陳冠希blog晒愛的肢體自從同Vincy （楊永晴）拍拖，Edison （陳冠希）都算修心養性，再冇女埋身。差啲修成正果做緋聞絕緣體，點知上週四（6日）又瀨嘢，俾報紙圖文並茂佢蒲夜店、兼醉攬台灣少女組合「美少女天堂」成員小敏。
畀著以前，Edison 傳緋聞當食生菜，回應？睬你都傻。今時今日就唔同啦，第二日，即刻有公司發言人澄清，話Edison 去夜店係做正經嘢，小敏只不過係眾多要求合照嘅fans 之一喎！呢頭澄清，嗰頭個blog 度又勁post 拍拖相晒恩愛！梗係啦，個個都唔睇好，連台灣主持人小S 都話輸賭呢段情過唔到出年，Edison 又點會俾人睇死呀！
Edison 和女友Vincy （左）嘅戀情都通晒天啦，響blog 度唔使咁避忌啊，應該騷多啲親密照，等小S 恨吓都好嘛！
台灣豪放少女小敏（右）響自己個blog 度放咗兩張同Edison 嘅合照，成功上晒報紙，唔知Edison 有冇好後悔影呢張相呢？
Edison 響blog 度放咗同女友Vincy （箭嘴）戴住卡地亞Love Bangle 仲拖住手嘅相，好簡單就feel 到好sweet 喇！
雖然見唔到Edison 同Vincy 嘅溫馨樣，但齋騷兩對緊貼住嘅腳板，已經feel 到佢哋愛得難捨難離，不過左邊搽桃紅腳甲嘅Vincy ，腳板同男友差唔多大喎！
