啱啱收到強積金業績年報，終於唔使蝕，仲有少少賺。之前跌到阿媽都唔認得，小妹對金融投資真係冇信心，寧願買古董錶保值，最少唔會得番張紙。
本地搵古董錶門路少，有時會去蘇富比，唔好誤會小妹係超級富婆，佢哋唔係樣樣嘢幾千萬o架，有啲古董錶都係幾萬蚊。大行有保證，但成交價40萬以下嘅要收25%佣金。
美國古董鐘錶專家Thomas Nilani過去12年，每年都嚟香港搞一兩次鐘錶展，今年首次加埋拍賣會。佢話香港冇乜古董鐘錶拍賣，大型拍賣會8萬蚊隻錶，隨時要畀成2萬佣金，但佢只收12%佣金，畀現金仲只係9%。
佢仲話，美國經濟好差，唔少有錢佬損手要變賣家傳之寶，部份託佢轉手，佢坦言都冇咁多錢買斷，所以索性搞拍賣會可以代賣。
拍賣品包括估值4萬幾蚊嘅1965年Rolex Submariner、9萬蚊起嘅70年代Patek Philippe鑽石白金錶，過百年歷史嘅就有90萬嘅1830年嘅George Prior陀錶等。仲有兩粒有GIA鑑書寶石，分別係8.88卡嘅無瑕鑽石，同14.48卡嘅Fancy Vivid Yellow黃鑽，價錢要on request，但怕且每粒幾百萬。小妹買唔起都會睇吓，diamonds are a girl's best friend嘛。
佢會繼續售賣另一批古董錶，其中我最鍾意係60年代嘅Rolex鑽石錶，設計好高貴但成$138,000，Piaget嘅舊款女裝Dancer就大約$59,800。
展覽3月12至14日喺尖沙嘴金域假日酒店舉行，拍賣就喺14日5點開始預展，7點拍賣，詳情致電6288 7585。
