日本豪華房車喺香港市場嘅佔有率漸漸痿縮，主因係歐洲車愈賣愈平，平到已經同日本車冇乜分別，崇洋心態下，日本豪華房車自然較輸蝕。不過，買家從來唔會同銀包鬥氣，只要係平、靚、正，自然有人上門買！就好似都係日本豪華品牌嘅Infiniti咁，近年喺香港明顯逆市賣多咗，就係因為產品賣大包！價平兼齊料！最新就有頂級版Q50S 3.0t Red Sport 400版，身負400匹強勁馬力，車內設備多到玩唔曬，車價都只係$599,800，放低$600,000都仲有$200找畀你。
其實Infiniti Q50早喺三年前已引入香港，但當年嘅配置唔算標青，2.0公升turbo引擎及7速波箱都係嚟自M-Benz，208匹馬力雖然唔差，但用上非自家動力配搭，始終少咗一份原汁原味。最新、最強嘅Q50S 3.0t Red Sport 400就唔同，波箱用返自己嘢之餘，連引擎都係自家Nissan最出名、連GT-R都用嘅VR系列，今次冇德國廠幫手，反而令Q50S 3.0t Red Sport 400露出真性情！
全新攞獎引擎
作為Nissan fans嘅你，睇見Infiniti旗下多款車都用M-Benz引擎、波箱，甚至用埋底盤，你有咩感受？乜Nissan自己冇能力造出出色嘅機械部件咩？唔好勞氣住，之所以用上咁多M-Benz嘢，其實只係商業上嘅策略，Nissan從未放棄喺機械層面上嘅開發！Q50S 3.0t Red Sport 400作為車系中嘅頂級，就用上廠方最新開發、編號VR30DDTT引擎。唔係一味得個新字，呢副引擎base on GT-R嘅VR38DETT引擎，2,997c.c.twin turbo可輸出400匹馬力及48.5kgm扭力，比同級嘅德國車強橫得多，而且2016年推出即取得「Ward's 10 Best Engines」年度殊榮，係唯一一副日本V6引擎，都咪話唔威！
能夠獲獎，當然有其賣點，引擎中缸及盤頭都用鋁合金製造，進一步輕量化；加入全新DIG高壓缸內直噴技術，令空燃比更精準；加入電子渦輪感應器令渦輪轉速高達240,000rpm；引擎內部多處採用最新鏡孔塗層技術，令摩擦力比以往同廠V6引擎減少40%。聽到呢度，仲會唔會嬲Infiniti用M-Benz嘢？其實只係留返最好嘅嘢畀最頂級版用咋！
編號VR30DDTT引擎，採用3.0公升V6雙turbo型式，表現剛柔並濟，係Nissan近年最標青引擎之一。
兩個水冷式turbo中冷器被安放於引擎上方，令引擎體積更緊湊。
引擎內部多處都經特別處理，活塞頂部嘅新設計及缸內直噴系統，可令霧化汽油燃燒得更徹底。適量低調升級
Infiniti作為Nissan嘅高級副線品牌，其行事作風都比較低調，縱使Q50S 3.0t Red Sport 400係頂級版，但外表同三年前嘅Q50 2.0t有九成相似，較明顯係頭泵把轉咗大型款式及入風口改用類似鬼面罩嘅網狀設計，要一眼分出身份，就只有睇前輪嘅十九吋輪圈、鮮紅色迫力卡鉗及新款尾喉，唔會好似歐洲頂級高性能型號咁，又拋沙板、又尾翼、又粗喉。車廂方面，升級項目都唔多，只係前座改成半桶形、加入大腿調節及位置記憶。覺得佢升級好冇誠意？真係怪錯「車」嘞！原因其實係原本嘅Q50 2.0t實在太齊料，好多喺歐洲車上被視為option嘅項目，喺Q50S 3.0t Red Sport 400上被列為基本嘢，關乎行車嘅有Active Lane Control、Active Trace Control、電子避震、駕駛模式及定巡系統等，而關乎舒適性又有天窗、電暖前座、雙區恆溫冷氣、獨家中控台雙touch mon.、360度泊車鏡頭及多達十四個喇叭嘅BOSE音響。
一眾德國對手如M-AMG C43、BMW 340iA及Audi S4嘅standard設備唔及Q50S 3.0t Red Sport 400豐富，如果想有同級設備，分分鐘加錢十萬八萬。而現時Q50S 3.0t Red Sport 400車價只係六十萬有找，德國車想有咁嘅設備，車價冇九十萬都唔使諗。
Q50車系最出名就係中控台上兩個相連touch mon.，操作及閱讀都非常好。
360度泊車鏡頭隨車附送，德國車分分鐘加錢都冇。
金屬腳踏唔使加錢都有，而且仲靚仔有型。
後座特設肩部承托，因此連後座都有相當好舒適性。
前座腰部面積加大咗，而且大腿位置都有得電動調校。
新款尾喉比2.0t版本更粗大，而且有小圓孔圍邊，賣相獨特。
全新款十九吋合金輪圈內藏紅色迫力卡鉗，唔打得都睇得先。
表板同入門版一樣樣，唔算花巧，中央顯示屏只會喺轉換行車模式時轉色。
軚盤後嘅轉波撥片靚仔，大小適中之餘更有真皮包裹，包唔會跣手。
7速波箱都由Nissan自己搞，雖然係傳統自動波，但有DRM（Downshift Rev Matching）拖波自動補油功能。大馬力要小心
對比Q50 2.0t，頂級版本唔單隻馬力一下子由208匹升至400匹，其實連駕駛模式都更多選擇，加入「SPORT+」及「ECO」模式，而且「PERSONAL」自定模式內有更多設定，追加「懸掛系統設定」及「Active Lane Control」，令「PERSONAL」模式可組合出更多配搭，以切合唔同人、唔同駕駛風格。
置身馬力大平賣年代，Q50S 3.0t Red Sport 400嘅400匹馬力你可能覺得冇乜特別，但佢仍然堅持用尾驅，就絕對要留意。M-AMG C43及Audi S4馬力未到400匹，但已採用四輪驅動，作用當然係確保行車穩定，Q50S 3.0t Red Sport 400只用尾驅，喺某程度上係可以有好好嘅行車靈活性，不過只要遇上雨天、又或司機太大油，尾輪係可以輕易突破抓著力外移。試車當日適逢大雨，筆者已用比平時慢車速試車，但TCS防打滑系統介入次數明顯偏多，可見車尾其實唔係好穩，如將TCS關閉，相信會好忙。因此，Q50S 3.0t Red Sport 400嘅車架寬容度明顯唔算好高，400匹馬力對佢嚟講大咗少少，彎路表現做唔到同樣係尾驅嘅BMW M3咁好，如果馬力調低至300匹左右會更好。
個人模式可以有更多不同系統設定，配搭出不同駕駛風格。
「SPORT+」及「ECO」模式係頂級版先有，簡介就係「更快」及「更慳」。Infiniti Q50S 3.0t Red Sport 400 spec.
引擎：2,997c.c.V6 twin turbo
馬力：400hp/6,400rpm
扭力：48.5kgm/1,600-5,200rpm
傳動：7前速自動波、附+/-模式
車身：4,800×1,820×1,445（mm）
軸距：2,850mm
0-100km/h：5.1秒
耗油：9.6L/100km
售價：$599,800
查詢：Infiniti HK（2756 9135）
撰文：袁國基
攝影：葉偉豪
