朱慧敏表示羨慕王賢誌（左），初戀便找到真愛。
朱慧敏、王賢誌及李嘉豪昨日到新城電台宣傳下月於灣仔藝術中心的舞台劇《金星撞火星》，王賢誌指故事是改編自一套電影，劇中的愛情觀與現實十分相似，他說：「男仔同女仔差不多，30幾歲未拍過拖，一樣覺得好徬徨，我一直單身到38歲。」
朱慧敏表示非常羨慕王賢誌，初戀便找到真愛，她說：「我作為女仔但係唔急，現今女仔都可以有自己事業。」她表示有想過要小朋友，但未找到另一半，由於她在單親家庭長大，認為爸爸的角色好重要，她說：「有諗過領養小朋友，覺得係大愛嘅分享。」
採訪、攝影：張俊銘
曝光率急升王賢誌響朵做宣傳
王賢誌犧牲個人時間應邀演出舞台劇，獻出第一次，身兼慈善工作者的他坦言放不下演員身份，在多個電視台亮相，期望藉個人知名度推廣慈善單位的工作。
王賢誌身兼慈善工作，但百忙中仍投入幕前演出。
藝人王賢誌（Vinci）應導演侯永財邀請，在接任東華三院主席前騰出時間，與朱慧敏合演舞台劇《金星撞火星》獻出第一次，Vinci直言覺得不可思議：「其實一切都係巧合，同導演都識嘅，上年傾過合作但擱置咗，最近經朋友撮合再傾到舞台劇。原本都覺得準備做主席呢段時間太忙，但傾過戲份只需要同朱慧敏夾，時間上夠靈活，自己亦覺得係一個難得嘅機會，所以就答應咗喇。」
口才無助演律師
Vinci表示有多個幕前工作在未有刻意安排的情況下同時推出，曝光率瞬間提升，亦是他再接演藝工作的誘因：「早前拍咗亞視《百萬富翁》，加上去年喺《溏心風暴3》客串嘅戲份最近播，突然變咗幾台藝人！好多睇咗嘅朋友Cap圖Send番畀我，話我口才好演律師會好易，其實都唔係，會有困難。」他又指自己是藝人出身，希望出任東華主席時能利用知名度，向大眾宣傳工作範疇。
朱慧敏與王賢誌傾得好投契。
侯永財（右）邀請王賢誌等藝人首演舞台劇，相信會擦出不少火花。侯永財肯聽意見
至於侯導演今次與多位首次演舞台劇的藝人合作，Vinci亦是其中之一，問到可覺得冒險？他笑說：「冇問題，年輕一代有自己嘅要求，有鬥心，佢哋都有好多意見畀番我，我乜都願意聽。」
此外，朱慧敏、王賢誌和李家豪昨日出席電台訪問，提到舞台劇講及愛情觀，王賢誌指男士都擔心變剩男，他亦單身到38歲：「都有鍾意我嘅男同女，但冇正式開始過拍拖，我嘅結婚伴侶仲係初戀！」朱慧敏即說羨慕王賢誌，但直言不急於結婚，最緊要伴侶懂得愛惜自己。
文：影視組
攝：唐豁莊
