好多年輕人北上創業，對稅制唔熟悉，呢個講座可以幫大家有更多了解。
前一排睇奧運，見到成個北京城企理又繁榮，更加令人對國內市場憧憬。吹水傑就諗住喺廣州創業，但佢就連營商基本稅制都唔知，連乜嘢係國家稅同地稅都唔曉，第二時開鋪洗濕咗個頭，罰錢都有排佢罰！喺廣州越秀區開玩具鋪嘅Sammy ，就曾經因為唔熟稅制，遲交地稅而被罰款。「罰錢固然肉痛，最慘係仲要排隊交悔過書，用足3粒鐘排，真係做少好多生意！」為免其他新手「案件重演」，9月10號喺北角就有個「中國營商環境講座2——中國稅務實務」嘅講座，專畀18至35歲持有香港永久居民身份證嘅青年參加，由特許公認會計師公會（ACCA ）代表主講，詳細講解中國稅制概況，例如喺廣州開鋪，基本要交國家稅同地區稅；開鋪前當地稅局會有專人審查個人資料，呢啲專人面試時一啲應對技巧、又會解釋中小企大概徵稅範圍及稅率等。發言人何小姐又會講：「呢個講座特別適合一啲諗住喺國內任何城市開鋪嘅創業青年，名額大概100位，費用全免，click 入
http://yen.hkfyg.org.hk/ybhk/new/training.htm做登記留位就ok ，先到先得。」想喺國內開鋪暢通無阻就聽吓個talk ，唔好「犯太稅」喇！
中國營商環境講座2——中國稅務實務
主辦機構：香港青年協會
時間：9月10日（星期三）7:30pm-9:30pm
地點：北角英皇道679號太古坊濠豐大廈28樓
費用：全免
查詢電話：31137999
