三年零八個月可以造就抗日英雄，但剛好入行三年零八個月的官恩娜，可以是另類「英雄」。
代表作欠奉，相反一堆負面新聞卻排山倒海。被狂迷狼吻、餵飽吳卓羲真空落樓、同陳鍵鋒爭仔不和、姣溝舞台劇男主角等。
本來這些報道總可維持官恩娜人氣，但前經理人突然蟬過別枝唔撈，冷不防地將她的工作量及見報率急降，綠燈轉眼變成紅燈。
「直情好似打機咁，過完一關又一關。」
過五關斬六將後，大概傷痕纍纍，最重要是如何洗底重生，令大眾忘記舊瘡疤。
「我覺得自己依家係綠燈，做人冇信心點得呀！」官恩娜的確夠勇。
工作停頓連負面新聞都無埋，看來她這段洗底路還有排行。
無謂再講
專訪的拍攝地點選在將軍澳工業區一條荒廢馬路，事前眾人擔心風大會阻礙拍攝進度，幸好這晚天公造美，就連官恩娜也不禁感激一番，「嘩！今晚真係好好彩，平時呢度好大風㗎，依家竟然一啲風都冇！」
這番說話出自入行後是非多多的官恩娜口中，確實特別有意義。她，的確需要點「彩數」。
「入咗呢行3年幾4年，真係人生速成班，喺路途上面有好多令人失望嘅事，學到好多嘢。」
相信官恩娜所指的失望，吳卓羲「奉獻」出來的，佔的比例應該不少。
「過咗去真係無謂再講，我係唔開心你哋話我真空啫！嗰下你衝埋嚟有啲突然，我咪好自然揞住心口囉！」
真空暴走事小，吳卓羲闊佬懶理事大。官恩娜獨力單挑傳媒，情傷應該嚴重吧？
「唔講，如果喺工作情況下再與對方碰面都唔會尷尬嘅，我都係做自己嘅工作，安排同咩人做嘢，都係交番俾公司決定啦！」
她對吳卓羲那種斬釘截鐵的態度，亦是預期之內，因為最新的緋聞男友，已不再局限於電視台小生。首先，有舞台劇《紅樓夢》男主角林澤群，官恩娜被指掛住拍拖而失場，最後要勞動經理人報警上門爆房；最近則是從事珠寶生意的商界猛人，陸恭蕙弟弟陸恭和。
「佢（陸恭和）係我老闆嘅朋友（聲音開始變高），我入行識佢到依家㗎啦。因為我哋有好多common friends ，所以有keep 住成班人出嚟食飯囉，單緋聞唔係真嘢！」
是非精
07年中，官恩娜經理人Francis 過檔BMA 唱片公司，令她這份終身職業危機重重。她那段期間的確沉寂，唱片無得出，更有傳聞話這位經理人曾公開指官係細路女一名。
「我同公司簽咗合約，唔可以話過檔就過檔。其實公司不嬲定咗07年係拍劇為主，之前我去咗好多地方做show ，好似美國、加拿大同荷蘭，唔喺香港啫！
「之後都有喺公開場合見過佢（經理人），如果一個長輩教你，你都要聽㗎啦！以前細個冇阿媽鬧都會撞板啦！」廿八歲的官恩娜要用阿媽做擋箭牌，果然唔成熟得去邊。
她這份終生職業最近終於露出一絲曙光，播映中的《律政新人王Ⅱ》，是首個擔正劇集。
「好多謝TVB 俾呢個機會我，監製又好錫住我，編排啲時間好鬆動，所以唔算辛苦。拍之前都有睇律師片，去律師樓睇下人哋點樣做嘢。我知馬國明去埋court 旁聽添，我自己就唔夠膽。我都擔心收視，好彩播嗰陣係平安夜、聖誕、元旦，咁都有得賴，哈哈哈。」
官恩娜無膽上court ，據知原因是「無人陪」。收視著實毋須擔心，與陳鍵鋒傳不和這段新聞起碼也能刺激三點收視吧！說到底，穿上律師袍神情莊嚴的官恩娜，仍擺脫不到那股是非味。
「呢單嘢直情笑死我哋，我哋一啲嘢都冇，同佢不知玩得幾開心，佢成日車我返屋企。唔想澄清係費事俾人話我有小動作啫，that thing never happen ，總之呢單新聞係笑話一則。」
終生職業
孰真孰假真的要留待讀者自行判斷，但她易招惹是非確實千真萬確。
「唔……其實應該要接受人哋嘅批評，但係有啲就真係好無厘頭，完全唔係事實，好難受、好委屈、好冤枉。自己都會反思下點解人哋會咁寫。但食得鹹魚抵得渴，好難去避免，寫開就係咁啄住你嚟寫。如果要靠呢啲去維持曝光率，寧願少啲新聞。最唔想影響身邊嘅人，屋企人同朋友睇咗會好擔心。
「有一剎那諗過放棄，但我仲對呢份工有passion ，咁諗態度唔正確！我選擇咗呢份工做終生職業，就要做落去。
「就算一個普通OL ，喺社會上都有好多嘢面對喇，要俾老闆鬧，同事之間都有是非，唔係淨係我哋呢行。要承受係冇咁多私隱啫，冇辦法喇！」
我不太女人
除了是非，能將官恩娜解讀的資料少之又少。出生大溪地，家族背景一直成謎，只知她在溫室長大，傳聞官爸爸在大溪地有一定的江湖地位，有一兄一妹，哥哥做兼職模特兒。
「父母好低調，佢哋間中返嚟探我，之前都有喺公開場合睇我表演，不過佢哋唔鍾意上鏡。我哋關係好親密，乜都傾，完全冇隔膜。
「我唔覺得自己溫室長大，要縱都唔係縱我，我又唔係孻女，只係中間嗰個。其實好好彩，同屋企人關係咁好，係緣分嚟㗎，thank God ！」
沒有宗教信仰的官恩娜，突然殺出一句thank God ，的確叫人吃驚。
但最震撼的，莫過於她對自己性格的「新」剖釋：「唔會話自己好乖，我比較內向，唔鍾意出街夜蒲，不過間唔中都會見到我喺蘭桂坊出現。」認真矛盾。
「做咗呢行先至shopping ，以前唔鍾意買衫，依家仲係學習點買衫階段。以前覺得長頭髮好煩，15歲喺英國讀書試過剷青，因為鍾意，幾型啊！係入咗行先留長頭髮之嘛。
「我唔係一個好女仔嘅女仔，但又未至於男仔頭，我班朋友都係叫我做『阿官』。」
似乎是娛樂圈這條路，逼使「阿官」作出改變，打造她成為一個有sex appeal 嘅女人，都幾*詭，真係辛苦晒。
「sex appeal 呀？呢啲嘢要人哋講，冇理由自己講啫。不過入咗行之後，個人冇咁活潑，因為你未必知道對方想唔想你咁活潑。你對人滿腔熱誠，但唔知人哋點諗，依家真係要用多啲時間去同人相處，先知道做唔做到朋友。出到出面，人哋冇義務對你好！
「其實係大家睇唔到我嘅真實性格啫，但唔重要，我始終係我，對得住自己。俾到公司交代就足夠，唔可以要求所有人都鍾意你。依家啲觀眾好聰明，有分析能力，唔會信晒啲報道㗎啦！」
向清水灣半島說再見
我承認對官恩娜有半點同情心。還記得當日一收到消息，便與同事從公司飛奔到吳卓羲位於清水灣半島的寓所等候，目的就是要拍得官恩娜慌忙暴走的情景。（意外地她還加送真空+爛褲腳）歷時短短七分鐘，換來是一期封面，都算是個經典。事發後官恩娜單拖在傳媒面前苦撐，男方卻玩失蹤逃之夭夭，很多人也感到這個結局大快人心。我猶豫地邀請她接受專訪，結果出乎意料之外，她一口應承之餘，這天還要早到半個鐘。她第一句跟我說：「自從清水灣半島單嘢後都未見過你！」官恩娜好清楚知道，她需要這六頁的專訪，去宣布自己情傷康復，重新出發作更高挑戰。不過要到達讓她重生的TVB 將軍澳電視城，必先要經過清水灣半島。
與陸恭蕙弟弟陸恭和（右一）傳出「拍拖7日即同居」的緋聞，官恩娜豪放性格經已洗都洗唔清。《壹週刊》圖片
06年10月被狂迷狼吻，她說：「希望慢慢fade out 喇！發生呢件事真係唔想咁多人知道。」
TVB 幫官恩娜上位之餘都要玩佢，在《律政Ⅱ》首集講馬國明載官上庭時，中途大唱吳卓羲的經典名作〈別怪她〉。世上真的沒有免費午餐。
