上圍32A ，龔嘉欣就話身材好壞都唔會著三點式：「博乜啫？」擺明不屑趙碩之拍三點式寫真。
有女人嘅地方一向多是非，何況「四」葉女！
《四葉草》之〈盛裝舞步愛作戰〉未播完，是非自然未斷尾，一時話四葉女鬥餐懵鬧不和、一時四葉仔林威辰被砌鹹豬手，無獨有偶，捲入連串是非都有龔嘉欣份喎！
是非一大堆，不過最激仲係大細咪胸戰，面對戲分多過自己的34D 趙碩之，之前已被對方勁寸：「有個欣字多是非！」今次輪到A Cup 龔嘉欣反擊：「有都唔一定要露，露咁多博乜啫？」
多經驗
姓名：龔嘉欣
英文名：Katy
出生日期：1985年12月5日
身高：164cm
體重：100lbs
三圍：32A-24-33
拍過TVC 、做過有線足球台主持，18歲的龔嘉欣勝在經驗多，而被TVB 睇中。
08年度8位四葉女近日是非多多，34D 趙碩之（右四）話明要報仇，好大仇口！
趙碩之率先出寫真賣34D 巨咪，Katy 就柴台話幫襯動漫Maggie 本齋字冇胸賣嘅《吃一口草莓》好過。
是非一：大細咪混戰
《盛裝舞步愛作戰》上月首播已經傳出有人放料34D 四葉咪神趙碩之狂嗲監製錢國偉，趙碩之因此話有仇報仇：「有個欣字多是非！」，茅頭直指龔嘉欣：「我冇做過，唔怕人報復……學人哋咁性感，唔會咋！我份人好保守，有身材都唔一定要露，露咁多博乜啫！我都知書展好多人出寫真集，但我會買Maggie(李曼筠)過本支持。邊個SMS 我叫我支持，我咪支持邊個咋！」劇中好姊妹趙碩之、龔嘉欣原來冇乜聯絡，交情有幾好？明晒！
是非二：暗寸嚫模矮
15歲出道做模特兒，拍過麥當勞TVC 、雜誌時裝稿、又曾經是有線體育台女主持，一樣靠樣做嚫模的Katy 就一啲唔欣賞當紅嚫模女神Angelababy 和Janice Man ：「唔夠高，做model 邊會耐？唔夠高身材唔好，邊度稱得上model ？所以我要為將來打算，好開心TVB 同我簽咗5年藝人合約。（你即係話Angelababy 同Janice Man 矮？）又唔好咁講，佢哋咁紅，點都高過我呱！」Angelababy 167cm 、Janice Man168cm 、龔嘉欣164cm ，都叫高少少嘅。
嚫模Angelababy 、Janice Man 大紅，Katy 就暗寸佢哋唔夠高唔算model ，又辣多兩個喇！
憑甜美笑口，Katy 本來被葉念琛看中拍《絕代雙嬌》，做Stephy 密友，可惜與TVB 旅遊節目撞期告吹。
愛子被誣衊鹹豬手，本身係律師的林炳昌（右）當然唔信：「個仔好乖，點會咁做，我會睇吓篇報道有冇誹謗成分，考慮對策。」
龔嘉欣否認嫌棄林威辰（左）：「佢好gentleman 、好乖，唔會係鹹豬手。」
是非三：揪出鹹豬手
除咗四葉女鬧是非，就快煞科的《盛裝舞步》又傳出鹹豬手疑雲，有報道指在劇中扮演Peter 的林威辰鹹豬手被四葉女群起杯葛，又被劇中女友龔嘉欣嫌棄：「對住佢講啲肉麻對白，我都會打冷震！」對此，Katy 堅決否認：「梗係唔係啦，林威辰好乖好gentleman ，連普通拖手戲，導演一嗌cut 佢就會縮手，絕對唔會係鹹豬手或者鹹豬嘴，我話肉麻都係講啲對白，絕對唔係話佢！」
