新車激試
膽正命平 Ford Fiesta ST唔係含金鎖匙出世嘅後生仔想玩跑車？一係買部牛肺二手車，一係將貨就價，cheap cheap哋玩吓日本車仔。歐洲平價跑車近年絕跡市場，買部新歐洲跑車郁吓都廿幾三十萬，細到好似VW Polo GTI咁都要廿七萬！今日，平價歐洲跑車再次出現！Ford Fiesta ST以廿萬樓下發售，而且有成182匹馬力，仲要用久違嘅6速手波！唔好話後生嗒糖，連鍾意原始操控嘅識貨車友都buy！據知改裝專家Tony都入手玩，仲集合13個朋友一齊買，遲吓一齊北上搞one make！
Ford Fiesta ST Spec.引擎：1,596c.c.直四turbo
馬力：182ps/5,700rpm
扭力：24.5kgm/1,600-5,000rpm
傳動：6速手動
懸掛：前麥花臣支柱，後拖曳臂
制動：前透氣碟，後實心碟
車身：3,982×1,978×1,495（mm）
車重：1,296kg
0-100km/h：6.9秒
耗油：16.9km/L
車價：$199,900
查詢：Inchcape Far East Co.Ltd.（2820 4018）
歐洲細車發惡以前多人玩日本車仔，但歐洲車廠近年都推出唔少「小辣椒」，部部性能都超過180匹，連大一個size嘅hot hatch都未必夠佢哋惡。
終極版本VW Polo GTI
今年頭推出嘅Polo GTI其實已經係款尾，不過性能都唔差，用1.4公升turbo引擎，竟然有180匹馬力，而且配著名7速DSG波箱，加速表現絕對唔失禮。車價$269,800
再世彎王Peugeot 208 GTi
由205 GTi開始被封為「彎王」，到新一代208 GTi雖然車身脹爆，但表現冇失威，仍然功架十足。配用200匹1.6公升turbo引擎，最大優勢係可揀6速自動或手動，配合唔同用家需要。車價$269,900
識得變聲Renault Clio RS
同樣剛剛推出嘅仲有Renault Clio RS，全新造型加上1.6公升turbo引擎有成200匹馬力，加速表現夠晒堅，而且首次放棄手波改為6速雙離合器自動波，更加易揸。最搞鬼係有變聲功能，車內可播出其他車模擬引擎聲！車價$269,800
今次Ford Fiesta ST對辣車迷有幾震撼？其實上幾款平過20萬嘅歐洲小跑車已經係2000年嘅Peugeot 206 GTI同Renault Clio RS，十幾年後車價可以時光倒流，以今日嘅消費水平，中產人士直頭可以當玩具咁買啦！而且近年Ford轉新代理後狂谷辣車形象，全新182匹Fiesta ST個樣十足貴10萬嘅Focus ST咁惡死！所以造就咗今次香港未有真車到，Tony就集合到13個人搵一個sales同一張單買13部Fiesta ST嘅罕見盛事！好可惜咁樣「團購」買車法，原來一樣冇折頭，只可以換來首批交車嘅早買早享受優惠。
TW Autosport負責人Tony
車身雖比Polo GTI長6mm，但仍維持4m以下水平。
加裝惡辣包圍老老實實呢一代Fiesta喺09年中到港，大大話話都出咗4年有多，之前由上手代理引入1.4普通版，一直都做唔起，全因車價$149,000未算吸引，馬力亦只得96匹，搵鬼吼佢咩？今次ST特辣版之所以未出已大賣，除因為性能夠辣外，外表都有好大因素。首先已經由5門揭背改為3門揭背，而且車頭用咗新款泵把，令到更加惡相，驟眼睇都有幾分似Aston Martin。車身包圍外，車尾頂都加咗條誇張開窿尾翼，再配合埋要加$5,000先有嘅特別紅色車身顏色，令到本來平平無奇嘅Fiesta突然搶鏡！Tony：「其實今次Fiesta ST喺外國有好好評語，外表雖然係蛻變自現有款，不過轉咗代理停賣咗普通版一段時間，𠵱家睇Fiesta ST個樣都仲有新鮮感。」事實上Fiesta ST喺英國都只係出咗3、4個月，車身可改動嘅部件唔多，第一批車主想玩自我外觀，相信要等吓。
車身裙腳凸出肌肉線條，有啲似BMW 1M！
大尾翼，採用開窿設計，車仔之中都算浮誇。
全新design尾泵把再加雙出尾喉，有霸氣！
開門即見專用刻字金屬門檻。
重本錢跑車化要令人覺得物超所值，首要係賣大包、加重料！但Fiesta本身係cheap車仔，如果加豪華設備盞弄巧反拙。有咩設備係後生仔鍾意，成熟人士又唔抗拒兼用得着？桶凳！跑車一定要有對桶凳先似樣，你睇M-Benz嘅AMG車系都有專用凳啦！Fiesta ST採用RECARO代工生產嘅桶凳，上面仲繡咗ST專用字，包承力當然有保證，Tony：「我覺得張凳幾好，以廿萬價位有RECARO凳，已經贏晒，好多三、四十萬嘅車都冇。」惟獨是用上同一布料嘅後座比較平坦，後座乘客雖有唔錯空間，但如果一齊飛幾轉，腰骨一定好攰。
車廂其他布局大致同5門版有8成相似，只係用咗ST專用真皮軚，手感會好啲，而且加入USB播歌、engine start按掣及金屬腳踏，方便舒適性都提高。筆者覺得坐喺駕駛席有一個小問題，就係hand brake位置旁嘅杯架位太貼波棍，如果放支水喺呢個位，就會有少少阻礙轉波。
RECARO出品嘅桶凳頗大張，包承力相當之好。
對比前座Fiesta ST嘅後座就比較普通，承托力一般。
馬力暴增90%市面上有唔少車同Fiesta差唔多車身大小，但冇乜幾多款車可以由普通版變成辣版時，馬力有達90%增幅！ST版唔係加個turbo咁簡單，換上1.6公升turbo引擎，馬力輸出突破至182匹！比Polo GTI更大馬力。Tony：「ST輸出表現好好，尤其低轉扭力好足夠，turbo lag唔大，令到出彎時加速好smooth。不過佢始終係用1.6公升引擎，100km/h打後嘅高速會比較輸蝕，但以車仔嚟講，做足本分有餘。」
輸出大唔代表一切，小跑車要好彎先係王道，筆者同Tony分別喺大帽山轟幾轉，大家嘅評價一致。「好靈活！個車尾好好玩！入彎時車頭唔會推住出去，個尾好醒目咁跟住轉，有少少外移，抵消咗推頭。唯一美中不足係迫力仍有強化餘地，或者可能車太新，落山用激烈方法剎車，冇耐就腳軟。」
駕駛艙同4年前嘅普通版有8成相似，最靚係用專用軚盤同金屬腳踏。
表板同普通版一樣簡潔，而中央液晶體屏幕加咗轉波提示功能。
6速手波係唯一選擇，正因為咁，先吸引到人。
金屬腳踏有防滑膠粒，美觀又實用。
追加強化補品Tony之所以集得齊13人一齊買Fiesta ST，就係因為講明未來日子會一齊參與Track day，希望可以喺賽道上體驗一下one-made race快感，據了解Tony已部署好強化項目。「我首先會建議換alcon 4-pot brake kit，解決咗收車問題先。其次先針對唔同用家需要而改嘞！我個人認為改快波棍都值得投資，因為原裝行程比較長又輕，改到短啲同重少少，手感上已經有好大分別。此外，如果想追求大馬力，其實都有簡單升級方水法，插上Swiss Chiptech晶片，就可以提升約30匹馬力同5.6kgm扭力。」
Tony認為Fiesta ST引擎低轉扭力充沛，而且turbo Lag細。
激劈幾轉大帽山後，Tony表示迫力仍有進步空間。
alcon 4-pot brake可改善制動系統耐久性問題。$19,800
Quickshift快波棍可提升轉波手感。$2,600
加裝一粒Swiss Chiptech晶片已可增加約30匹馬力。$6,800
總結據知Fiesta ST已賣出超過30部車，以只有手波供應嘅車嚟講，都算係一個小奇蹟！筆者認為佢好賣並唔關好揸事，因為準車主根本連車都未試過！好賣係因為車價實在平得過分，同等價錢只可以買部1.5公升入門房車仔，𠵱家有賺了。而且Fiesta ST確實有「刀仔鋸大樹」感覺，跑大帽山，未必會輸畀大馬力跑車！
查詢：TW Autosport（2142 0005）
