真面目:綠帽疑雲 王貽興涉掌摑空姐女友
「我幻想把那些佔過她便宜的男人打得頭破血流……」節錄自王貽興小說《無城有愛》
人哋話才子多風流，不過才子新貴嘅王貽興就大意失手，年尾流流先同拍拖大半年嘅維珍空姐Harriet Wong 分手，搞到才子情人節孤伶伶。
才子被飛，原來係有人不滿女友同前男友過從甚密，據知Harriet 更於年三十晚佳節當住才子面前，同舊情人響facebook 互送虛擬鮮花，傳有人一時火遮眼連環掌摑佳人，兩人極速玩完。
有咩唔啱，咪坐低四四六六傾掂佢囉，家和萬事興呀！
雖然藝人最忌戀情曝光，但才子王貽興卻唔怕死高調與空姐女友Harriet 響鬧市談情，話之響TVB 工作量大減，總之愛情至上。
Facebook 出事
28歲王貽興同26歲空姐Harriet 表面打得火熱，不過據知原來有人跟前男友藕斷絲連，更有人目擊王貽興在機場發生搶喼事件，據Harriet 身邊朋友稱：「有次Harriet 飛完返香港，貽興諗住接佢機，點知佢位前男友又忽然去咗機場，兩男爭接一女，王貽興嬲起上嚟咪搶咗Harriet 個喼，迫Harriet 跟佢走囉！」
直到年卅晚二人關係更急轉直下：「Harriet 一向都有玩開交友網同facebook ，年卅晚王貽興上咗Harriet 屋企，咁啱俾佢𥄫到Harriet 前男友送咗盆花畀佢，即時火遮眼，咪一時忍唔住囉！」。
文字暴力
平時斯斯文嘅王貽興其實在他的作品上亦不時流露對女友極大的佔有慾，在得獎作品《無城有愛》中更詳細描繪對愛情使用暴力的內容：「我幻想把那些佔過她便宜的男人打得頭破血流，他們跪在地上，抱著我的腳，用含糊的廣東話哀求放過他們。」
嬲女友翻撻
據空姐Harriet 身邊好友透露，分手後Harriet 傷心欲絕，更搵朋友哭訴：「我哋聽到都眼火爆啦，平時佢斯斯文文，竟然會咁！其實Harriet 成日大讚王貽興點好點好，新年前家長都見埋啦，Harriet 點會咁花心先，根本就係王貽興自己躁啫！」
否認對女郁手
兩人分手後，Harriet 對於王貽興懷疑動粗一事不願多談，只不停說：「我冇嘢講！」而上週六（16日）王貽興出席美容院開幕活動時就一臉失落回應。
F ：《FACE 》 王：王貽興
F ：聽聞你同空姐女友Harriet 分手，係因為你郁手郁腳喎！
王：（表現愕然，思索了一會才說）其實做男人，分咗手，好多嘢應該唔再講咁多。
F ：咁有冇出手打Harriet ？
王（抖大氣）：我真係唔想回應。
F ：你係咪唔鍾意Harriet 同前男友繼續聯絡？
王：我只可以講，我完全體諒男女朋友有自己朋友，不過當一齊咗，應該識得尊重對方囉。
感情有理說不清，才子隻手都係用嚟揸筆好。
舊愛劃清界線
緋聞多多嘅王貽興，入娛樂圈後雖然唔夠幾個月就換畫，不過分手女友個個都爭住幫才子講好說話，形象未至於跌到谷底，不過提到懷疑動粗事件，舊愛即時劃清界線，雖然係情敵，始終女人都係幫番女人嘅。
寫出佔有慾
其實王貽興的作品，字里行間都流露咗唔少佢對愛情睇法，除咗有暴力風格，仲顯示大男人嘅一面！
「……他們雖然也會在酒酣耳熱時討論自己的女友或舊女友的身材或者床上表現，可是男生們始終會避忌，因為他們是自私而佔有慾強的動物……」節錄自《關於愛情》
「……男人會一方面繼續貪婪地偷望街上其他衣著性感穿著低胸衫蕾絲裙熱褲短裙高跟鞋的女孩、一方面卻要求自己的女人入籍伊拉克，大熱天時一身黑紗遮面包身木乃伊出巡。」節錄自《關於愛情》
陶傑：「文筆好不如好品」
王貽興身為才子對女友唔友善，另一城中才子陶傑就話：「雖然作家同作品係兩回事，就算文章寫得好，個人都未必好品，不過如果我見到佢都係會勸吓佢，叫佢對女人應該浪漫啲，必要時都係動口啦！我就未試過對女人動手啦！」聽到啦，前輩塞錢落你袋啦！
被問到有否向空姐女友郁手郁腳，王貽興以「我真係唔想回應」，然後更即時眼濕濕兼頭耷耷，才子係感性啲嘅！
上月仍恩愛
上月尾王貽興至啱啱跟女友Harriet 在銅鑼灣買年貨準備見家長，估唔到個幾禮拜之後，就極速玩完。
送花傳情
Facebook 內有多款虛擬鮮花，玩家可以隨意送給朋友，表達心意，小玩意竟變成導火線。
第三者即閃
