上星期有新聞報道話長沙灣一老婦鍾意喺屋企儲垃圾，食環署上門清理時，幾千隻曱甴亂竄，場面得人驚！
其實好多人都有收集物品嘅傾向，藝人們亦不例外，玩具、衣飾儲到成屋都係，仲要一set set 咁買，誇張程度爆燈。
星矢迷 Kenny
Kenny 出名係高達迷，早前仲自爆話去日本時見到有高達安全套，都忍唔住要買。原來佢最愛嘅figure 係星矢。就好似呢套聖鬥士figure 咁，一般人頂多都係儲六個主角加十二個黃金聖鬥士，但Kenny 儲齊之餘，仲要大細size 各買一set 。
Kenny 話：「細個冇錢買，一搵到錢就買到一袋二袋。最高峰時試過每個月花幾千蚊買玩具。後來實在太誇張，阿媽開始check 住，但最後我都係選擇繼續買！」
星矢，齊！
Kenny 嘅《聖鬥士星矢》珍藏鋪滿屋企張梳化，但其實只係其中一部分。其他絕大部分都已經pack 箱。Kenny 表示過百隻唔同款嘅聖鬥士，包括主角同配角，都已經儲齊。以購入價計，全部珍藏最少值$30,000。
最愛紫龍
《聖鬥士星矢》眾多角色中，Kenny 最愛紫龍，而唔係第一男主角星矢，佢話：「紫龍最愛捨身成仁嘛，同埋佢招『盧山升龍霸』，型！」
Kenny 嘅收藏唔單止塞滿家中所有大櫃，仲要分門別類咁收藏。此櫃中擺放嘅星矢figure ，又係另一set 體積較細嘅扭蛋figure 。
最愛大膠
眾多收藏中，Kenny 最愛呢隻大膠鐵甲萬能俠1號。據知呢隻公仔目前身價高達30萬，仲要冇人捨得賣。後來日本公司於02年推出復刻版，都要過千蚊一隻。
吉蒂迷 Yumiko
還記得當年麥當勞換Hello Kitty 公仔，一眾吉蒂迷排隊排足幾條街，但瘋狂程度，始終唔及Yumiko 。「記得第一次出糧，我去精品店買咗成萬蚊Kitty 精品，仲做埋間舖嘅VIP 。」Yumiko 說。經過多年收藏，依家佢成屋都係Hello Kitty ，上鏡的這些，只係冰山一角咋。
問Yumiko 仲有咩Kitty 精品想買，她說：「冇喇，依家最想儲錢。」終於大個女啦！
相中嘅Kitty 只係Yumiko 屋企收藏嘅其中一部分，「細個時要讀書成績好，先會有Hello Kitty 做獎勵，得來不易，所以依家有工作能力，就不停咁買。」
最難儲
呢套早前喺7-11換購嘅Hello Kitty On Stage 公仔，由於換購時要分三段時間嚟換，想儲齊都唔係咁易。Yumiko 說：「呢套好難儲，好彩有班fans 幫手先儲得齊咋！」難怪佢要搵埋間黃金屋俾班Kitty 啦。
最大隻
全屋最大嘅Hello Kitty ，是朋友特別買來送給她。不過Yumiko 話：「香港地方細，大Hello Kitty 一個已經夠，希望以後唔會再收到啦。」
一家團聚
「呢套Kitty 喺日本買嘅，因為佢同我屋企過隻好似樣，見到佢就好似見番失散嘅家人咁，所以買返香港等我哋可以一家團聚。」
大
曝光
呢隻睡衣Kitty ，Yumiko 每晚都會攬住嚟
。佢話：「呢隻係我第一次出糧時買嘅，所以特別有紀念價值。」
豆袋公仔迷 Ella
好多儲物狂以量取勝，但官恩娜（Ella ）就話貴精不貴多，佢主打嘅豆袋公仔，依家就有過百隻，但隻隻有出世紙，佢仲話專登揀啲同佢同一日出世嘅公仔嚟買。
「開始做model 就已經儲豆袋公仔，因為有次無意中嗱嚟玩，發現手感好好，從未試過咁舒服，以後就愛上了。當時香港仲未有得賣，好彩做嘢成日有機會飛，可以去美國、加拿大買。」
不過三年前Ella 已經冇再儲公仔，佢話：「因為屋企細冇地方放，而且太愛錫佢哋，令到自己心理負擔好大，成日都怕佢哋俾蟲咬。都係第日賺多啲錢，買間大屋先再儲啦！」
Ella 現在擁有過百隻豆袋公仔，雖然已經冇再儲，但她仍在尋找與她7月9日生日一樣的公仔。若有讀者發現，歡迎報料。
最愛Barbie
Ella 說：「細細個就好鍾意Barbie ，但以前玩嘅都係翻版。所以依家都會儲Barbie 。」目前Ella 已擁有Barbie 公仔約有十多隻，數目不多，但隻隻有來頭。
最值錢
這個Barbie 屬於五、六十年代作品。它不是由塑膠製造，而是由一種叫做SilkStone 物料造成，所以面部輪廓做得非常細緻。衣飾手工精細，半點也不馬虎。當年開賣價已經要$2,000，依家肯定升價十倍都唔止。
曾Sir 教路
講到儲豆袋公仔嘅心得，Ella 說：「儲呢種公仔唔可以剪牌，為咗將個牌保存好，仲要買專用保護膠包住，咁先保值。至於收藏嘅方法，就係要搵個盒放好，再加入防蟲用品，但我對樟腦敏感，所以放肥皂同活性炭，係曾Sir 教嘅！」
黑超迷 衛詩
藝人總喜歡戴墨鏡，衛詩（Jill ）亦唔例外，入行個多月便開始搜羅不同款式的墨鏡，最瘋狂時竟然是1個月內買晒整套Dior 系列，Jill 笑稱：「過時覺得呢款Dior 好靚，最初買咗黑色，隔多個幾星期再返去買埋其他顏色，每副大約$1,800左右，都幾貴！不過可以兩姊妹一齊戴。」
除了儲墨鏡，Jill 原來自13歲開始，搜集不同款式帽，如今收藏了過百件珍品，近年更喜歡上網訂帽，Jill 仲話：「上網訂好方便，唔會咁易同人撞款，而且買慣咗都知size ！」
Jogordon 帽約$1,900
Jill 坦言16歲已經很捨得花錢買貴帽，「呢頂帽8年前喺日本旅行過時買，質料好舒服！係made in Scotland （蘇格蘭），如果唔見咗我會好唔開心。」
Ksubi 太陽眼鏡約$2,900
「我唔會買太貴嘅太陽眼鏡，幾靚都好，3千蚊以上都唔會諗，用咁多錢買對高踭鞋好過！呢個Ksubi 買咗$2,900蚊，已經係全屋最貴。」
朋友知道Jill 喜歡心形太陽眼鏡，所以今年特別訂造一副送給她做生日禮物，鏡框更刻有「Jill 」名字。
最高峰期，衛詩試過買五副同款唔同色嘅Dior 太陽眼鏡。
Figure 迷 鄧健泓
談起figure ，鄧健泓（Patrick ）總會勾起一些往事，「可能屋企得我一個仔，所以婆婆好錫我，有次陪佢買
，沿途一直扭計想買過盒98蚊嘅『黃金俠』，過時80年代初一碗白粥都係幾毫子，最後梗係如願以償。」相信Patrick 有鋪儲figure 癮，或多或少與這個情意結有關。
99年開始Patrick 瘋狂儲figure ，家中仿如置身玩具反斗城，不單有V 型電磁俠穩坐電腦邊、三一萬能俠鎮守地櫃，還有不同的figure 進佔樓梯，非常壯觀！
Patrick 最喜歡收集不同漫畫的figure ，收藏品包括：蜘蛛俠、變形俠醫、新世紀福音戰士及變形金剛等。
工作忙碌的Patrick ，偶爾回到家中也會拎家中的figure 出來，換個pose 以及拍照留念，這張超人「近照」由Patrick 親手拍攝，靚嗎？
