千嬅8吋踭打機變拗柴特務
楊千嬅為亞洲遊戲展2008擔任大使，兼唱主題曲《當女飛俠愛上萬能俠》，為了配合歌曲，其造型也頗花心思，分別有女飛俠機械人及靚女特務look 等，千嬅並要以cool 樣示人，令這個大笑姑婆也要收斂笑容，不過最嗱命的，是要穿上8吋高踭鞋，令千嬅寸步難行，結果論盡的她扭傷腳收場。
楊千嬅最近成為第6屆亞洲遊戲展大使，每年擔任大使的均是天王天后級人馬，如有陳慧琳、郭富城、古巨基和鄭秀文等，而今次千嬅更會唱主題曲，早前她以一個通宵完成新歌MV ，千嬅說：「有份做大使梗係開心啦，因為我好鍾意呢啲造型，MV 造型有女飛俠同靚女特務，好有新意。」
楊千嬅的女飛俠機械人造型十分花心思，尤其頭上髮飾更有特色。
穿上吊帶背心的楊千嬅扮性感女特務，為了添幾分型格，還刻意收起笑容。
傷及舊患搽藥酒
千嬅續說：「不過最嚇人係要我著住對8吋高踭鞋，我一見到對鞋，嘩！乜咁搞呀？著上已經好難行路，如果導演要我跳舞咪慘，所以我著住對鞋練習吓行路，好在導演都錫住我，只係叫我喺原地擺甫士，不過就要轉嚟轉去，估唔到咁都扭傷隻左腳。」原來千嬅以前拍戲左腳曾受傷，今次不慎觸及舊患，所以她完成工作後要回家搽跌打酒。
大笑姑婆扮Cool
另外，在拍攝時因為導演要求要她一臉cool 樣，不過一向有大笑姑婆之稱的千嬅，要忍笑比起著高踭鞋更有難度，她只好裝出一臉嚴肅，當然拍攝時也曾忍不住大笑一番。千嬅對這個靚女特務look 十分欣賞，有同事指她大有條件做邦女郎，千嬅笑說：「我好恨拍一部特務片，我以前拍劇試過練咗半年功夫，食過吓夜粥，而家都大派用場㗎，所以好希望公司開拍一部武打動作片，最好係做特務角色。」撰文：丁寧
楊千嬅穿上8吋高踭鞋拍ＭＶ，結果令她觸及舊患不慎扭傷腳。
