首批新機只得黑、白兩隻淨色，稍後會推出加入櫻紅、綠野、星夜和晨曦花紋的圖案，好色之徒就要耐心等候了。
華碩的Eee pc 差不多每季都推出新款。今季新猷係Eee pc 901，改用鋼琴焗漆機身，玩具感盡消，加埋20G 網上儲存空間同慳電兼高速的Atom 處理器，之前忍手唔買嘅你，係時候加入搶購了。
前幾款Eee pc 的骹位以膠為主，似足小朋友的玩具電腦，今次加入金屬骹位，感覺更pro 更紮實。
雖然機身細過本《忽周》，但鍵盤位適中，主要按鍵都有一隻手指位大小，喪打msn 也甚暢快。
買了第一水Eee pc 的朋友都會發覺，雖然部機迷你輕盈，但速度同容量低，有時連播YouTube 都窒下窒下。不過呢個世界價格同質素成正比，當時的Eee pc 三千蚊唔使，平過部電話，你仲想點？
今次新推出的Eee pc 901就來個大改進，用上Intel 最新的Atom 處理器。試機時，發覺load 相、上網、睇YouTube 都非常流暢，比以前有很大改進。對不用打Online game ，只用電腦做文書處理同上網的用家來說，就一定岩使！
新機又在電池上作出改善。電池最長可用到7.8小時，用家終於唔使拎住個火牛周圍走。可惜係部機的硬碟始終容量細，XP 版只得12G ，雖然廠商會送20G 網上儲存空間，不過始終無咁方便，建議用家買20G 的Lunix 版，再裝個XP 上去好過。
Touch pad 的敏感度亦有改善，但始終芒較細，使用時好易click 錯隔籬，如果喺屋企長用的話，建議買多個迷你mouse （$100以內）。
行Lunix 就係咁嘅樣，未用過的話可能會覺得介面似足電腦字典，其實Lunix 的介面及使用方法十分簡單，只係衰在平時不少在Windows 慣用的軟件都唔可以在Lunix 用，所以要搵番個Lunix 版安裝上去。
Spec
屏幕：8.9吋
處理器：Intel Atom
記憶體：1G
硬碟：20G SSD （Linux 版）；12G HDD （XP 版）
其他：802.11n 無線網絡、130萬像素鏡頭、藍芽、6,600mAh 高容量電池
重量：1.1kg
價格：$4,298
查詢：35824738
