當你見到深圳的沙灘滿佈垃圾，點會唔掛住布吉的藍天碧海？泰國政局不穩，但布吉已正式解除宵禁令，與世無爭。識嘆，去布吉一定揀寧靜區域如北部後花園Layan或豪宅地段Kamala。尤其現時屬淡季，人流更少，一定唔會似大梅沙咁人頭湧湧，最適合享受一個避靜假期。
豪華pool villa享受自然
Beachfront Layan Pool Villa的客廳及睡房是兩幢獨立大屋，可容納三人，其實大到四五人都住得落！
Anantara Phuket Layan Resort& Spa是集團在布吉第二間resort，選址位於布吉西北的Layan Beach，距離芭東只約半個鐘車程，但遠離人煙，這一區未被過度開發，四周無被大量resort、商場及酒吧攻陷，保持純樸自然環境。前身為Bundarika Resort，改建後房間數目不變，共77間海景房及villa，格局分別不大，不過裝修則豪華得多。酒店相當大，被一片綠樹海包圍著，似身在森林中，充滿自然氣息。海景房位於山上，走出露台可以飽覽全間酒店，但係當然唔夠主打的獨立泳池小屋吸引。當日入住的Deluxe Pool Villa屬於入門級，但面積已過千呎，露台寬敞得容納兩張沙灘椅及戶外浴缸亦綽綽有餘，泳池約160呎，唔算大但勝在夠深，浸得舒服！更高級的Beachfront Pool Villa，泳池更加大，亦可以直接通往沙灘。如果一行四人，必選兩房pool villa，除泳池外仲有私家花園，直情似一間洋房。房內配套同樣完善，nespresso咖啡機、Apple TV、Bose藍牙揚聲器等已是必需品，連浴鹽都有三種，留在房都可以hea足一日。附近餐廳不多，食飯惟有留在酒店內，有兩間餐廳可選，主打的泰菜dee plee位於山頂，全開放式設計，景觀一流。食物由泰籍大廚Pitak主理，賣相及製法相當精緻，入口辣度勁，食到大汗疊細汗。舒服一點可以選擇西餐廳Sala Layan，有露天位及室內位，意籍大廚創作出具東南亞風味的菜式，如牛尾佛跳牆、西班牙式煮布吉龍蝦，食咗幾日都唔厭。
由山上的海景房望出去，可見到沙灘、小島及一片原始樹林。
酒店的大泳池都算大，不過較淺水，有多個按摩水龍頭，適合一家大細玩水。
拍攝當日水療中心仍然籌備中，可在房間內按摩。
Beachfront Layan Pool Villa的獨立泳池則有二百多呎，都游到兩步嘅。
酒店大堂外形似廟宇，有小水池包圍，典型resort格局。
生牛肉他他$225（Sala Layan供應）安格斯牛肉他他做法傳統，不過上碟前用釀製Jack Daniel's威士忌木桶的木屑煙燻，帶微微的煙燻香。
dee plee主打傳統泰菜，食物選擇多，餐廳廂座有濃厚地道風情。
零遊人獨霸沙灘Anantara對正的Layan Beach唔係私家灘，不過一般泳客唔會走過來，雖然海水唔算清澈見底，但被島嶼包圍，海灣風平浪靜，適合玩各類型水上活動，酒店有雙體帆船、站立式滑浪板及獨木舟等俾客人免費租借。早上酒店為我們安排瑜伽班，由專業導師教授，在沙灘上伸展筋骨，海風變成天然冷氣，動作唔難，初學者都玩得到。酒店的Dining by design服務可以幫客人度身訂造特色用餐體驗，為我們一行人在沙灘上安排了燭光晚餐，聽住海浪聲在星空下食飯，如果唔落雨，都幾浪漫。酒店亦安排了豐富節目，包括Spice Spoons泰菜烹飪班，早上去附近的市場買餸。大廚Pitak帶我們走一圈，又叫我們嘗試用泰文購買食材，當然最後只靠手指指完成，買完就返去準備煮大餐。學煮的三道菜次次不同，今次大廚教我們煮蝦肉薄脆、青咖喱及芒果糯米飯，煮完即食，相當有滿足感！晚上又玩埋調酒班，DIY屬於自己口味的雞尾酒，調酒師教我們用香茅及酸子調成一款酸酸甜甜的雞尾酒，為旅程畫上完美句號。
沙灘遊人甚少，風浪不大，潮退時可以行到對面的小島上。
晨早的瑜伽班可以請酒店免費安排，做完運動，精神特別爽利！
大廚帶我們到地道街市買餸，價格便宜，有濕貨亦有大量香料售賣。
烹飪班的菜式難度不高，但做法亦有技巧，甚有挑戰性。
調酒班在Breeze酒吧進行，由首席調酒師調出多款特色雞尾酒。
Anantara Phuket Layan Resort& Spa地址：168 Moo 6,Layan Beach,Cherngtalay,Thalang電話：+66-76-317-200房價：標準房每晚$1,185起，Pool Villa每晚$2,155起網址：
http://www.phuket-layan.anantara.com
二千呎型格玻璃屋
遠看酒店的villa，一間間長方形玻璃屋以水泥本身的顏色及青色草皮點綴，融入大自然環境。
別以為布吉只有傳統泰式小屋resort，型起上來都可以好有設計味！全布吉只有三間酒店屬於出名夠潮的Design Hotels集團，The Naka是其中之一，由泰國著名建築師Duangrit Bunnag打造，華欣X2 Resort、攀牙的Villa Noi Residence均出自他手筆。The Naka亦帶有強烈個人風格，簡約得來，線條筆直利落，未正式開業，已被《Wallpaper》雜誌選為2014年最佳新酒店設計獎。要先經過一條偏僻小山路才能到達，路口低調得連招牌都無，直至上到山頂，才見到接待處。酒店依山而建，背山面海，由最高點望下去，以木材、玻璃及水泥建成的villa，恍如一個個貨櫃箱，甚有工業味道。94間房間全屬pool villa，分為一房、兩房及三房，最細都接近二千呎。全部都對正安達曼無敵海景，愈高景觀愈開揚，走出露台，270度海景完全無遮無掩。格局似豪宅，一入內先係室外infinity pool，長方形房間，三邊都是落地玻璃，拉開窗簾，就像身處在玻璃屋中。中央為客廳，有張L形貴妃椅梳化，兩個人攤啱啱好。睡房及露台在山坡延伸出去，在外面睇似懸浮在半空，好有科幻feel！接近山腳處有主餐廳及酒吧、婚禮教堂、奧運標準size泳池及私家沙灘，不受外界騷擾。餐廳採用全開放式設計，以多條木柱躉由天花直落地面，型格十足，不過無冷氣，唔係人人頂得順。唔怕被困在山頭無嘢玩無嘢食，酒店每日有五班免費專車來回芭東，車程都只是十分鐘。現時酒店仲係試業階段，暫時只提供半數房間，部分設施如水療中心及健身室仍未建好，四處仍有工程進行中，但酒店佔地廣，影響唔算大，反而現時住客較少，仲幽靜啲。
三房villa的其中一層是客廳、飯廳及開放式廚房，間隔似屋企，大到可以開party！
露台位於睡房外，只有玻璃圍欄，270度海景一覽無遺。
每間villa都有私人infinity pool，貫徹房間風格，同樣呈長方形，與海天連成一線。
兩房villa的兩間房以泳池分隔，兩對情侶入住可各有私人空間。
小食拼盤$96（The Nava）有蝦餅、春捲、炸蝦及沙爹，賣相如fine dining般精緻。
酒店唯一餐廳The Nava供應西式、泰式及海鮮，或者可以搭十分鐘車出市中心，選擇更多。
豪宅區二萬呎泳池
Regency Club的泳池長24米，適合玩水同hea多過游水。
入住本地品牌resort，可能有驚喜，但都好大機會中伏，唔想破壞度假心情，入住國際品牌就最穩陣。今年Hyatt集團首次在布吉插旗，選Hyatt Regency這條年輕line，四平八穩，唔會太奢華，價錢亦平易近人，適合年輕人及一家大細。落戶在豪宅區Kamala，附近酒店唔密集，對出有個小海灘，石頭太多唔適宜游水，岸邊只有少數按摩店及餐廳，一般遊客好少會專誠過來，變相更加清靜。全酒店有199間房，裝修走簡約舒適路線，有七種不同房間，全部向海兼有露台，座落在整個山頭上，想近泳池可以選擇較低層數的房間，其他房間出入則要靠電動車接送。標準房唔算特別，私人泳池房亦可以唔揀，因為泳池又細又淺水，建議選deluxe級別以上，面積至少七百呎，最突出的是大露台房，露台仲有一大張梳化床、瑜伽墊可以借用，感覺開揚寬敞。留在房間不如去泳池，Hyatt有全布吉最大infinity pool，長72米有成二萬呎，就算人多，都唔使游兩步就要停低，肯定可以玩成日。而且沙灘椅夠多，仲設有六間池畔小屋可以免費任攤，吸引得多。以Hyatt掛帥，住客難免比小型resort多，想避開人潮，可以入住包埋會所服務的套餐，貴$1,400左右，但可以享用私人會所Regency Club設施，會所內有居高臨下的泳池，雖然唔大但夠私隱，亦無限供應免費飲品及小食。扒房、水療中心及Kids Club同樣位於山頂，坐享全酒店最靚景緻，日落時分最浪漫。Nahm Spa有八間獨立水療房間，全部向海，九十分鐘招牌療程都唔使八百蚊，做得過。
泳池是全布吉最大，接近二萬呎，可以俾住客由朝游到黑。
Ocean View Terrace的全露天平台至少三四百呎，好闊落。
扒房Sunset Grill只在晚上開放，供應西式燒烤、牛扒、海鮮等食物。
燒魷魚$48（Sunset Grill）新鮮魷魚配上火箭菜及辣椒，鮮味濃郁又不過韌，價錢亦相當合理。
Deluxe King房間大得多，沒有太多裝飾，簡單企理。
所有房間均設向海露台，但較密集，感覺較逼狹。
Hyatt Regency Phuket Resort地址：16/12 Moo 6,Tambon Kamala,Amphur Kathu電話：+66-76-231-234房價：每晚$982起網址：phuket.regency.hyatt.com
有用資料
簽證：持特區護照及BN（O）均無須簽證機票：泰航、港龍均有直航前往布吉，港龍未連稅票價由$2,730起貨幣：$1港元約兌$4.2泰銖
撰文：張頌婷攝影：譚俊軒模特兒：Kabee Cheung@Jamcast
