20歲初寫真 剛滿20歲的湯怡，做美女廚神被英皇發掘，比起梁洛施勝在家底清白又純情。
你以為《內衣少女》Stephy 做膽，拖JJ 加Janice Man 串埋三重彩？錯喇，網上討論區排名，竟然係英皇新人湯怡（Kathy ）跑出排名第二，冇出寫真書展冇佢份，但唔覺唔覺，爬贏Stephy 。
20歲女，攝正遠走荷里活Isabella 電影少女個位。力捧喎，英皇等人使係原因，不過都要湯怡夠忠心先得。
上週湯怡為本刊深藏初露，身為英皇新美眉，賣身契綁足10年，兼與師姐梁洛施同齡20，伊莎貝拉反骨走先，師妹攝靚位，憑乜得寵，湯怡諗都唔諗：「我會好聽公司話，一世效忠，我唔反骨㗎！」講義氣，Mani 錫晒你。
被指係少女黎姿，湯怡夠晒謙：「冇黎姿身材咁好！我都好鍾意佢生得sweet ！」
美少女廚神出身，拍過無線劇《寫意人生》做少女版黎姿，之後簽約英皇改埋姓（原名袁家怡），估唔到出道一年，電影只客串過《戲王之王》和《惡男事件》的湯怡，未擔正過已受注目。大師姐阿嬌未知復出成功與否、新貴Isabella 又同公司紮行馬，緊張時期，湯怡接棒做搲錢新武器。
梁洛施打入荷里活又有小小超照，即與英皇反面，師妹湯怡最緊要知恩圖報，唔好有樣學樣呀！
暗鬥4女神
本週一（11日），《內》片搞慶功宴，唔夠一星期收300萬真高興，不過4位女神衣著就好密實，Stephy 更加影完相就走先，唔想同湯怡（左）及姊妹們坐低傾吓偈咩？
雖然不是處女座，但絕對是第一次三點式上陣，純情湯怡話做足安全措施，面對戲中男友徐天佑都算自然嘅！
湯怡在《內》片演一味想嫁有錢人的空姐，遇上變態偷bra 狂。
純情過Bella
又後生又主力拍戲，好易令人聯想湯怡做Isabella 代替品，連她自己都話：「應該唔會唱歌住，都係拍戲主力先。」不過經理人Mani 霍汶希就話唔覺：「唔可以話係Isabella 第二，我哋都冇安排佢走Bella 條路，佢哋兩個好唔同。湯怡份人好乖、純情好多。我覺得佢好有觀眾緣，所以先放咁多資源喺佢身上。唔通主力拍戲就係行Isabella 條路咩。」的確，拍照當日，記者就見識了湯怡純情一面，封面那張稍稍性感的照片，本來攝影師同記者
又求都唔肯趴低，最後要通知Mani 打電話同佢講咗一輪先肯露多少少，到記者問佢點解唔行性感捷徑時，佢又口啞啞唔識答，要助手代勞：「個個人都唔同嘅。」之後先識答嘴：「係咯係咯，我覺得唔使咋。」認真鮮嫩。加上傳聞《內衣少女》有一場和Stephy 、JJ 同場的bra top 戲，湯怡又因為接受唔到咁性感，而喊咗出嚟，真係純過蒸餾水。
內衣鋸大樹
據悉，《內衣少女》官方海報本來只得兩大女神Stephy 及Janice Man ，電影公司有感新紮少男殺手JJ 及湯怡影響力不容忽視，即推出新版。果然，網友盛讚湯怡靚女之餘，電影上畫短短4日，無懼《蝙蝠俠》及奧運影響，截至週日（10日）已勁收311萬，威爆！
「我唔使養家」
雖則英皇話唔當佢係Isabella 代替品，但湯怡就好醒目，除咗猛講「多謝公司畀機會我」同「會畀心機做好佢」之外，問讀完中七先入行嘅佢，會唔會有西片拍就離家出走學英文、又會唔會為富豪背叛公司，佢就話：「唔會嘅。」又岩，湯怡又唔係單親，入行又唔係為還債，「錢對我嚟講唔係好重要，而家唔使養家，都係自己搵自己使。」個腦唔係只得個錢字。
對師姐Isabella 咩感覺呢，「之前喺公司都見過，不過都係打招呼say hi ，感覺係……佢個人幾nice ，睇過佢啲戲，覺得佢做戲好叻，我經驗都未夠，遲啲會報演藝……」至於官司問題，細路女話：「都係唔好畀意見喇。」
最後問佢自己同Isabella 有咩唔同時，佢對症下藥咁答：「我唔反骨。」據知湯怡同英皇其他藝人一樣簽足10年賣身契，白紙黑字，至少10年內，都唔會反碗底呱？
影相期間，記者曾要求湯怡將衣領拉落啲，展示吓性感美，但佢就怕醜妹上身話：「我唔係好慣喺人面前咁暴露喎！」咁純情，抵Mani 錫佢。
得寵傍住
簽約10年成為楊受成和Mani 愛將，Mani 還讚湯怡又乖又純，未來係頭號力捧對象。
06年參加《美女廚神》時，已經被指是少女黎姿，大把fans 。
07年 有名你叫少女黎姿，去年湯怡真係有機會在《寫意人生》中扮少女黎姿。《忽然1周》圖片
08年 擔正《內衣少女》前，湯怡已經客串過不少電影，還在《惡男事件》中扮女鬼。
逐步上
麥玲玲：反骨有樣睇
堪輿學家麥玲玲解話，原來Isabella 反骨、湯怡重感情係有樣睇，難怪Mani 今次放心栽培湯怡啦！
《蘋果日報》圖片
Isabella
耳兜：為人叛逆，固執硬頸。
鼻高顴高：個性強，不甘被壓迫，一有不滿就會提出，絕不妥協。
《壹週刊》圖片
湯怡
眼大：為人重感情
面圓：性格圓滑易話為，唔會搞事。
