憑性感女神形象打入樂壇的官恩娜（Ella ），這3年來曾經唱過邊首歌，可能唔係太多人記得，但見報的是非或者緋聞，睇怕大家會更有印象。
最近有傳Ella 搭上33歲公關界闊少陸恭和（陸恭蕙胞弟），唔單止火速搬入男友位於灣仔會景閣豪宅，更有司機接送。據知男友對佢疼愛有加，近日更精心挑選羅便臣道豪宅俾佢嘆世界。豪宅現正趕緊裝修，希望農曆年前可以入伙。
比起得個樣，但愛蒲兼花心嘅吳卓羲，陸恭和有錢又有面，Ella 睇嚟終於明白靚仔冇本心，有樓最實際啦。
早於個多月前，向來以的士出入的Ella ，忽然有部價值約46萬的Alphard 七人保母車接送出入。起初大家不以為意，直至12月20日被傳媒踢爆與陸恭和的新戀情，記者才發現該車屬於其男友的生意拍檔。本周二，有雜誌更刊出佢出入男友會景閣1,200萬豪宅的照片，證實佢哋拍拖唔夠1個月已經火速同居。
同居會景閣
一月八日，工作完畢的Ella 返回會景閣愛巢，但她未有選擇在會景閣正門出入，反而選擇從與會景閣相連的君悅酒店入口返家，藉此掩人耳目。當時她的男助手表示，Ella 到酒店是為了做訪問。但記者一直在門外守候至深夜，再沒有見過她出來。
羅便臣道新竇
官恩娜即將搬入去住的半山新竇面積約1,200呎，雖然是低層，但租金最少要$40,000，睇嚟陸恭和真係好冧佢喎。
富貴生活
記者連日追訪Ella ，她除了工作外。無論Shopping 、飲茶同搵朋友的都集中在中環的高級場所，看來Ella 已為進駐半山做個上等人作好準備。
一月九日14:30
接了時裝Show 的Ella ，出席完公開活動後，由荃灣匆匆趕到北角寫字樓試身。現在有司機照顧出入的Ella ，比較以前乘的士的日子，當然方便得多。所以就算一日走足七場，亦完全唔使愁。
16:00
Ella 試完身後，就去了中環文華置地行街。行咗一陣，可能見冇咩嘢啱買，便開車去了歷山大廈繼續行。
16:30
行完街後，Ella 與助手會合老闆Keith 於太子大廈茶聚。見三人有講有笑，看來Ella 並沒有因緋聞纏身而被照肺。他們至六時才離開。
陸恭和老友
官恩娜所乘的白色保母車，為黃翠珊（Susan ）旗下的公司所有。其實黃翠珊曾於97年，以藝名黃浩詩簽約佳音唱片，並出過唱片。佳音唱片倒閉後，黃翠珊轉職會計師，至02年在官恩娜的經理人Keith 協助下，開始重新推出唱片，在Hi-Fi 界更有「靚聲天后」的美譽。
據知黃翠珊與陸恭和合資一間「活樂企業有限公司」，知道拍檔與Ella 的拖友關係後，隨即仗義出手借出另一間公司名下保母車。千絲萬縷的關係終於破解，亦證實Ella 再一次擘大眼講大話。
另覓新居
為保護剛萌芽的新戀情連大話都講埋，Ella 今次認真大犧牲。不過據知陸恭和非常疼錫Ella ，除俾部保母車連司機佢任用外，更打算與她另覓新竇，搬到位於中半山羅便臣道的豪宅。
記者於本周二（1月8日）到訪過，發現該單位仍在裝修。當時有幾名裝修工人正在火速趕工，記者聽到有人大聲話：「爽手啲啦！」。其後記者向裝修工人查詢Ella 有否親身來監督裝修時，當中一人緊張道：「呢啲嘢我哋唔知㗎！」
關於搬上半山一事，周二晚記者在會景閣門外向Ella 求證。Ella 最初表情尷尬，其後記者表示得悉新竇由其男友精心挑選，Ella 隨即展示甜笑，然後向在場記者揮手講再見。
出入有車接送，又可以搬入中半山豪宅，Ella 揀男友口味轉變之後，就連身價都變埋，認真叻女！
前後矛盾
本周三（1月9日），Ella 出席活動時被傳媒追問新戀情，明顯地佢有備而來，對新戀情例牌否認。
官：因為屋企對面火燭，所以搬咗去親戚屋企住。其實嗰度好多單位，只不過咁啱陸生（陸恭和）都響度住。佢係老闆啲好朋友，識咗三四年。同佢傳緋聞，我自己都覺得幾搞笑。
記：楊天命師傅話你啲緋聞有真有假？今次係真定係假呀？
官：（死兜）係囉、係囉！師傅話有新聞，就證明自己響娛樂圈做得好嘛。
記：咁邊啲真，邊啲假？
官：（死撐）今次係假，但以前嘅報道就有真有假。
記：不過空穴來風，未必無因喎。
官：因為出面冇風，啲風先吹去我度啫。
記：咁你都好大風喎！
官：（窒咗一窒）都唔知道呀！
至於被問及佢部新保母車時，佢話：「㗎車係我哋（她與陸恭和）一個common friend 黃小姐嘅，佢唔係呢行嘅人，唔慣俾人寫，真係唔好意思。」
但經記者調查發現，Ella 口中所講嘅黃小姐，其實係有「Hi-Fi 天后」之稱的黃翠珊Susan ，與Ella 的經理人Keith 經常合作，並非佢所指的圈外人。記者更翻查資料，發現Ella 的舊居紅磡都會軒，在近三個月都沒有失火紀錄。不禁令人懷疑Ella 對傳媒「吹水」。
Show 胸回應緋聞
一月九日，Ella 出席金至尊活動的記招時，表示自己的確住在會景閣，與前一天她向本刊表示去君悅酒店做訪問的答案有矛盾。
雖然Ella 口口聲聲說自己並不「姣」，沒有隨意放電。但見她出席活動衣住嘅性感程度，難怪陸恭和會俾佢電親。
陸恭和有面兼家底豐厚，父親陸孝佩是著名建築商，母親則是聖安娜餅店的創辦人。陸恭和的生意包括從事首飾零售的活樂集團、資產變賣的營卓峰國際集團，以及公關公司Propagate 等，真係百足咁多爪。《壹週刊》圖片
官恩娜主演的電視劇《律政新人王II 》收視理想，愛情事業兩得意。難怪連堪輿學家楊天命，也批Ella 08同09又紅又嗱獎。忽然一周第650期
