就算成日笑騎騎懶樂觀嘅楊千嬅，話晒踏入中女行列幾年都未嫁，終身大事梗係有唔少人關心啦！好囉好囉，一踏入08年千嬅就斷正，先被影到登堂入室拜訪緋聞男友丁子高，後俾人話10月嫁得出，應該係喜事嚟啊！
以為恨嫁大笑姑婆終於有著落，可能真係疊埋心水等嫁添，點知成年冇update 過blog 嘅千嬅，上週三（9日）即刻做嘢，長篇大論千九幾字寫咗篇題為「明天我要嫁給誰？？？？？」嘅心聲，仲用咗5個問號否認喜事近，仲話：「結婚須要對象，本人連對象也未遇到，又何來可以結婚呢？」一句講晒，擺明唔認丁子高係男友啫！
點睇，丁子高對千嬅都唔止朋友咁簡單，話晒千嬅響人哋屋企留守到最後，咁都死口話「事業為重」！下個月3日，佢都成34歲人啦，唔通要搞到第日做高齡產婦咩？
丁子高連姊弟戀都唔介意，但係反而俾千嬅拒絕男友身份，一向花心大少嘅佢，呢啲咪係風水輪流轉囉！《蘋果日報》圖片
我連對象都未遇到！真實對白
其實拍拖係開心嘢嚟，楊千嬅又使乜咁口硬啫，唔通真係屋企人反對？不過就快34歲嘅千嬅，都係時間結婚啦，唔通仲同啲妹妹仔爭獎好咩！
成年冇響blog 度寫過嘢嘅千嬅，終於為咗丁子高重寫blog ，但個「須」（正確係「需」）字都寫錯，而且內容都幾反高潮，睇到FBI 火都嚟，不過最火嗰個應該係丁生。
