自拍任睇
何雯娜平時同其他19歲女生冇分別，最愛自拍cutie 照，又會去影吓沙龍留念，執執啲衣著，其實同台灣班美眉冇乜分別。
今屆京奧中國隊奪金牌破晒紀錄，運動員變萬人迷，週五（29日）來港表演，3萬張飛3個鐘賣晒咪話唔顛喪。
所謂江山代有人才出，郭晶晶跳埋今劑嫁人，好在有個「新伏明霞」陳若琳頂住，仲有被稱為最索冠軍嘅蹦床金牌何雯娜，加埋體操選手江鈺源笑容嗱你命，個個有潛質學晶晶嫁入豪門。
女嘅受歡迎，男都唔輸蝕，有阿Sa 蔡卓妍開晒口嗒糖嘅李小鵬固然係女性恩物，連體操小將鄒凱都成為嚫妹熱捧對象，成名有錢又有女，難怪佢哋奪金搏晒命。
何雯娜 19歲 蹦床
何雯娜（右）影全家福都要無厘頭著晒婚紗，貪靚原來有遺傳。
被喻為「中國最美奧運冠軍得主」的靚女蹦床冠軍何雯娜，港仔話佢似初出道時的清純張柏芝，又似台灣女子組合S.H.E 入面的Selina ，多人讚，娜妹口口聲聲話自己「是一個不太自信的人，對於長相有點自卑」，不過佢自卑得嚟又唔多怕醜，將自己的私房照放上blog 任各地網友朝拜，似乎幾自戀。
帶仔私奔
除咗自戀，原來何雯娜仲幾反叛，4年前得15歲時曾經同男友仔私奔去廣東，半個月後娜妹主動現身申請退隊，好在當時的教練馬軍陽叫娜妹男友幫口勸掂女友留隊，娜妹先有今日成就。
15歲就私奔敢愛敢恨，呢方面又真係幾似柏芝喎！
有傳俾中國舉重金牌得主廖輝狂追，何雯娜唔出聲不過廖輝就主動澄清話：「我不認識何雯娜，不知為何有這些新聞。」此地無銀咁款！
捱過窮，江鈺源睇錢睇得好緊，佢阿爸就會用「扣獎金」必殺技迫佢練習，難怪佢
住啲錢影相咁開心啦。
99年時年僅7歲的江鈺源被發現好有潛質，呢個高難度動作小朋友咪亂學呀！
敗家出頭 江鈺源
16歲 體操
今屆中國女子體操，本來人人期望「程菲跳」為國爭光，可惜程菲一時失手贏唔到金牌，加上俾人話似欣宜，全人類立即轉軚捧kawaii 江鈺源。
金牌慳妹
16歲的江鈺源，身高只有140cm ，人仔細細但相當識諗。4歲就被送去練體操的江鈺源出身貧窮家庭，全家靠江父揸的士維生，不過江鈺源曾經因為亂買嘢而爭人4百蚊冇錢還，搞到要父母拎晒畢生積蓄幫佢還債，全副身家都係四百蚊咋陰功。
好在從此江鈺源開始生性，今屆京奧俾佢一鋪博到，之後養起全家都得啦！
單親博
陳若琳
16歲 10米高台跳水
贏得女子10米雙人同單人跳水的16歲陳若琳，單眼皮cutie 樣更令佢成為「新伏明霞」同「郭晶晶接班人」，風頭蓋過師姐吳敏霞。
陳若琳自細父母離異，所以同外婆感情特別好，嗱到金牌後，陳更說：「我想把金牌分給外婆。」難怪婆婆錫到佢
。
戒飯一年
咪睇佢個樣好天真咁，其實單親家庭長大嘅若琳細細個已經立志做奧運冠軍，據若琳的外婆所講，自細體弱多病的若琳為練好身體，讀緊幼稚園高班時已經自動自覺去跑圈，若琳幾乎日日都係喊住跑，硬頸若琳仲話：「我要跑，跑累了讓我哭哭不行嗎？」
到發育時期，陳若琳驚自己體重增加，故實行戒飯戒甜，陳若琳說：「我一年都沒有吃飯，為了事業，我絕對不會吃以前最愛的蛋糕和冰淇琳。」嚴謹收身仲勁過Mani 唔畀班英皇星有米到肚，若琳成名決心真係勁過容一姐呀！
接晶棒
陳若琳之前同兩位師姐郭晶晶（左）和吳敏霞（右）一齊幫美的冷氣拍廣告，睇排位就知邊個係晶晶接班人。
雪碧妹
去年未嗱金牌前陳若琳（左）已經被雪碧睇中拍電影廣告，今次贏咗應該大把有得撈。
金牌贈女 李小鵬
27歲 雙槓金牌
去年小鵬接咗唔少廣告，百事、肯德基、李寧牌等等最少賺250萬，不過佢有鋪買嘢癮，一得閒就買名牌，被內地傳媒稱「月光族」，即係長期糧尾，收入月月清，乜女友唔鬧咩？
女子組瓣瓣有人受歡迎，男子組就以體操隊最威，27歲雙槓同男團金牌得主李小鵬大隻又靚仔，上屆雅典奧運失落雙槓金牌即場流淚已經叫唔少女fans 心碎，今屆重振雙槓王聲威，女fans 當然更加瘋狂。
難得小鵬靚仔又算專一，現任女友李安琦係國家隊前代表李小平個乖女，05年小鵬因為去美國治療時住埋喺對方屋企，同李安琦朝夕相對自然溝得埋。雖然拍咗兩年拖，不過小鵬仍打算將其中一面金牌送畀女友做禮物，大隻仔幾時諗住結婚先？
左起：女友李安琦、李母文佳、李父李小平（右一）
問到初見女友李安琦時，小鵬就話：「第一次見她，整個時空都停止移動，同電影、小說一樣，那刻我知道，她就是我要的女孩！」咁識講嘢，係女都冧啦！
小鵬2歲已經好活潑，所以6歲佢父母就送佢入體操學校，憑努力成為16項世界冠軍，打破李寧所保持的14項紀錄。
絕種乖仔 陳一冰
23歲 個人吊環金牌
吊環王陳一冰喺奧運奪得個人吊環金牌，5歲已經開始入體操學校訓練，喺隊中係百分百乖仔，為咗比賽訓練，陳一冰7年來只係返過一次屋企，嗱冠軍嘅獎金全部畀屋企，又話畀錢屋企起大屋，訓練完就留喺宿舍休息。
除咗訓練之外，23歲陳一冰原來好鍾意打機，仲要最鍾意撩人踢Winning ，唔蒲唔玩唔飲，搞到一冰咁大個仔竟然未拍過拖，好在早前被內地傳媒踢爆與內地女星舒暢行埋，舒暢仲喺自家blog 入面寫「為吊環王癡狂」，事後陳一冰笑笑口話：「都不出奇，我23歲了。」好在都有女追，唔係掛住打機變電車男就大件事喇！
為奪金每日訓練12小時，練得一身肌肉，陳一冰話：「我不是為自己而戰，而是為家人！」真係絕種顧家男呀！
真情留blog
舒暢年僅20歲，但拍劇近10部，以《鹿鼎記》演建寧公主同黃曉明做對手最出名。
喺blog 內，舒暢表示因拍劇要姐姐在電話中講述陳一冰比賽表現，更大字標題話為吊環王癡狂，話冇嘢都冇人信。
今屆奧運以鄒凱成績最好，個人嗱咗單槓、自由體操及男團金牌，平了李寧紀錄，不過最令人深刻都係佢比賽時嘅笑容！
鄒凱大受女fans 歡迎，網友即時幫佢整靚，因為佢眼細細，女fans 仲叫佢做小眯，有花朵，囡囡殺晒！
鄒凱像其他嚫仔一樣，鍾意寫blog ，佢仲將今年春節晚會嘅男扮女裝天鵝湖相放上網，網友竟然讚可愛！
家陣鄒凱係國家隊其中一位靚仔，不過十二歲嘅鄒凱原來係四眼兼箍牙，仔大都可以十八變嘅！
新王子 鄒凱
20歲 自由操、單槓個人金牌
中國體操代表除咗李小鵬，20歲嘅鄒凱都一樣好得女fans 心，鄒凱場內場外都笑笑口，而個樣又十足台灣棒仔咁款；成為現時國內最受嚫妹歡迎嘅運動明星。
同好多人一樣，四川出生嘅鄒凱因為體弱多病想操fit 啲而學體操，估唔到02年14歲就入國家隊，由於鄒凱係目前唯一一位嗱咗三塊金牌嘅四川選手，成都特別為佢出單人郵票搞個人崇拜，好多女fans 打算狂掃貨，雖然家陣冇女，不過睇佢個勢應該唔愁。
菲比斯嗱女最醒
國家隊選手，同聲同氣就話喺京奧受歡迎，不過奪游泳8金嘅新水怪菲比斯一樣喺奧運好搶鏡，水立方萬人迷個個爭住想做佢女友。
話晒萬人迷，當然識揀女，菲比斯同拍過《Playboy 》寫真嘅美國性感蛙后比特拍拖，其間又同幫開Gucci 、LV 行show 嘅英國名模Lily Donaldson 傳緋聞，最新就係同Paris Hilton 一齊喪蒲嘅女星蘭茜露漢開晒口話想嗒佢，緋聞多多搞到女友勁發脾氣，話自己「大把男人」，菲比斯「嗱女」一流，不過講到密
，似乎仲要同我哋位Edison 學習吓喎！
美國蛙后
比特 26歲
美國娃泳代表比特雖比菲比斯大3年，不過因同隊，見面時間多日久生情撻著，當喪女蘭茜露漢公開冧水怪後，比特即時改口話：「我冇同佢拍拖，我唔會咁bad taste ，我大把男人！」睇嚟女友有真火喎！
06年比特更替《Playboy 》拍寫真三點全露，即被網民選為最性感泳手，喺美國人氣不比隊友菲比斯弱，搵男人的確唔使擔心，係驚搵唔到個好似水怪咁疊女啫！
10億水怪
菲比斯今屆京奧嗱八金威到盡，樣唔算好靚仔，不過淨係去年廣告收入都已經有約500萬美金（約4,000萬港元），仲有外國傳媒估計話佢未來8年有成10億美元收入，咁有貨難怪大把女冧。
短信撩撻
蘭茜露漢 22歲
由童星入行至到近排拍電影兼出碟嘅蘭茜露漢，最出名係同Paris Hilton 齊齊喪蒲，早前被菲比斯媽媽踢爆露漢傳SMS 畀佢個仔：「你好×正，我想約你出街！」有女送埋身，菲比斯唔食就怪啦！
緋聞索模
Lily Donaldson 21歲
索模Lily Donaldson 去年取代Kate Moss 成為07年younger face ，有外國狗仔隊話見到佢同菲比斯夜會，真定假就唔知，不過二人齊齊封口，似玩完各自飛過隻。
