天后鄭秀文（Sammi ）以往除咗行徑難以捉摸，還出名脾氣唔係個個頂得順，出道18年有個人盡皆知的威猛綽號：「臭四」。
不過人會變嘅，臭四都可以變四萬！
多得主耶穌打救，加上富貴教會闊太姊妹扶持，決志多年即將受浸正式成為基督徒的Sammi 親身做好見證，陽光開朗笑口常開。
阿Mi 轉性無論係奇蹟定神蹟，身邊親友和fans 門徒，都應該個個拍爛手兼放下心頭大石！
同教友傾偈，阿Mi 不時撥弄駁了假髮的青絲，即使高額反晒光都唔介意，自信心返晒嚟！
於置地high tea 傾足個多小時，面對記者追蹤Sammi 都毫不介意，除了富貴闊太教友（左二）外，連著住名牌Missoni 針織衫的男教友（右一）都冇發脾氣，這兩位阿Mi 口中的教會好友，果然有錢有教養。
當日跟Sammi 繑手的闊太教友，更以七人車接載Sammi ，據車牌資料顯示，車主名叫周錦濤，周氏生意涉獵甚廣，主力從事建築行業，更跟亞視前老闆封小平有不少生意來往，而周錦濤更以樂活有限公司名義於92年一擲2.2億買入尖沙咀柯士甸路7-9號全幢商業大廈，而周太除家住九龍塘對衡道市值約7,500萬的6,000呎獨立屋外，更持有太子道別樹華軒及禮頓山單位，總值超過2,000萬，認真富貴。
去完教會飲完high tea ，富貴教友再用七人車送埋Sammi 返屋企，咁熱心難怪Sammi 覺得賓至如歸。
笑得可愛
阿Mi 講起信仰，一時忍唔住玩手指兼微笑，阿Mi 佢話：「我都準備受浸啦，不過等教會安排。」搵到心靈支持，阿Mi 連笑容都甜啲！
兩年前，一套《長恨歌》搞到Sammi 嘔心瀝血，結果電影落畫，Sammi 卻傳出因為太過投入角色，懷疑患上抑鬱症，加上備受惡化的濕疹和哮喘影響，索性全面停工休養生息。
主日開籠雀
事實上，出道18年，多年來都有指Sammi 性格專橫、助手當下人使喚、對同行、傳媒都沒有好面色，連她自己亦承認脾氣大、壞習慣多多，加上2年前被病魔糾纏，Sammi 更被人話有鬼剃頭、𠝹手等自虐傾向，身體狀況都似乎不太穩定，因此簽約東亞後工作卻沒有新進度，復出大計再三推遲。
直至今年5月再次登上紅館舉行《Show Mi 2007演唱會》、上月又在上海舉行個唱，再復出的Sammi 除了狀態大勇，明顯笑口常開、信心返晒嚟，心理生理都與以往相差甚遠。據知情人士透露，Sammi 自覺身份特殊，初期返教會擔心惹來奇怪眼光，並不定期返教會，寧願自閉家中讀經：「佢開頭返長沙灣恩福堂，你知啦，始終地區同教友背景都唔同，佢會覺得格格不入，直至有個富貴姊妹Joyce Chan 介紹金鐘港福堂，反而啱晒佢返。」一班非富則貴新教友為了解除Sammi 心病，主動向Sammi 施以關懷，知道她怕接觸群眾，就遷就Sammi 親往其大寶閣居所的會所內查經，令Sammi 更投入教會生活。在神的帶領下，Sammi 終於想通不再執著，變了親切鄭「四萬」。
週日（25日），記者發現Sammi 和一男一女兩位友人在中環置地廣場露天茶座high tea 。近年常被報道指行為神化飄忽的Sammi ，當日雖然素顏又蓬頭，單拖赴會卻健談得很，與友人高談闊論愈講愈興奮，心情絕對是近年少有靚靚。
捐獻十分一
替阿Mi 覓得心靈安慰的港福堂屬於本地富貴教會，而且教友猛人甚多，如律政司司長黃仁龍、前財政司司長梁錦松、譚惠珠、羅霖等均有定期參加教會聚會。
而港福堂位於金鐘遠東金融中心之會址，更是於今年6月以1.1億天價自置，據教友寇鴻萍透露，港福堂內所有人都會遵守將收入十分一捐獻教會的規定每月捐獻，阿Mi 跟得主耶穌，為教會出力點會托手踭。
信仰洗污漬
過去臭四年代的阿Mi ，扯煙、自閉、發助手爛渣乜都有，如今迷途知返，連吸足十幾年的煙癮都可以戒埋，難怪佢自己於專欄中亦說：「神的力量的確偉大。」
新Mi
35歲阿Mi 現在有教友兼信仰支持，上週五（23日）就扮到靚靚，戒煙戒自閉的Sammi 出席於上海舉行的「MTV 頒獎禮」，扮到靚靚嗱「最具風格女歌手」，實至名歸啦！
講唔該
以往阿Mi 出名對助手態度差，如今近身助手換上阿Sa 前助手兼好友大嬸，態度亦180度改變，連大嬸亦說：「佢成日同我講唔該，講到我都唔好意思。」
舊Mi
扯煙自閉
自稱18歲開始食煙的Sammi ，在去年中秋節時因病情緒低落冇搵人陪，自閉在家亦一樣煙不離手，信基督後連煙都戒埋，連阿Mi 自己都話好神奇。
唔見光
阿Mi 對自己儀容一向注重，之前冇化妝例戴超大烏蠅鏡兼影親黑面，雞咁腳走，邊有如今咁nice 。
多傷痕
Sammi 手臂上有不少似被利器𠝹傷的疤痕，信主後重生，當然冇再做傻事。
摑助手
阿Mi 之前出名臭脾氣，除了經常當眾鬧前助手阿爽（右）外，更有傳試過怒摑助手，兩人終於鬧翻，阿爽亦憤而辭職，轉助張玉珊。
闊太傍左右
明知有記者影相，阿Mi 一於大方得體繼續飲完一粒鐘茶，以往同類環境例必黑面唔好老脾鬧人當閒事，當日Sammi 卻連黑超都懶戴，任影唔嬲兼企定定與記者大談耶穌，行徑友善friend 到痺。
F ：《FACE 》 S ：鄭秀文
F ：Sammi ，可唔可以同你傾幾句呀？
S ：好呀！你問啦！（爽朗笑）
F ：好少喺度見到你喎？
S ：係呀！而家係私人時間，正常唔答你㗎！（再笑）佢哋係我教友，識咗好多年㗎啦！啱啱返完教會啫。
F ：你最近係唔係信咗基督教？
S ：信咗十幾年㗎啦！最近返多咗教會啫。因乜事就唔講啦！
F ：呢兩位你朋友呀？
S ：係，佢哋係教友，識咗好多年，佢哋令我好開心。
F ：你受咗浸未？
S ：咁就未。不過快㗎啦，正好打算受浸，幾時就唔到我決定，要等教會講。
F ：狀態好好，就嚟復出拍戲喎！
S ：係呀，同公司傾好晒啦，不過詳情唔講住。
F ：劉德華都入埋東亞，同你做同事喎！
S ：華仔打過電話畀我，我一早知啦，梗係好啦！
F ：梁詠琪都係喎！
S ：呢個我就唔多講啦，人哋嘅嘢我唔想講！我走啦，byebye ！
往日情緒化，呢日Sammi 竟然保持笑容企定定答完記者問題才禮貌道別，信了耶穌性格果然平和開朗不少。
寫出真情
阿Mi 於今年5月的演唱會中，一封給阿Mi 的信，真摯感情贏盡掌聲，以後於上海及多倫多等地表演反應亦熱烈，阿Mi 愈做愈有信心。
老闆尊重
有傳東亞老闆林建岳不滿阿Mi 之前經常玩失蹤，不過阿Mi 愈做愈有兼識搵食，嚟緊仲會同陳奕迅開新戲喜劇，看來Sammi 於東亞地位確係超然。
冇嘢好爭
千嬅同阿Mi 一向傳不和，千嬅加盟東亞更被指威脅阿Mi 一姐地位，查實阿Mi 上晒岸，邊使同班後輩爭寵咁小家。
全面復出
Sammi 性格開朗番，連曾經傳出被Sammi 掌摑而離職的前助手阿爽都撐：「我同Sammi 有聯絡，佢打我嗰啲純屬傳聞！其實Sammi 個性一直開朗，近期更加好，未必關宗教事，係佢工作壓力比以前細，位置唔同啫！」
信主得救後，繼上月上海演唱會後，Sammi 工作開始緊密，上週五（23日）盛裝出席在上海舉行的MTV 音樂盛典，領取「香港最具風格女歌手」大獎，接下來便與陳奕迅首次合作，更會接拍由莊文強、麥兆輝金像拍檔打造的愛情喜劇，唔使爭工作一樣排到密麻麻，東亞爭寵風暴？阿Mi 地位誰能代替呀？
變得徹底
做娛樂圈是非多壓力又大，不少藝人像Sammi 一樣身心飽受煎熬幾臨崩潰，咁啱得咁蹺，又係信奉基督教走出陰霾。
蔡少芬
18歲時有過被L 君照顧歷史，又因為母欠賭債，與母親一度脫離母女關係。信耶穌後，不逃避不光采歷史兼帶埋父母信教，修補好關係。
張可頤
身患甲狀腺炎，搞到面腫頸腫，被迫全面停工兩年。經朋友介紹返教會，調理心態兼養病，近日終於復出電視台，狀態大勇。
開懷拍手
覓得信仰後的阿Mi ，週日（25日）跟兩名教友於中環置地high tea 時，不時開心得開懷大笑，燦爛笑容好陽光。
FACE周刊第27期
