陳慧琳（Kelly ）三月宣布舉行一連六場演唱會後，日前終宣布加開六月七日及八日兩場，但上週四（22/5）卻突然以四川地震，香港人無心情娛樂為由取消加場。
事實上，Kelly 自宣布開騷以來，個唱銷情奇差，貴飛滯銷，連一百蚊都唔爆，為免對住幾千空櫈，主辦單位連月餅贊助都照殺，買百幾蚊月餅禮券即有機會抽到兩張飛，中獎率幾乎百分百，散貨要緊！
月餅商散飛
個唱滯銷，主辦單位極之頭痛，搵贊助商都實行有殺錯無放過，其中一家同Kelly 合作關係良好的月餅商亦幫手掃飛，雖然距離中秋尚有幾個月，但贊助商都即時推出買月餅券送飛，爭取時間散飛。
「其實端午節就到，呢個時候原本係主力sell
嘅，不過Kelly 只係月餅代言人，所以要提早促銷月餅禮券囉；話就話抽獎，其實逢抽必中，買百幾蚊分分鐘抽到兩張四百八十嘅飛，直頭係送飛咁滯！」知情者說。
贊助商幫手，加上取消兩場加場，現時四百八十及三百元門票已全部爆滿，記者到售票網查詢時，職員表示有大量平價飛剩，二百元的頭幾行位都有，最平一百元飛亦有大把，不過貴飛散晒，Kelly 亦可鬆一口氣。
Kelly 在四川地震後即時捐出六十萬救災，其個唱則有贊助商幫拖散貨，都算好心有好報。
加完又減
三年幾無響香港開演唱會的Kelly ，月前大鑼大鼓宣布在六月十三至十八日舉行一連六場「Love Fighters 」演唱會，更搶到紅館八月裝修前作「最後一唱」，好巴閉！
不過，Kelly 近年在香港的人氣已大不如前，宣布開騷以來反應冷淡，雖然出盡力做宣傳，揼本花百萬將紅館變成海底世界，又搵來著名美指奚仲文任美術總監，但無論貴飛定平飛，一樣慘淡。
鑑於○五年「陳慧琳紙醉金迷演唱會」開足十場，Kelly 一心諗住起碼要平上次紀錄。「佢（Kelly ）同經理人鍾珍都係諗住先六後四，入紙book 場嗰陣已經訂咗個plan 係咁，點知出嚟反應咁差，但唔加場又冇面，咪夾硬加兩場囉，點知啲飛真係完全去唔到，就用地震抗災個理由，借勢取消。」知情者透露。
搵來著名美術奚仲文擔任演唱會創作及美術總監，更豪花百萬搭台，認真落重本。
Kelly ○五年的演唱會開足十場，反應熱烈，更得到贊助商借出價值一億的珠寶首飾及金馬車，可惜事隔三年，人氣已大不如前。
雖然中秋節仲有幾個月先到，但贊助商為散飛，即提早力銷月餅券，買百幾蚊月餅，分分鐘抽到兩張480元貴飛，變相送飛。
