江若琳不停被追問戶口結餘，只好尷尬傻笑。
江若琳早前被踢爆戶口只餘下58元，不過為撐師弟Square的處男EP，她趁公司發放一萬元薪金後即大破慳囊，花費274元購買四張EP，認真唔話得。
江若琳（Elanne）早前因與老闆林小明傳緋聞而成為新聞人物，林小明前妻更力數對方不是，而Elanne亦曾於傳媒面前聲淚俱下澄清，不過傳聞仍然沒完沒了，令Elanne大感無奈，昨日師弟Square在銅鑼灣鬧市為新碟造勢，身為師姐的她也有現身撐場。
剛剛出了一萬元薪金的江若琳，豪花二百多元購買師弟的處男碟。
江若琳送上棉被一張，寓意Square忙到隨車。
迷你個唱唔想請老闆
甫到場，Elanne即表示要買碟支持師弟，隨即被傳媒追問其戶口只剩雙位數存款不足夠買碟，她說：「我出一萬蚊糧！（唔留番錢去旅行？）都OK！朋友請我，咁我都有預幾千蚊食，不過月底先去，依家就忙緊迷你音樂會練歌，有時仲緊張到肚屙添！」問她會否邀請老闆林小明前來捧場，Elanne尷尬地表示要交由公司安排，問到是否不想對方現身時，她說：「呢排係是非時間，都希望避一避！（如果公司邀請老闆，你歡唔歡迎？）唔答呢問題，好敏感！（林太呢）都係交畀公司啦！（同林太見面會唔會尷尬？）唔好再問呢問題啦！都面對好耐，希望件事快告一段落，以後大家焦點放我工作上！」
對於日前羅霖出言力撐林太，直言當今口靚妹很厲害，並堅信Elanne不只一個戶口，似暗寸她講大話，Elanne說：「呢個係事實，我咁耐以都係，我知道藝人個個都要捱，要經過呢時間，不過要講之前都講過晒，所以都係唔答！」至於Square透露他們於推出新碟當日，曾一起到店舖巡視銷情，結果被人發現並要求簽名，令他們非常驚喜。
巡視新碟銷情時被要求簽名，令Square感到非常驚喜。
