【明報專訊】香港報業公會噚日派發2011年香港最佳新聞獎嘅成績表，《明報》憑住一班手足上下一心，一口氣攞到14個獎，數目係參加者之冠，喺15個組別裏面掃咗4個冠軍，包括「最佳新聞寫作」、「最佳經濟新聞報道」、「最佳版面設計」同「最佳新人」，亦係攞冠軍最多嘅報館之一。
偵查組同事周偉強同覃純健，跟進農地起豪宅、黑市丁權呢啲光怪陸離嘅土地爭議，攞到「最佳經濟新聞報道冠軍」。
除咗打得，Emily班同事仲好寫得，偵查組同事覃純健寫嘅愛滋病童被內地拒醫，多得香港大學出手嘅故事，奪得最佳新聞寫作（中文組）冠軍。至於都係屬於偵查組嘅同事屈俊樂，則以「蘇錦樑涉僭建嚴重過特首」等三篇報道奪得「最佳新人獎」。
編輯同美術同事，就憑解構新政府總部攞咗「最佳新聞版面設計冠軍」。要有吸引眼球嘅報道，點少得靚相，攝記余俊亮同林振東，就憑住佢哋準確捕捉，用啲相帶讀者去到事發現場，榮獲多個獎項。
舊年區選過後，本報連日揭發區議會選民涉虛報住址，多得偵查組、政治組同一般組群策群力，相繼揭發美孚選民原來唔係住喺美孚、400呎貨倉報11姓選民、地盤登記咗近百選民，部分選民更加被執法部門檢控，再引發政府建議修例，堵塞選民登記政策漏洞，呢一系列新聞獲得「最佳獨家新聞」亞軍。
.
如果您喜歡這篇文章，請按「讚」或分享給您的朋友，以示鼓勵。
