上週五（7日）FBI行經大坑，突然見到着到好似銀行職員嘅「關二嫂」黃智雯好婀娜多姿咁喺條街度行，黃智雯個巨躉行起嚟仲擺吓擺吓，簡直令FBI眼前一亮。不過望真啲，原來拍緊戲咋！
原來新警匪片《風暴》近日開拍，卡士除咗有喺現場嘅黃智雯同林家棟外，仲有黃德斌，而劉德華亦會客串一角。當日場戲講黃智雯啱啱同班同事放飯，就撞啱好慌張嘅林家棟經過，林家棟疑似拎住袋贖金放落垃圾桶，氣氛搞到成個大坑都緊張晒。
估唔到黃智雯由關二嫂一角輕易跳入大銀幕，今次仲有幸拍到大卡士，雖然未做到女主角，不過指日可待嘅！
下圍相當豐滿嘅黃智雯着起呢套銀行服，雖然無制服誘惑嘅效果，但係都好養眼！
飾演警察嘅林家棟呢個疑似擺贖金嘅款，近年嘅戲真係唔少得！可能部《風》片拍得好趕，林家棟每拍完一個shot就行埋一邊扯煙，有時仲要放鬆眉頭一下。
啱啱結婚嘅內地女星，微博女王（粉絲達2,835萬）姚晨都有份演出，同黃智雯飾演同事。安樂影片老闆江志強當日都喺度監場，仲同林家棟好好傾。
