颱風海高斯上週四掟咗個90度彎吹襲香港。個風吹得咁刁鑽，真係估佢唔到，上星期二（30日）TVB 搞咗個台慶亮燈儀式，鄭嘉穎為避開緋聞女友佘詩曼，仲快人一步玩海高斯掟彎。
當日嘉穎同情敵吳卓羲，仲有緋聞女友佘詩曼已經企到離行離列，最搞笑係鄭嘉穎企圖避過同姣佘擦肩而過時，竟然海高斯上身嚟個90度急轉彎擦「佘」背掠過，招呼都唔打吓喎。
FBI忍唔住問鄭嘉穎做咩咁cool ，佢話：「唔笑又俾人話黑面，笑又俾人話輕佻。」問佢點解唔同阿佘打招呼，佢就答：「緋聞唔講。」至於吳卓羲就擺明仲好冧佘，「我支持佢（佘詩曼）做『視后』，係咪因為感情分？朋友啫。」撐佘撐出面，嘉穎真係唔好再扮cool 喇。
鄭嘉穎成功避佘後，咁啱又有記者閘住話要同佢影相，雖然佢話自己唔介意同阿佘影合照，但就死唔肯行埋佘身，而靈佘亦醒水即刻彈開。
海高「穎」90°移動路徑圖
明明企正響姣佘後面，咁啱中間有件肥大好姨薛家燕阻碇，嘉穎直線唔行，偏偏要兜過好姨後欄而行，真係估佢唔到。
成功兜過好姨，但「佘港」避無可避始終有最接近距離，走唔甩嘅嘉穎惟有從阿佘身後掠過，不過佢條頸梗晒，隻眼就淨係向前望，連招呼都唔打個，超級身有屎。
嬲三角
吳卓羲、鄭嘉穎同佘詩曼三個當晚排位已經離行離列，同鄭嘉穎隔咗幾個身位嘅吳卓羲，仲要全程面燶燶。女人啫，使唔使呀？
妙殺姣佘
呢日被編排企第二排中間位嘅嘉穎雖然企正黃金靚位，但因為同姣佘嘅戀事搞到佢成晚神不守舍，由於姣佘當晚被安排企喺佢左邊，嘉穎就全晚大部分時間唔敢望右，不過FBI 醒呀，俾我偷𥄫到佢千分一秒目光捕佘，不過當佢發現FBI 後就頭耷耷，睇嚟嘉穎真係要向溝慣仔、淡淡定定啲姣佘學習吓喇。
面對姣佘，嘉穎忍唔住𥄫咗一秒後，就即刻耷低頭再木起個嘴，擺明周身唔自在。
