參加私人教練課程，無疑可提高健身效果，但購買課堂的數目要適可而止。
過去一個月，本刊收到多宗有關California Fitness 的投訴。
他們的銷售伎倆，是睇準客人渴望瘦身的心態，然後死纏爛打逼客買下數以萬元計的會籍及課程。本刊更找到California 的職員爆料，如何氹客不斷開單。
California 在港有十間分店，穩坐一哥位置，但其硬銷手法則經常惹來客人不滿。（關永浩攝）
黃小姐（右）去年在California 購買了一百四十堂課程，至今只用了四分之一。（林志謙攝）
個案一 教練硬銷課程
黃小姐去年在三日之內，於California 簽下近十萬元的會籍及課程，「我好有決心要減肥，見佢喺我屋企對面，所以一口氣買咗永久會籍和百幾堂私人教練課程。」
隨後幾個月，黃小姐因工作繁忙沒時間健身，直至今年四月，她想追回進度，再到California 預約健身教練課程。「每上一兩堂，教練就會話我買的課堂數目唔夠，係咁逼我加錢再買堂。如果唔加堂，教練會即刻黑面，仲會隨時換教練。」
早前，黃小姐的教練離職後，California 沒再聯絡她，「我嘅堂到十月就到期，到現在都沒有教練聯絡過我，打去投訴又無人理，任由我嘅堂蒸發，估唔到佢做生意做到咁差。」
梁先生過度購買私人教練課程，欠下十六萬元債款，差點便要破產。（關永浩攝）
個案二 入不敷支瀕破產
任職文員的梁先生，早前收到California 職員的推銷電話，「佢話有一個十四天免費入場證送俾我，我咪上去睇吓囉。」
「當時場內掛滿氣球，好似好熱鬧咁。職員帶我參觀健身室、桑拿房，我見唔錯，一時心軟咪入會囉。」豈料職員打蛇隨棍上，繼續帶他去做體格檢查，謂他下肢過瘦，未能有力支撐整個身體，游說他買下近二百堂拳擊及器械訓練課程，但期限只有一年。按此推算，梁先生要在一年內年中無休，每一點八天便要接受訓練，方可用畢課程。
直至收到月結單，梁先生才識驚，「竟然買咗十六萬元，我月入得七千元，就算分期付款，每月都要還七千蚊，根本負擔唔到。我有諗過申請破產，好彩屋企人肯借錢，我先唔使揀破產咋。」
員工爆料 「逼客繼續買！」
記者透過電話與黃小姐的California 健身教練Henry （化名）聯絡，他即死撐說身不由己，「為咗交足單，客人就算未上晒堂，我哋都要逼佢繼續買，因為唔夠數，公司有些人說話就好難聽。有時聽到嘅客話自己肩頸痛，我哋就乘機介紹拳擊訓練，話好多脊醫都轉介客人來，當做物理治療囉。」
以California 每堂私人教練課程收費五、六百元計劃，教練每教一小時，便可拆賬二百元，「一日上十堂的話，一個月未計其他佣金已穩袋六萬元，冇一份工可以賺咁多錢㗎。」所以Henry 即使知道不道義，也做了一年多才辭職。
另一California 員工亦爆料，每逢場內掛滿氣球，店外又舉行大抽獎的時候，客人就更難甩身，因為那正是公司月底谷數的大日子，「平時客人唔簽單，傾一個小時營業員都肯放佢走。但一到呢啲時候，所有職員都要由朝做到晚，一見到嘅阿太或睇落易心軟的人，就起碼講足兩小時才放佢走。」
專家話 健身教練亂吹水
家庭醫生關嘉美表示，從未聽過「下肢過瘦」一詞，只不過是健身教練氹客的綽頭而已。至於拳擊改善體質一說，關嘉美指「凡係適量的運動都可以改善體質，但嘅健身教練係咪教得正確，又係另一回事。」
香港浸會大學體育學系助理教授雷雄德指，找健身教練幫手訓練未嘗不可，但正常人每月學十堂已經很足夠，「根本唔使買咁多，如果唔係只會浪費金錢！」
雷雄德表示，健身中心為增加收入，會落力游說客人購買大量健身課程。（《忽然1周》圖片）
回應 未有回覆
上週五，本刊把黃小姐及梁先生的投訴轉介至California ，惟至截稿前仍未有回覆。（陳菲菲、何家茵）
壹判官
健身中心打正旗號為客帶來健康身體，但無睇清客人需要，就亂推銷課程，此等劣質營銷手法，認真趕客！
