US$199，亮麗而不能置信的價錢。HSDPA ，疾如風的數據速度。3G 就是3G ，名字沒有拖泥帶水的「3.5G 」。如果7月11日推出的新一代iPhone 喚作「iPhone 3.5G 」，I doubt and I don't buy ！iPhone 3G 就是這樣fabulous 。
iPhone 3G 機身比舊版闊1.1mm 同厚0.7mm ，但輕了2g ，亦唔再用金屬機背，改為令面黑色膠殼；16GB 仲有白色版揀添。
Spec.
制式：3.5G 、3G/ 四頻
屏幕：3.5”（480×320）Multi-Touch
鏡頭：200萬像素
記憶：內置8GB/16GB
備用時間：300小時
使用時間：5小時（3G ）/10小時（2G ）/ 7小時（播片）/24小時（播歌）
體積：115.5×62.1×12.3mm
重量：133g
售價：US$199（8GB ）/US$299（16GB ）
iPhone+App Store=賺錢2.0
iPhone 3G 上網速度快3倍，機價平一半，但諗深一層，佢嘅吸引之處，又點只呢兩樣嘢呀，其實佢今次要sell 嘅，係一個極完善嘅一條龍軟件服務套餐，以後全世界都幫佢寫程式，用iPhone 3G 並非一件Apple 的直銷產品，當用家決定使用iPhone 3G ，便可自定軟件內容，用家付款給Apple ，Apple 付款給軟件商，惟有低機價高用戶量才達致這賺錢2.0方程式！
蘋果定位AGPS
循例都要講吓，iPhone 3G 硬件上主要就係多咗3G 同AGPS 。話就話3G ，但實情支援埋3.5G HSDPA 制式，根據Steve Jobs 喺WWDC （全球開發商大會）示範，下載速度比舊iPhone 嘅EDGE 快接近3倍。而AGPS 就能夠接收晒AGPS 同GPS 訊號，即係分別由地面手機發射站同衛星發出嘅signal ，咁就無論喺邊度都定到位。不過，接收AGPS 訊號可能要俾網絡商收錢，詳情係點，就要等部機推出後，網絡商公布先知。
三贏局面賣軟件搵真錢
3月起，Apple 已經開放咗iPhone 嘅SDK （Software Development Kit ）畀所有third party 為iPhone 開發軟件。第二步就係喺iPhone 3G 內預載App Store 程式，一㩒上去就會有大堆third party 軟件畀你揀嚟下載。有啲係免費，但有啲就要畀錢買，Apple 從中就有錢收，呢個市場咁大，先係Apple 真正賺錢嘅地方。
Apple 打造出呢個iTunes 一樣嘅軟件買賣平台，除咗佢自己有著數，third party 得到Apple 咁大嘅支援，唔會再好似以前咁寫完軟件俾人非法下載，連錢都收唔到。Third party 有錢贏，自然就肯開發多啲新軟件，到最後得益嘅咪又係用家，所以係三贏局面嚟。
4大新開發軟件
老老實實，iPhone 3G 硬件改進的確唔多，所以Steve Jobs 講keynote 時，大部分時間都用嚟講軟件。除咗升級至iPhone 2.0firmware ，新增iWorks 等商務性質較重嘅程式外，最突出仲show off 咗幾個Apple 自己或Third party 推出嘅軟件，呢啲先係iPhone 3G 真正嘅精髓所在。
MobileMe backup 唔怕煩
梗唔少得Apple 自己出新軟件去upgrade iPhone 3G ，MobileMe 畀你將iPhone 、iPod touch 、Mac 同PC 嘅電郵、行事曆同通訊錄全部擺晒上你個me.com 賬戶，隨時隨地update 番落每部機入面，咁就唔使自己backup 抄餐死，去到任何一部電腦，一上網就自動收到最update 的個人記事。
世嘉game 體感玩遊戲
Steve Jobs 有意加強iPhone 3G 嘅遊戲性，搵Sega 合作出Super Monkey Ball ，嚟緊實大把game 玩。見啲game demo 畫質靚過NDS ，最正仲係透過水平sensor ，搖住部機嚟玩game ，十足十PS3個SIXAXIS 手掣移植咗落去，PSP 同NDS 都冇此功能，預料iPhone 3G 會變成另一部勁hit 嘅手提遊戲機。
Loopt 地圖追蹤朋友
iPhone 3G 內置埋AGPS ，但查實冇幾多香港人真係需要用Google Map 嚟定位，反而third party 寫嘅Loopt 程式，可以隨時搵出朋友過一刻身處嘅位置，約食飯吹水話咁易，當正強化版嘅Facebook 嚟玩仲過癮。
eBay 程式手篤篤bid 嘢
iPhone 3G 上網係快，但吓吓要上eBay 網頁先bid 到嘢，隨時睇漏眼落唔切bid ，俾人最後幾分鐘截你糊就飲恨啦。喺iPhone 3G 直接裝個eBay 拍賣軟件，一打開軟件即可以
實件貨，配埋Multi-Touch ，操作仲更易，包冇走寶。
網絡商貼機價
iPhone 3G 功能有增無減，但8GB 機價就由US$399減到US$199（約$1,552），16GB 都由US$499減到US$299（約$2,332）。賣到咁平，你估Apple 會蝕畀你？邊有可能！查實全球所有同Apple 合作出iPhone 3G 嘅網絡商，一早已經補貼咗機價畀Apple ，呢條數已經cover 到部機嘅成本。Apple 平機價搶佔有率，一條龍賣埋軟件，食硬你！
無論是否現有3用戶，3門市職員只循例登記所有查詢者的聯絡方法，謂一有消息就會通知大家。
iPhone3G 香港解謎
7月11日iPhone 3G 會喺全球22個地區開賣，年底前增至70個地區，呢點大家都好清楚啦。而家最多人想知嘅問題，梗係3HK 出嘅行貨究竟賣幾錢同要用咩plan ，就連機身有冇「3」字logo 紋身都好重要，好多人話有紋身就唔買咁喎！呢啲問題梗係要問番3HK ，不過佢哋嘅公關就話機價、月費同有冇logo ，全部喺研究當中。我走去3HK 門市問，啲sales 亦係話乜都未知，只叫我留低姓名，到部機出咗就通知我。
呢張係截至上星期五的水貨拆家報價單，8GB 同16GB 來貨價分別係$4,900同$5,900，鋪頭賺少少都要賣過$5,000同$6,000。
睇清楚，寫住「小量現貨」㗎，舊iPhone 喺先達已經好缺貨。
舊iPhone 市況大起大落 舊版新貨喪升
舊版iPhone 熱賣咗大半年，大把人手上仲有一部，佢哋梗關心埋部機放出去仲值唔值錢，結果可以用峰迴路轉嚟形容。
咪以為iPhone 3G 發表咗，舊版就會大跌價，事實係相反。因為舊版喺美國已經停產，香港班水貨拆家嗱唔到返嚟，機價自然被搶貴，由未缺貨時嘅低價8GB $3,980同16GB $4,880，喪炒到而家超過$5,000同$6,000，兩部都貴咗千幾蚊，直到新版售價公布咗都keep 住呢個價。點解啲手機鋪仲唔減價？啲貨之前真金白銀入返嚟喎，唔到最後一刻都唔會蝕賣啦！
4大買機plan 傳聞
3HK 官方冇嘢透露，預咗啦！不過場入面同網上面就有大把人話自己係3HK 職員或者係知情人士，爆咗好多唔同嘅傳聞出嚟，其中有4點係比較可信嘅，而家講住畀大家聽先，信不信由你。
3HK 研究加機價
喺美國AT&T 出機，機價肯定係US$199同US$299，計番港幣出機價最有可能係$1,580同$2,380左右。但網上不停傳出消息話歐洲嘅網絡商可能會開個高價出嚟，所以有消息話3HK 諗住照跟，研究緊加幾多，同點加法先唔受Apple 限制，咁先會到而家都未肯公布售價，好可能呢一刻問李嘉誠都未知呀！
VIP 訂晒第一批貨
江湖傳聞3HK 曾經發出SMS 畀尚駿會會員優先預訂iPhone 3G ，不過就冇講機價同月費。3HK 嘅公關就否認有呢件事，但係亦有人傳7月11日嘅第一批貨嘅數量得好少，而家已經俾一班VIP 訂晒，到時街客想仆去出機都好大機會空手而回，所以我勸大家唔好諗住過日一早去排隊啦，唔係盞
心機。
3G data $288任用
網上傳英國O2可能有$0機價plan ，但出8GB 就要用45英鎊（約$700）plan ，16GB 更要用75英鎊（約$1,200）plan ！一個月用過千電話費？咪玩啦！3HK 嘅月費就有人「透露」過好多唔同版本，最可信嘅版本係通話費照舊（最平$128），3G data 費就$28/2MB 去到$288任用。唔係$0機價，梗係冇英國咁貴，真係嘅話算ok 抵添。
天價賣行貨剩機
正路大家都估iPhone 3G 一定要上台出機，唔會有淨機賣，否則機價咁平，又要畀錢Apple ，網絡商蝕都蝕死。但網上消息指意大利Vodafone 準備畀人買淨機，價錢就梗係天價，8GB 要499歐元（約$5,988），16GB 要569歐元（約$6,828）。有人話3HK 都可以賣淨機，不過價錢睇怕都唔會平得幾多，到時用番舊版好過。
3HK 唔係獨家
如果你好想買iPhone 3G ，又唔係用緊3HK ，其實都有可能唔使轉台，因為3HK 根本冇講過佢係獨家，有機會只係優先賣機。問過其他3間3G 台會唔會出iPhone 3G ，CSL 冇回應，PCCW Mobile 嘅公關就話公司未有公布，最玄妙係SmarTone-Vodafone ，佢嘅公關發言人講完一句：「而家冇推出iPhone 嘅計劃」，之後竟補多句：「但相信唔會係獨家。」漏晒口風，遲吓SmarTone 係咪真係會出，等吓咪知咋，等吓有著數呀！
二手iPhone 全盛時期收$3,500同$4,500，收機鋪大大隻字寫住喺門口，而家唔使旨意有咁高價。
回收價坐過山車
又因為舊版新貨被炒貴，所以去到新版發布嘅前一日（上星期一），先達收二手機仲收緊8GB $3,500同16GB $4,500，比以前高咗5、6百，全新機更高收到$4,100同$5,100。不過，一過咗星期一晚，先達班友終於知道新iPhone 劈到咁平，成個市即刻亂晒，8GB 回收價暴跌$700，16GB 更加封盤唔收，啲人驚到連iPod touch 都唔夠膽收。查實星期一報紙已經預告咗新iPhone 會劈價啦，班友仲唔醒水，叫咗佢哋平日要睇《蘋果》㗎啦，唔畀錢買都應該用iPhone 上網睇嘛！總結一句，你仲有舊iPhone ，就算少錢都要
臨放咗佢，唔係遲啲更唔值錢就喊都無謂。
