小妹呢排收到一個幾搞笑email ，內容係話有班人旺角朗豪酒店日本餐廳酒吧Tokoro 入面，就11月4日美國總統選舉邊個勝出拗到面紅耳綠，其中話奧巴馬贏梗Wilson ，同支持麥凱恩Henry 拗得最犀利。最後佢各自拎張信用卡出，話如果自己支持個輸，就要請晒所有Tokoro 酒吧人飲一杯，直至年尾為止。
有效期至年底
遊戲規則係顧客只要去到酒吧叫飲陣，如果係奧巴馬贏，就同職員話「
入Henry 數」，如果麥凱恩贏就話「入Wilson 數」，咁就可以免費飲一杯酒。千祈唔好掉轉呀，講錯要收錢。
小妹收到呢email 都係半信半疑，點會咁大隻蛤隨街跳，輸個條數都幾襟計，會唔會兩條友酒後胡言亂語，酒吧唔認數。我上佢酒吧網睇一睇（
http://www.tokoro.com.hk），真係出個通告，話真有其事，有效日期到今年12月31日。
諗諗，會唔會係酒吧宣傳伎倆，小妹直接打電話去Tokoro 問清楚，接電話酒吧職員譚小姐話係真人真事，唔係酒吧宣傳。Henry 同Wilson 係佢熟客。11月4日美國大選有結果後，顧客每日6pm 至12am 到酒吧，叫飲陣正確講出要入Henry 或Wilson 數，就可以唔使錢飲一杯standard drink ，例如60幾蚊啤酒咁。
