千呼萬喚，終於等到台慶月完結篇，亦都係高潮位：萬千星輝頒獎典禮。
港姐搞到一鑊泡，真正失敗乃成功之母，今次視帝視后總算搞得成全民公投，官方數字公布，共154萬張觀眾選票，黎耀祥、楊怡各得11多萬票，成為視帝視后最終贏家。
大家睇完賽果，係叫好定想掟爛部電視呢？其實兩個半鐘頒獎典禮，見到Benz雄（許紹雄）發火、Do姐攞綠葉獎、葉德嫻爆笑頒獎、仲有剛簽多五年賣身契的楊怡無意透露續約換獎天機，就算賽果唔係心水，娛樂加驚喜已經源源不絕！
史上首次由全民公投產生的視帝、視后及最佳劇集，週一（17日）晚終於誕生。去年11月，《天與地》播出時，收視低又冇高層撐，卻成為網絡神劇被網民力捧，果然高票當選最佳劇集，表面睇今次無綫標榜七位數字投資、試驗三個月、兼有公證行監票嘅全民公投系統，真係使得。
公布結果時，楊怡忍唔住喊，身旁嘅胡杏兒亦激動到攬住佢搖幾下，搞到頸筋盡現，高登仔話杏兒個胸係咁搖，好吸引喎！
眼見女友楊怡揮低徐子珊，男友羅仲謙未有上前擁抱鼓勵，反而低調抑壓淚水，默默替女友高興。
週日（16日）徐子珊聯同林峯和馬明到荃灣最後拉票，點知輸畀續約換獎嘅楊怡，嘥心機！《蘋果日報》圖片
洩露天機
投票截止時間係週一（17日）凌晨三點，僅僅四小時前播出兩小時《大太監》大結局，雖然話投票冇得造假，不過劇集播出時間絕對直接影響比賽賽果。男主角再次落入祥仔手中絕無爭議，女主角徐子珊同楊怡之爭一直係全城熱話。但《名媛望族》勝在新鮮熱辣在投票結束前兩日播出大結局，四姨太賺晒師奶票，反而徐子珊就得高登仔死撐。據知情人士透露，執到支好籌拍台慶劇、被刻意安排台慶月谷爆人氣，只因楊怡終於肯動筆與無綫續簽經理人合約，更一簽就簽五年，你識做無綫當然有回饋。
豬肉獎失威
賽前高調去商場拉票嘅徐子珊，最後都只得「我最喜愛的電視女角色」，明知冇行再攞「最佳女主角」，睇見佢欲哭無淚嘅表情，成班撐佢嘅網友愈睇愈心酸。
台慶劇《大太監》週日播完大結局，校啱時間谷黎耀祥攞「最佳男主角」，祥仔亦實至名歸第三度封帝。
楊怡：合約一定要簽
其實合約未到期，未有籌碼在手傾獎，楊怡死敵徐子珊亦一早心中有數，尤其被公布取得豬肉獎「我最喜愛女角色」時，喊晒口嘅徐子珊擺明失望多過喜極而泣，更話中有話望實樂易玲：「多謝樂小姐，我知你幫咗我好多！」至於最後贏家楊怡，雖然疑似換獎，不過話晒捱到第11年至有大獎攞，真情流露爆喊。唔知係唔係興奮過頭，楊怡例牌多謝完成棚高層同媽咪後，竟爆響口：「我要多謝Lisa姐（汪明荃），係你話畀我聽，經理人合約一定要簽，佢會畀好多機會你！」包唔包攞視后呢啲機會？
大冷鬥露
無綫頒獎禮除咗睇邊個輸贏，班花旦谷到行撐場，其實都係亮點，可惜今年班姐仔冇驚喜，剩番兩位大冷門視后困獸鬥。
上年連續攞咗最佳和我最喜愛女主角獎嘅胡杏兒就搏命性感搶鏡，單肩蛇頭波杏兒惡鬥高衩陰濕陳茵媺，冇獎都贏收視。
蛇頭波杏兒
陰濕陳茵媺
笑點有驚喜
無綫頒獎禮今年玩突破全民投票，連啲頒獎嘉賓都玩新意，全晚笑點首推葉德嫻自爆「不知馬國明是誰？」另外Do姐無厘頭降呢同甘草爭獎，起碼都令大家醒一醒。
Benz雄發火
有份攞傑出演員大獎嘅許紹雄上台致謝辭時，一開口就被PA打圈趕收工，谷住道氣嘅Benz雄上台頒獎時，再被PA打圈忍唔住爆：「你哋圈咩圈，𠵱家我哋大晒，我哋鍾意頒就頒，唔鍾意頒就唔頒，鍾意講就講，唔鍾意講就唔講！」出完火，跟手再撩頒獎的吳孟達吹多兩句水。
Do姐降呢
「萬千星輝頒獎典禮」今年無厘頭加設「傑出演員大獎」，冇候選名單，排名不知是否分先後頒給許紹雄、李成昌、錢嘉樂、陳錦鴻同鄭裕玲。DoDo姐話晒一向同汪明荃平起平坐，家陣阿姐攞咗「萬千光輝影藝人大獎」神級獎項，Do姐無啦啦攞甘草，降晒呢喎！
Deanie姐潮玩馬明
頒發最佳男主角嘅頒獎嘉賓、七料影后葉德嫻一向好搞笑，笑料仲緊貼網絡潮流。佢逐個點評五位候選人，潤完陳豪手機閃爆民初衫袋，再問台下：「呢度邊個係馬國明！」Deanie姐都識潮語「而我不知道」喎！
