探熱針:撲水過年 張繼聰謝安琪拍住窮星做小販
由Juno 大佬麥浚翹（大寶）打骰的SILLY THING ，成立以來一直蝕錢，去年尾宣布即將重組止血，除了二少爺Juno （麥浚龍）有老豆麥紹棠撐住，無錢賺的歌手藝人通通成為棄將，被迫停工！
見農曆年無嘢撈，為免手停口停，Krusty 的Jan （張泳恩）與新人Oscar （蕭潤邦）秘密在維園投得年宵攤檔，拍埋貧賤夫妻張繼聰、謝安琪，齊齊做小販搵銀過年。
二萬蚊投攤位
SILLYTHING 重組止血，有傳公司重組後只會留低賺到錢的I LOVE YOU BOYZ 同二少爺Juno ，其他歌手包括吳日言、組合Krusty 、Oscar 全部都無得留低。
獨立發展後只出過一張EP 碟，今年候選男新人的Oscar ，頒獎禮都未完就接到公司通知，將他調到幕後。歌無得唱，農曆新年搵錢Job 更加無佢份，Oscar 於是傾盡私己錢，花了二萬元於維園競投了一個年宵攤位，同好友兼同公司的Krusty 成員Jan ，夾份賣帽做小販，賺得幾多得幾多！
「投個攤位同埋入貨都要幾萬蚊，對佢哋嚟講好多錢㗎喇，無辦法啦，冇收入都要搵定後路，乜都試吓，佢哋會賣帽同埋T 恤，希望年宵吸引啲後生仔女幫襯，搞得好，將來可以諗吓自己開鋪做老闆啦！」知情者說。
本週一（七日），Oscar 與Jan 現身維園，不停指手畫腳，研究攤檔的位置。之後二人再到銅鑼灣一座商業大廈樓下，接過友人交給他的大袋紅白藍後，一行人便到咖啡連鎖店坐低開會，其間Jan 更拿出計數機，不停篤來篤去。
輪流捱通宵
今年維園年宵下月一日開始，頭尾計可以做六晚生意，Oscar 、Jan 及有份夾錢的張繼聰、謝安琪會輪流看檔。
「好彩佢哋響呢個圈都有好多friend ，唔少朋友知道佢哋擺年宵，都話義務幫手陪佢哋睇檔，咁佢哋就唔使捱咁多晚通宵囉！」Oscar 友人透露。
問到做小販搵銀一事，Oscar 接受電話訪問時口窒窒。「吓，唔好話做小販啦！咁難聽，都係新年玩吓！（投資幾多？）少少啦，有幾個人夾份。（新年無Job 做咩？）……有，咁依家都係做嘢啫，有錢賺咪得囉！（張繼聰兩公婆都有夾？）係啦係啦！玩吓啦！」
馬死落地行，擺年宵攤位執得就執，正路啊！
過去一年，張繼聰不斷參與音樂製作幫補家計，今年要派利是，連小販都要做埋。（《Face 》圖片）
有傳SILLY THING 重組後只會留低I Love You Boyz ，曾被力捧的吳日言（右一）都無得留低。（《忽然1周》圖片）
SILLY THING 重組，除了老闆仔Juno 繼續想唱就去唱，全部歌手都要停一停，等一等。
Jan 與響英皇嘅細佬Steven 一樣，努力搵錢幫補家計，將來有機會就同Oscar 轉搞時裝做老闆。
