香港置業喺沙田區分行需要招聘多20至30個物業顧問，歡迎應屆會考畢業生去做㗎！
8月4號就係中五放榜嘅大日子，升到學嘅固然開心，升唔到嘅就要諗吓自己嘅出路啦，進修其他學科或者出嚟打工都係唔錯嘅選擇。後生仔最緊要唔怕捱，由低做起冇話冇前途，正所謂行行出狀元。所以呢排我發錢韓都會搜羅市面有咩好工，介紹畀應屆會考畢業生，除咗上期介紹嘅整𨋢人外，今次我收到風話香港置業會請物業顧問，歡迎中五會考生加入。
最近樓市雖然有回落跡象，中原地產仲話會大裁員添。其實二手樓市場仍然活躍，香港置業（物業代理）有限公司嘅高級經理羅先生同我講，地產界依然需要新血，話佢哋最少請20至30人做物業顧問，而家沙田區仲好缺人，而且非常需要人手做買賣二手樓盤。咁等我問吓佢請人要乜嘢條件先，「我哋請人其實都冇咩特別條件，做物業顧問最好係中五畢業、年滿18歲，唔需要有工作經驗。反而溝通技巧最重要，先至可以同個客講到嘢。如果唔夠18歲，都可以先做見習營業員，不過我哋只會請長工，唔會請暑期工。」
月入過萬唔難
羅先生話做物業代理底薪約5千再加佣金，收入多少視乎做到幾多單生意，「物業顧問人工其實差異都好大，勤力嘅話人工自然多，有同事入職半年已經可以月入3萬，其實每個月sell 到兩個二手樓盤就已經可以賺到呢個數，當然未必個個都會一開始就咁順利啦，只要勤力啲，月入過萬唔係難事。如果個市好，根本唔使點sell 已經會有客上門，啲客見你介紹得有紋有路，就會信你，買樓投資啲客買完一個盤之後可能又會返嚟再幫襯你，所以sell 得到好重要，好講個人嘅表達同溝通能力。」
而且入得職都會有得training ，咁先至識得點樣同客溝通，「做物業代理唔係靠吹水就得，係要考牌，不過公司會請咗你先，等你慢慢考。我哋請人唔怕佢哋冇經驗，最緊要有心去做，最初唔識唔緊要，好多個同事都係由零開始，慢慢累積經驗，而且公司會有training ，除咗講解銷售技巧外，仲會開course 教啲新入職同事點樣喺推銷樓盤時增加趣味性，例如講吓風水咁，唔會hard sell 嚇走客人之餘又會引起佢哋嘅興趣，同啲客friend 咗之後就會易sell 啲。」不過羅生講到明話份工會幾辛苦，有時要戶外工作推銷樓盤，預咗要日曬雨淋，喺戶外企足10個鐘，所以話唔辛苦又點得世間財呢！
如果想入行，可以去香港置業的網址（
http://www.hkp.com.hk/chi/index.shtml）度睇吓詳情。
PROFILE
發錢韓，本身姓韓，由於見錢眼開的性格，所以朋友均稱呼他發錢韓。百足咁多爪，平時鍾意四圍八，與不同行業人士吹水收風，了解香港商機走勢。
