「Nobody nobody,but you...」一個禮拜跳兩三次Zumba fitness，呢期條腰幼晒，咪等死黨嘉雯以為淨係佢先有腰，成日擺張着肚皮舞衫相上facebook晒命。不過，每次跳完成身汗，一定要冲凉，仲會乘機焗吓桑拿。最近喺gym桑拿房門口多咗張告示，「不要在桑拿或蒸氣浴內使用潤髮膏或焗油等同類產品，否則可能會受嚴重傷害」。
油類產品變得高溫
吓？唔少女士（包括部份貪靚男士），都鍾意焗桑拿前乘機先搽定啲焗油之類，可以順便護髮吖嘛。走去問吓更衣室嬸嬸，佢話原來曾經有人因為咁整傷頭皮，所以要貼張咁嘅告示。小妹真係唔明白，因為焗油嘅說明書都講明，搽完之後最好用熱毛巾包住o架，咁喺桑拿房效果唔係應該更加好咩？
皮膚科專科醫生陳衍里解釋，道理好簡單，「小學都有教啦，水嘅沸點係100℃，但油類產品的沸點更高。」佢見我呢個理科白癡仲唔明，就繼續講，因為桑拿、蒸氣室溫度好高，如果逗留時間太耐，尤其一下唔小心瞓着咗，油嘅沸點較高，頭髮上面嘅焗油一旦熱起上嚟可能好高溫，「真係有可能好似燒着啲皮膚咁」。佢話雖然呢種情況灼傷機會唔太高，「但最怕萬一」。
將呢個message同其他做gym嘅friend講起，原來唔少人有呢個習慣，但以後都唔敢，費事到時成身紅晒，變咗Lady GaGa。
請按『讚好』，接收更多相關主題。
如果您喜歡這篇文章，請按「讚」或分享給您的朋友，以示鼓勵。
