出外拍劇有幾凶險，睇當年《人生馬戲團》就知啦！7年前有份拍嘅鍾嘉欣，本月隨大隊到澳門拍攝新劇《巨輪》，雖然嘉欣BB喺澳門得幾日戲分，不過澳門最近隨住崩牙駒出獄難免再風雲變色，嘉欣父母當然唔放心。
為咗保護愛女，嘉欣BB父母更由加拿大飛去澳門，仲同愛女瞓埋一間房，全天候釘實愛女。就算贊助該劇嘅鉅記老闆叫到出席飯局，嘉欣父母都一於跟到實，保護女神真係一秒不能鬆懈。
6日鉅記請台前幕後食飯，嘉欣父母亦喺邀請之列，仲同阮兆祥、貝安琪等，坐埋同一架車出發，唔知TVB有冇問嘉欣收番租車錢呢？
飯局除咗有鉅記老闆梁燦光（左），珍姐（右）及監製王心慰等都有畀面，有珍姐睇實，鍾父唔使咁擔心喎！
無綫重頭劇《巨輪》以著名澳門手信店鉅記餅家嘅發跡史作藍本。故仔講鉅記，當然要喺澳門拍先傳神。劇組更要喺馬交逗留成個月，身為女主角鍾嘉欣當然唔例外，要喺澳門住幾晚。
成家食$200
前週三（5日）嘉欣由朝早5點開工到晚上6點先收工，不過都同父母去附近食越南菜，三個人埋單大約200蚊，成家都原來咁慳！
10級戒備
嘉欣父母全程跟實愛女，就算過馬路，阿媽都繑實個女隻手，真係緊張到呢！
同父母匿一房
05年喺番禺拍《人生馬戲團》疑似發生過不快事件。當年有份拍攝嘅嘉欣BB，亦傳過失蹤兩小時，所以嘉欣這次到澳門取景，其父母亦相當緊張。本月5日由加拿大返港後，便即刻搭船去澳門，更同嘉欣住埋同一間房，實行全天候保護女神。
本月5日嘉欣收工後，先同父母去食越南菜。翌日就算要出席鉅記老細梁燦光邀請嘅飯局，嘉欣父母亦一於跟到實，至上週六（15日），鉅記老細再宴客，鍾嘉欣則大條道理要陪父母而婉拒，據知情人士說：「Linda（鍾嘉欣）父母知阿女要出埠，所以專登跟埋佢去㗎，Linda去邊佢哋都好緊張，雖然佢哋住埋一間房，不過TVB話只係包鍾嘉欣單人房錢，如果要轉雙人房就要自己畀錢喎，其實間酒店（金麗華酒店、前澳門文華東方）都係千幾蚊晚，無綫咁都要Linda補番錢，真係有啲孤寒囉！」可以24小時保護愛女，千幾蚊抵畀啦！
手信街誇傳：冠名價過億
鉅記今次贊助《巨輪》拍攝，除咗經常請劇組食飯外，送禮亦相當大手筆，開鏡拜神當日，採訪傳媒每人一大袋鉅記禮品。喺澳門拍攝期間亦幫無綫申請封路，更入住5星級金麗華酒店。至於《巨輪》劇中以羅信記代替鉅記，但澳門街有誇到痺流言話鉅記曾想用回真名拍攝，可惜因天價1億作罷。不過𠵱家套劇都叫《巨輪》，又以鉅記作藍本，唔使寫到明都知啦！
為助《巨輪》拍攝，鉅記亦借出位於澳門清平新街嘅老鋪出嚟拍攝。就算劇中唔講明鉅記，但一睇就知啦！
手信任攞
《巨輪》開廠拜神當日，鉅記更抬咗300盒手信嚟電視城，除咗畀演員、工作人員，就連記者都一人一盒攞走。
跟足史實
《巨輪》整個故事以鉅記發跡作藍本。當年鉅記喺大三巴擺車仔檔起家，呢啲情節《巨輪》當然有啦！
鉅記咁大手筆，無綫亦相當識做，一有《巨輪》宣傳都會請埋鉅記老闆梁燦光（箭嘴）出席。
出埠靠贊助
無綫拍劇一向廠景行先，想出trip除非有人贊助。06年《賭場風雲》有菲律賓克拉克賭場贊助，到今年嘅《衝上雲霄2》就有香港航空贊助。唔係邊有得，去台灣又去英國呀？
當年《家好月圓》有奇華餅家贊助，除咗提供工場拍攝外，當然少不了植入式廣告出現。
《賭場風雲》有菲律賓克拉克賭場贊助，令拍攝時有賭場實景。如果唔係又係全劇廠景拍攝喇！
國泰唔玩，差啲搞到《衝上雲霄2》開唔到，好彩最後有香港航空贊助，唔係大家唔知等到幾時先有續集睇。
