去7年忠於球會，舒夫真高恨都恨唔到㗎啦。
